Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

MOLIA SE ALI’I I LONA FA’AOOLIMA I SE TAMA’ITA’I

 

E 32 tausaga o se ali’i mai Poloa na loka e Leoleo i le vaiaso na te’a nei, ona o tu’uaiga i lona fa’aoolima lea i se tama’ita’i, e mafua mai ona o ni vevesi na tula’i mai i le lotoifale o le aiga.

 

O lenei mataupu na tofu atu i le Ofisa o Leoleo i Tafuna i le aso 5 o Tesema, ina ua faila e se Tina sana tagi fa’asaga i le ali’i o Lani Selota, i lona fa’aoolima lea i lana tama teine i totonu o le latou fale i Poloa.

 

Na maua le avanoa e fesiligia ai e Leoleo le tama’ita’i na a’afia e tusa ai o le fa’alavelave sa tula’i mai. Na taua e le tama’ita’i na a’afia i Leoleo e fa’apea, ina ua fa’atoa mae’a lava ona loka e Leoleo lona tuagane, e mafua mai i le fa’alavelave lea na sasa ai e lona tuagane lana fanau e to’alua i le ‘au o le pulumu, sa ia fa’atonuina loa le fanau a lona tuagane ina ia o loa i le fale.

 

Na fa’ateia o ia ina ua oso atu Selota ma fa’afetaui o ia, ma talanoa atu ia te ia i se leo leotele, fai mai e aua ne’i ona toe soona ee i tamaiti. Na taua e le tama’ita’i na a’afia le tu’i e Selota o lona gutu atoa ai ma le lafo atu o upu mamafa ia te ia. Na toe fo’i ese Selota i le taimi lea ae sa fa’aauau pea ona ee atu ia te ia.

 

O le po o le aso lava lea na aga’i atu ai loa Selota i le Ofisa o Leoleo i Tafuna ina ua poloaina o ia e Leoleo e oo atu latou te talanoa. Na muamua fa’ailoa e Leoleo ia Selota ona aia tatau fa’aletulafono, ma taua ai e le ua molia lona malie e fai sana fa’amatalaga i Leoleo.

 

Na taua e Selota i Leoleo e fa’apea, sa oso lona ita i le tama’ita’i na a’afia ina ua ia palauvale i nai ona tei ma tutuli ese. Sa ia taumafai e talanoa atu i le tama’ita’i na a’afia ae sa fa’aaua pea ona oso atu lona gutu ia te ia, sa ia togi fo’i o ia i le telefoni. O le mafua’aga lea o lona ita ma ia savali atu ai loa ma po le gutu o le tama’ita’i, peita’i sa fa’aauau pea ona oso atu lona gutu ia te ia ma tago ua togi o ia i le apa mea’ai.

 

Na teena e Selota moliaga mama e 2 o le faaoolima i le tulaga tolu atoa ai ma le fa’atupu vevesi i totonu o lona aiga ua tu’uaia ai o ia e le malo. O le ali’i loia fautua lagolago ia Ryan Anderson na tula’i mo ia, ae o le ali’i loia sili lagolago ia Jason Mitchell na tula’i mo le malo.

 

I le mae’a ai o le ulua’i iloiloga a Selota, na toe tatala ai loa o ia i tua e aunoa ma se tupe e totogi i lalo o tuutuuga e ao ona ia usita’i i ai. O ni isi o ia tuutuuga e aofia ai le fa’asa lea ona ia toe taumafai e fa’afesoota’i le tama’ita’i na a’afia, aua fo’i ne’i toe nofo ai i le fale o le tama’ita’i lea, ae saili se isi nofoaga e fa’amautu i ai mo le taimi nei se’i mae’a taualumaga o lana fa’amasinoga.

 

O le aso 28 o Ianuari o le tausaga fou lea ua fa’atulaga e toe tula’i ai Selota i luma o le fa’amasinoga fa’aitumalo.

