Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

JAMES SEFO

 

Na tuli e Leoleo le ali’i o James Sefo ona o tu’uaiga i lona taumafai lea e talepe ma gaoi se faleoloa i totonu o Leone, ae maua ai ma sikaleti mariuana i totonu o le taga o lona ofu sa fai.

 

O le vaiaso nei na tula’i ai Sefo i luma o le fa’amasinoga fa’aitumalo, ma o loo molia o ia i moliaga mamafa o le taumafai e talepe ma gaoi se faleoloa, atoa ai ma lona umia fa’asolitulafono o vaega o le laau fa’asaina o le mariuana.

 

E $5,000 le tupe lea ua fa’atulaga e tatala ai o ia i tua. Afai ae mafai ona tatala o ia i tua, ua fautuaina o ia e le afioga i le ali’i Fa’amasino ia Fiti Sunia ina ia aua ne’i toe alu i le faleoloa lea na a’afia i lana gaioiga, pe taumafai fo’i e fa’afesoota’i molimau a le malo, a ia avea o ia ma tagatanu’u lelei e tausisi i tulafono a le malo.

 

O le tama’ita’i loia fautua lagolago ia Anna Wells o loo tula’i mo Sefo, ae o le ali’i loia sili lagolago ia Jason Mitchell o loo tula’i mo le malo.

 

E pei ona taua i le tagi a le malo e fa’apea, o ni isi mai le afioaga i Leone sa latou logoina le Ofisa o Leoleo e uiga i lenei mataupu, ina ua latou molimauina se ali’i sa taumafai e talepe le faitoto’a pito i tua o se faleoloa i totonu o le afioaga, e ala i lona togiina i ni ma’a i le po o le aso 3 o Novema.

 

Na aga’i atu i ai Leoleo e tusa ai o le valaau peita’i latou te lei mafai ona maua le ua molia. Ae i le tuana’i ai o le vaiaso e tasi, na toe logoina ai loa le Ofisa o Leoleo e nisi o le nu’u, ma fa’ailoa i ai le ali’i lea sa taumafai e talepe le faleoloa, o loo taaalo mai ma nisi o tupulaga o le nu’u i luma o le malae.

 

E le i umi se taimi ae taunu’u loa Leoleo ma latou maua ai atu Sefo o loo taaalo ma nisi o tupulaga o le nu’u i luma o le malae. Na fa’ailoa e Leoleo ia Sefo le mafua’aga o le latou oo atu, pe maua se avanoa latou te aga’i atu ai i le Ofisa o Leoleo se’i fa’atalanoa se mataupu o loo mana’omia ai o ia.

 

A o taumafai Leoleo e talanoa atu ia Sefo, na fa’afuase’i ona faliu o ia i tua ma alu loa i le atoa aga’i i tua o le Falesa. Na tuliloa e Leoleo le ua molia aga’i i tua o le Falesa, fa’atasi ai ma le fesoasoani mai a nisi o taulele’a o le nu’u, ma faigofie ai loa ona maua o ia.

 

A o le i tuuina atu Sefo i totonu o le ta’avale a Leoleo, na muamua saili lona tino ina ia mautinoa e le o i ai ni a’upega ia te ia. I le taimi na saili ai lona tino, na maua ai e Leoleo i le taga o lona ofu sa faia se pepa o loo afifi ai ni sikaleti ua uma ona taai se 4. Na faailoa e Sefo i Leoleo, o sikaleti mariuana sa maua mai i le isi ana uo, lea na tago tu’u i totonu o le taga o lona ofu.

 

Ina ua fesiligia o ia e fa’atatau i le faleoloa o loo tu’uaia o ia i lona taumafai e talepe, na teena e Sefo lea tulaga ma ia fa’ailoa i Leoleo, na te lei taumafai lava e talepe se faleoloa.

 

LOLOGA APELU JR

 

E 12 masina lea ua nofovaavaaia ai le ali’i o Lologa Apelu Jr, ina ua ta’usala o ia e le fa’amasinoga faaitumalo i moliaga mama o le faatupu vevesi i nofoaga faitele atoa ai ma le fa’aoolima i le tulaga tolu.

 

O se vevesi na tula’i mai i le va o le aiga a Apelu Jr ma le isi aiga tuaoi, na mafua ai loa ona aga’i atu le ua molia i le fanua o le aiga lea ma faaoolima i se ali’i sa nofo ai.

 

Na faatoese le ua molia e tusa ai o lana solitulafono, peita’i na fa’ailoa i ai e le afioga i le ali’i Fa’amasino ia Fiti Sunia e fa’apea, e le sa’o le gaioiga sa ia faia, o lona fa’atinoina lea o gaioiga faasolitulafono faapenei i lona lava loto.

 

O nisi o tuutuuga o le nofovaavaaia a Aperlu Jr, e le gata ua fa’asa ona toe tu i le fanua poo le fale a le aiga tuaoi, ae ua poloaina fo’i lona totogi o le salatupe e $100.

 

MIKA FONOTI

 

Ua poloaina e le fa’amasinoga faaitumalo le ali’i o Mika Fonoti ina ia tuua Amerika Samoa ae toe fo’i atu i lona atunu’u o Samoa, pe a mae’a ona tuli lana fa’asalaga e 6 masina, e mafua mai ina ua ta’usala o ia i le moliaga mama o le gaoi.

 

O Fonoti na ulufale mai i Amerika Samoa i se pemita e 30 aso, ma nofo faasolitulafono ai lava mo le 10 masina seia oo ina pu’e faapagota o ia e Leoleo i le masina o Me o le tausaga nei, ona o tu’uaiga o le gaoi.

 

O nisi o tuutuuga o lana nofovaavaaia, o le tuua lea o Amerika Samoa ma aua ne’i toe ulufale mai i totonu o le 2 tausaga. Ua fautuaina fo’i e le fa’amasinoga le malo ina ia tuu atu se kopi o le faaiuga a le fa’amasinoga i le Ofisa o Femalagaaiga, ina ia mafai ai ona latou silafia, e le mafai e Fonoti ona toe ulufale mai i le atunu’u mo le isi 2 tausaga.