Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

LAFAELE TAVITA

 

O le aso 24 o Ianuari, 2019 lea ua fa’atulaga e lau ai le fa’asalaga a le ali’i o Lafaele Tavita, i le mae’a ai lea ona talia e le fa’amasinoga o lana tali ioe i le moliaga mamafa o le gaoi, i lalo o se maliliega na latou sainia ma le malo.

 

Na ulua’i tu’uaia e le malo ia Tavita i le moliaga mamafa o le talepe fale i le tulaga muamua, faapea ai ma moliaga mama e 2 o le faaoolima i le tulaga tolu, ae i lalo o se maliliega na sainia e Tavita ma le malo, na malie ai le malo latou te suia le moliaga e tali ioe ai le ua molia, i le moliaga mamafa o le gaoi.

 

I le tali ioe ai o Tavita i le moliaga e pei ona ta’usala ai o ia e le fa’amasinoga, sa ia ta’utino ai e fa’apea, i se taimi o le vaveao o le aso 21 o Me, 2018, sa ia ulufale faamalosi ai i totonu o le fale a se aiga ma gaoi se laptop ae fa’atau atu i se tasi o ana uo.

 

Na taua e le malo i le latou tagi e fa’apea, o Tavita ma ni ali’i laiti se to’alua na latou osofaia le fale o le aiga na a’afia. Ina ua ulufale Tavita i totonu, sa ia vaaia se tagata o savali atu ia te ia ma se moli uila. Na tu’i e Tavita lea tagata ma pau ai i lalo, ona ia gaoi lea o le laptop sa i luga o le laulau ma fa’atau atu i lana uo o Richard Ifopo.

 

O loo molia fo’i e le malo ia Ifopo i le moliaga mamafa o lona taliaina lea o se oloa sa gaoi mai e se isi tagata. Ae o ali’i laiti e to’alua na i ai fa’atasi ma Tavita i le taimi o le solitulafono, o loo molia i laua i le gaoi, ma o loo fa’agasolo fo’i le la mataupu i luma o le fa’amasinoga mo fanau laiti o loo aafia i solitulafono.

 

O loo taofia pea Tavit ai le toese i Tafuna i le taimi nei e fa’atali ai le aso lea ua fa’atulaga e lau ai lana fa’asalaga.

 

VISE GAUTA

 

Ua talosagaina e le ali’i o Visa Gauta le fa’amasinoga maualuga, ina ia fa’atulaga loa se aso e faia ai lana fa’amasinoga autu, i le mae’a ai lea ona la teena ma lana loia ia Michael White o le ofa sa tuuina atu e le malo.

 

O le vaiaso na te’a nei na tula’i ai Gauta i luma o le fa’amasinoga maualuga mo le isi ana iloiloga, ona o le moliaga o le umia fa’asolitulafono o vaega o fualaau fa’asaina o loo tu’uaia ai o ia e le malo. O le tama’ita’i loia sili lagolago ia Laura Garvey na tula’i mo le malo.

 

Na fa’ailoa e le loia a Gauta ia White i le fa’amasinoga e fa’apea, ua mae’a ona la taulimaina ripoti a le malo e uiga i lenei mataupu, atoa ai ma se ofa sa tuuina atu, ma ua teena e Gauta le ofa a le malo. Sa talosagaina loa e White le fa’atulaga o se aso e faia ai le fa’amasinoga autu a Gauta.

 

O le aso 2 o Me, 2022 lea ua fa’atulaga i le kalena a le fa’amasinoga e faia ai loa le fa’amasinoga autu o lenei mataupu.

 

METHODIST KUKA MIKA

 

O le ali’i sa avea ma Fuimu a le malo lea na ta’usala e le fa’amasinoga i le tausaga na te’a nei i le moliaga o le umia fa’asolitulafono o vaega o le pauta o le aisa, ua toe tula’i nei fo’i o ia i luma o le fa’amasinoga ona o tu’uaiga i lona le usitaia lea o poloaiga a le fa’amasinoga sa tuuina atu mo lana nofovaavaaia.