 

PATI LEPOU

 

O le ali’i pagota lea o loo tuli sana fa’asalaga fa’a falepuipui e 20 tausaga, e mafua mai i le fa’alavelave lea na latou sosola ai ma nisi pagota i tua i le 2010 ma latou fasi fa’amo’amo’a se ali’i Leoleopo o le Faletupe o le ANZ Bank i Tafuna, ua toe molia nei fo’i o ia i le moliaga mamafa o le sola ese mai le falepuipui.

 

Na taua e le malo i le latou tagi e fa’apea, o le masina o Aokuso o le tausaga nei na sola ese ai le ali’i o Pati Lepou mai le toese i Tafuna a o taofia ai o ia. O ni ali’i pagota sa latou vaaia Lepou o oso i fafo ma le pa, na latou logoina Leoleo o le toese ma faia ai loa le gaioiga e saili o ia.

 

E to’atele Leoleo na auai i le sailiina o Lepou i le aso na sola ese ai i tua, ae i se taimi o lea lava aso, na toe maua ai o ia i se nofoaga i Tafuna, ma toe fa’afo’i atu ai loa o ia i totonu o le toese.

 

O le moliaga o le sola i tua mai le toese, o se solitulafono mamafa o le vaega D, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala i le salatupe e le silia i le $5,000, pe fa’asala fo’i i fa’asalaga uma ia e lua.

 

O le aso Faraile na te’a nei na tula’i ai Lepou i luma o le Faamasinoga Maualuga, ma ia teena ai le tagi a le malo fa’asaga ia te ia. O le aso 16 o Ianuari o le tausaga fou lea ua fa’atulaga e toe valaau ai lana mataupu.

 

I fa’a’maumauga o loo taua ai e fa’apea, i le 2010, na sosola ai i tua Lepou ma ni pagota se to’atolu ma le fa’amoemoe e aga’i atu i le fale o se tasi o ali’i pagota. Ina ua latou oo atu i le nofoaga o le ANZ Bank i Tafuna, sa latou vaaia le ali’i Leoleopo o loo moe.

 

Na afe i latou ma fasi loa le ali’i Leoleopo, e ala i le ta kiki o lona tino, ma fai i ai e aumai le ki o lana ta’avale se’i latou sosola ai. Na sosola ese i latou nei ina ua latou vaaia se ta’avale ua aga’i atu.

 

MOLIA SE ALI’I I LONA FA’AOOLIMA I LONA UNCLE

 

O le vaiaso na te’a nei na tula’i ai se ali’i talavou i luma o le fa’amasinoga fa’aitumalo, ona o tu’uaiga i lona fa’ao’olima lea i lona uncle.

 

Na teena e le ali’i o Valaau Malaki le moliaga o le faaoolima i le tulaga tolu ma le fa’atupu vevesi i nofoaga faitele fa’asaga ia te ia. Ua toe tatalaina nei o ia i tua e fa’atali ai le aso lea ua fa’atulaga e toe valaau ai lana mataupu i le masina fou o Ianuari.

 

Ua fautuaina o ia e le fa’amasinoga ina ia aua ne’i toe alu i le fale o lona uncle, pe toe taumafai fo’i e fa’afeso’ota’i o ia, a ia avea o ia ma tagatanu’u lelei e tausisi i tulafono a le malo i taimi uma.

 

I le tagi a le malo o loo taua ai e fa’apea, i le aso 5 o Tesema i le itula e 7:00 i le afiafi, na talosagaina ai e se Tama matua le fesoasoani a Leoleo, fa’asaga i lona nephew e 26 tausaga le matua na ia una’i ia te ia i lalo ma lafo atu upu mataga ia te ia.

 

Na taua e le Tama matua i Leoleo e fa’apea, e le o se taimi muamua lenei ua fai ai e lona nephew uiga le mafaufau nei ia te ia. O gaioioga a Malaki sa molimauina uma e lona tuafafine, lea sa ia fa’amatala i Leoleo le mafua’aga atoa o le fa’alavelave.

 

Na pu’e fa’apagota e Leoleo ia Malaki ma auina atu ai i le ofisa mo suesuega. Sa fa’alogoina e Leoleo le manogi ‘ava malosi mai le tino o lenei ali’i. Ina ua fesiligia o ia e  Leoleo, sa musu o ia e faia sana fa’amatalaga.