Ads by Google Ads by Google

Tala otooto o Fa’amasinoga

ausage@samoanews.com

ANETELE’A SIAKI

 

E 22 tausaga o se ali’i na pu’e fa’apagota e Leoleo i le vaiaso na te’a nei, ona o tu’uaiga i lona faia lea o uiga mataga i se teineitiiti e 15 tausaga le matua. O le vaiaso lava fo’i na te’a nei na tula’i ai Anetele’a Siaki i luma o le fa’amasinoga fa’aitumalo, ma fa’atulaga ai loa e le afioga i le ali’i Fa’amasino ia Fiti Sunia le aso Faraile o le vaiaso nei e toe valaau ai lana mataupu.

 

O loo tu’uaia e le malo ia Siaki i moliaga mamafa e 2 o le fai’aiga ma se teineititi e laititi i lalo o le tulafono, 2 moliaga mamafa o le tagofia o itutinosa o se teineititi, faapea ai ma le moliaga mama e tasi o lona faia lea o ni gaioiga e ono lamatia ai le saogalemu o fanau laiti.

 

E $35,000 lea ua fa’atulaga e totogi ona fa’atoa mafai lea ona tatala Siaki i tua mai le toese i Tafuna. Afai ae mafai ona tatala o ia i tua, ua poloaina o ia e le fa’amasinoga e aua ne’i ona toe solia se tulafono a le malo, a ia auai i ana fa’amasinoga uma, ma ia tuuina atu lona tusi folau e taofi e le malo, e le mafai fo’i ona ia tuua le atunu’u ao fa’agasolo ai lana mataupu. Ae sili ai i lo lena, e le mafai ona ia taumafai e fa’afesootai molimau a le malo e aofia ai ma le teineititi o loo a’afia i lenei mataupu.

 

O loo taua e le malo i le latou tagi e fa’apea, o Siaki e vava lalata le fale e nofo ai ma le fale o le aiga o le teineititi na a’afia. I le taimi ao tula’i mai ai lenei fa’alavelave, e masani ona ave ai e Siaki tupe i le teineititi ona o lona naunau ia maua se taimi la te feiloa’i ma talanoa ai.

 

Na fa’amatala e le teineititi na a’afia i Leoleo, e fa’alua ona la momoe ma Siaki i totonu o le potu o Siaki ma la fai’aiga ai. O nisi o taimi, e tu’u atu ai e Siaki tupe ia te ia ona o lona mana’o ia maua se taimi la te mafuta ai.

 

Ina ua fesiligia e Leoleo ia Siaki, sa ia ioeina ai tu’uaiga fa’asaga ia te ia, e aofia ai le la mafutaga fa’aleulugali’i ma le teineititi na a’afia, peita’i sa ia fa’ailoa i Leoleo, sa malie lava le teineititi i gaioiga uma sa laua faia.

 

MUSU FAILAUGA

 

O le aso 1 o Fepuari o le tausaga fou lea ua toe tolopo i ai le tu’uina atu o se faaiuga a le Fa’amasinoga Maualuga fa’asaga i le Tina lea na ta’usala i lona umia fa’asolitulafono o vaega o le laau fa’asaina o le mariuana, ina ua talia e le fa’amasinoga le talosaga a le loia a lea Tina, mo se avanoa e toe tolopo ai lenei mataupu.

 

O le vaiaso na te’a nei na tula’i ai Musu Failauga i luma o le fa’amasinoga maualuga, mo le tuuina atu o le faaiuga a le fa’amasinoga, ina ua fa’amaonia lona le usitaia o tuutuuga o lana nofovaavaaia, e pei o le auai lea i aoaoga fa’a faufautua i le leaga o le tagofia o fualaau fa’asaina.

 

Na fa’ailoa e le loia a  Failauga i le fa’amasinoga, susuga Michael White, o lea ua mae’a ona toe lesitala Failauga i le isi aoaoga, ma ua amata fo’i ona auai atu i ai o ia.