 

O le aso Faraile na tea nei na fa’atulaga e faia ai le ulua’i iloiloga a Methodist Kuka Mika, pe fa’amaonia ua ia le usitaia tuutuuga o lana nofovaavaaia, e aofia ai le tuutuuga o le aua lea ne’i ona toe solia se tulafono a le malo i totonu o le 5 tausaga o lana nofovaavaaia.

 

Ina ua valaau le mataupu a Mika, na fa’ailoa ai loa e lana loia ia Michael White i le fa’amasinoga, e le tete’e Mika i le tu’uaiga fa’asaga ia te ia, ae ua talia e ia le tu’uaiga. Na taua e atili e White e fa’apea, o le masina o Novema na te’a nei na ta’usala ai e le Fa’amasinoga Fa’aitumalo ia Mika i le moliaga o le tete’e atu i Leoleo ao taumafai e pu’e fa’apagota o ia.

 

E 30 aso na faasala ai e le fa’amasinoga fa’aitumalo ia Mika i le toese i Tafuna, ina ua ta’usala o ia i le moliaga o le tete’e atu i Leoleo.

 

Na faailoa e le afioga i le Fa’amasino Sili ia Michael Kruse ia Mika e fa’apea, ua fa’atele ona ia tula’i i luma o le fa’amasinoga ona o solitulafono eseese. E le i umi ona lau lana fa’asalaga i le tausaga na te’a nei, ae toe a’afia fo’i o ia i le isi tuuaiga o lona ulaina lea o le aisa ao tuli ai lona fa’asalaga i le toese i Tafuna.

 

“Sa fa’atonuina oe e le fa’amasinoga ina ia e usita’i i tuutuuga o lau nofovaavaaia, a o lea fo’i ua e toe tulai i luma o le fa’amasinoga ina ua e le usitaia tuutuuga o lana nofovaavaaia,” o le saunoaga lea a Kruse ia Mika.

 

O le aso 11 o Ianuari o le tausaga fou lea ua fa’atulaga e toe tula’i ai Mika i luma o le fa’amasinoga maualuga, mo le tuuina atu o lana faasalaga e tusa ai o lona le usitaia o tuutuuga o lana nofovaavaaia.

 

LALOATA UNASA

 

O le aso 15 o Aperila o le tausaga fou lea ua fa’atulaga e faia ai le fa’amasinoga autu a le ali’i o Laloata Unasa, ina ua ia teena le ofa a le malo sa tuuina atu ia te ia. O Unasa o loo tu’uaia i le moliaga mamafa o lona umia fa’asolitulafono o vaega o le pauta oona o le aisa.

 

Ina ua valaau lana mataupu i le vaiaso na te’a nei, na fa’ailoa ai e le ali’i loia fautua ia Michael White i le fa’amasinoga maualuga, le teena lea e Unasa o le ofa a le malo, ae ua mana’o o ia e fa’atulaga loa se aso e faia ai lana fa’amasinoga autu.

 

O le vaiaso lava fo’i na te’a nei na fa’atulaga e fofoga aloaia ai le maliliega aufa’atasi a Unasa ma le malo, peita’i ina ua fa’atulaga lea iloilo, sa fa’ailoa e White i le fa’amasinoga, ua teena e Unasa le maliliega.

 

E pei ona taua i le tagi a le malo e fa’apea, o Unasa sa i totonu o le ta’avale a le ali’i o Alfred Tagiilima, ina ua aga’i atu Leoleo e fa’ataunu’u se poloaiga a le fa’amasinoga e sasili ai le fale ma le ta’avale a Tagiilima, ona o tu’uaiga i lona umia fa’asolitulafono lea o vaega o fualaau fa’asaina.

 

Ina ua vaaia e Unasa ia Leoleo ua aga’i atu i le ta’avale, sa ia taumafai ai loa e togi i fafo le tama’i pepa iila sa i totonu o le taga o lona ofu sa i ai vaega o le pauta fa’asaina o le aisa.

 

O loo taofia pea Unasa i le toese e fa’atali ai le aso lea ua fa’atulaga e faia ai lana fa’amasinoga autu. O le ali’i o Tagiilima o loo fa’aauau pea ona tatala i tua e fa’atali ai fo’i taualumaga o lana mataupu, ona o tu’uaiga o le umia fa’asolitulafono o fualaau fa’asaina ma fana o loo molia ai o ia e le malo.