 

Saunoa le afioga i le fa’amasino sili ia Michael Kruse e fa’apea, afai e oo atu i le tausaga fou e le o usitaia pea e le ua molia tuutuuga o lana nofovaavaaia, ona sauni loa lea o le fa’amasinoga e tuuina atu sana faaiuga.

 

I lalo o se maliliega aufa’atasi na sainia e Failauga ma le malo, sa ia tali ioe ai loa i le moliaga o le umia faasolitulafono o vaega o le laau fa’asaina o le mariuana. O tuutuuga o le latou maliliega ma le malo, na malie ai le malo o le a latou le molia Failauga i le mataupu lea na ia gaoia ai se siaki e $180 ma tala i se faleoloa i Nu’uuli, peita’i na malie le malo e finau i le fa’amasinoga ina ia toe totogi e Failauga le tupe o le siaki sa ia gaoia.

 

ANESI MAPU

 

O le ali’i lea na molia e le malo i le vaiaso na te’a nei i le moliaga o le ave ta’avale ‘ona, ua molia nei o ia i le moliaga mamafa o le ave ta’avale ao se’i lona laisene. O lea moliaga e mafai ona fa’asala ai o ia i le toese mo le umi e le sili atu i le 5 tausaga, pe fa’asala i le salatupe e le sili atu i le $5,000, ae fa’amalosia lona tuliina o aso e 90 i le toese e pei ona fa’atulaga mai e le tulafono.

 

O loo taua e le malo i le latou tagi e fa’apea, na taofi e Leoleo le ta’avale a Mapu i luga o le alatele i Tafuna, ina ua molimauina e le o faia lona fusipa’u mo le saogalemu i luga o le alatele. A o talanoa Leoleo ma Mapu, sa fa’alogoina le malosi o le manogi pia e sau mai le tino o le ua molia faapea ai totonu o le ta’avale. Na ta’utino Mapu i Leoleo, o ia o loo ‘ona.

 

Ae ina ua fesiligia e Leoleo lona laisene ave ta’avale, na taua ai e Mapu e fa’apea, o loo se’i e le fa’amasinoga lona laisene mo le 6 masina, e mafua mai ina ua ta’usala o ia e le fa’amasinoga i le ogatotonu o le tausaga nei i le moliaga o le ave ta’avale ‘ona.

 

E $500 le tupe lea ua fa’atulaga e tatala ai Mapu i tua, e fa’atali ai lana ulua’i iloiloga lea ua fa’atulaga mo le vaiaso fou.

 

VINCENT TAGALOA

 

O le ali’i e 29 tausaga le matua lea na tu’uaia i lona fa’aoolima i se isi ali’i e ala i lona fa’aaoga o se ma’a e tu’i ai lona ulu ma ona foliga, ua molia nei o ia i le moliaga mamafa o le fa’aoolima i le tulaga lua, atoa ai ma le moliaga mama o lona fa’aaoga fa’asolitulafono o se a’upega.

 

O moliaga fa’asaga ia Vincent Tagaloa na alia’e mai i le fa’alavelave lea na tula’i mai i le 2 vaiaso talu ai i Pago Pago, ina ua tula’i mai se feeseeseaiga i le va o Mapu ma se isi ali’i sa latou inupia fa’atasi. Na amata le vevesi i se taugaupu i le va o le ali’i na a’afia ma Mapu, ma i’u ina tu’i ai loa e le ali’i lea Mapu ma pau ai i lalo. Na tula’i mai Mapu i luga ma se ma’a o loo uu i lona lima, ma tu’i ai loa foliga ma le ulu o le ali’i na a’afia ma manu’a ai.

 

E $5,000 le tupe lea ua fa’atulaga e le fa’amasinoga e tatala ai Mapu i tua. E ui na finau lana loia ina ia fa’aitiitia i le $1,000 le tupe e tatala ai o ia i tua, peita’i na teena e le fa’amasinoga lea talosaga.

 

O le aso Tofi o le vaiaso fou, Tesema 13 lea ua fa’atulaga e le fa’amasinoga e faia ai le ulua’i iloiloga a Mapu.