NICK MATAIA

O le vaiaso na te’a nei na faila ai e le malo moliaga fa’aopoopo fa’asaga i se tasi o ali’i e to’atolu ai i latou o loo molia i le ave fa’amalosia o ni tama’ita’i se to’alua e ta’i 14 tausaga le matutua i le masina o Oketopa na te’a nei.

E ese mai i moliaga o le faiaiga ma se teineititi e laititi i lalo o le tulafono, atoa ai ma le tagofia o itutinosa o se tama’ita’i e le fa’aipoipo i ai, ua faila nei e le malo moliaga fa’aopoopo o le umia fa’asolitulafono o vaega o le fualaau fa’asaina o le aisa, atoa ai ma le umia fa’asolitulafono o le aisa ma le fa’amoemoe e tulei pe tufatufa atu i isi tagata fa’asaga i le ali’i o Nick Mataia.

O le vaiaso na te’a nei na tula’i ai Mataia i luma o le Fa’amasinoga Fa’aitumalo, ma fa’atulaga ai loa e le afioga i le tama’ita’i Fa’amasino le Tumau ia Gwen Tauiliili-Langkilde le tupe e $20,000 e tatala ai o ia i tua.

O le tama’ita’i loia fautua mo tagata lautele ia Anna Wells na tula’i mo Mataia, ae o le tama’ita’i loia sili lagolago ia Christy Dunn na tula’i mo le malo.

Na teena e le fa’amasinoga le talosaga a Wells ina ia aveese le $20,000 lea ua fa’atulaga e tatala ai Mataia i tua, ae ua lava le tupe lea na fa’atulaga i lana mataupu muamua e $100,000 e tatala ai o ia i tua i mataupu uma e 2 ua faila fa’asaga ia te ia.

Na taua e Wells e fa’apea, e ui i moliaga faaopoopo fa’asaga ia Mataia, ae e tasi lava le tagi a le malo o loo fa’asaga ia te ia. O moliaga faaopoopo fo’i lea ua faila e le malo,  na afua mai i le fa’alavelave lava lea e tasi o loo tu’uaia ai Mataia.

Ae na taua e le loia a le malo ia Dunn e fa’apea, e ui e tasi le faalavelave na afua mai ai le tagi fa’asaga ia Mataia, peita’i e eseese tagi ia e 2. E ese le tagi e faatatau i le faia o uiga mataga fa’asaga i se tasi o tama’ita’i talavou na a’afia, ese fo’i le tagi i le umia faasolitulafono o fualaau fa’asaina lea ua fa’atoa faila e le malo.

O le vaiaso nei lea ua fa’atulaga e toe tula’i ai Mataia i luma o le fa’amasinoga mo le isi ana iloiloga.

O Mataia, faapea ai Apisaloma Timu ma Loma Iosia, o i latou ia e to’atolu na pu’e fa’apagota e Leoleo i le masina na te’a nei, ona o tu’uaiga i lo latou faia lea o uiga mataga i ni tama’ita’i se to’alua e ta’i 14 tausaga le matutua mai Malaeloa.

E pei ona taua e le malo i le latou tagi, o lenei mataupu na alia’e ina ua maua e matua o le isi tama’ita’i na a’afia se pepa iila e i ai vaega o le pauta o le aisa i le taga o le ofuvae a le la tama teine, ma logoina ai loa Leoleo mo se suesuega.

Na fa’amatala e tama’ita’i e to’alua na a’afia i Leoleo e fa’apea, e le gata sa latou feusua’i (tulou) ma i latou nei e to’atolu i se fale talimalo, ae sa tuuina atu fo’i e i latou nei vaega o fualaau fa’asaina ia te i laua.

Ina ua fesiligia e Leoleo tama’ita’i e to’alua na a’afia, na la taua ai lo latou ula o le aisa ma faia feusuaiga (tulou) ma i latou ua molia.

FA’AMANATU TUGAGA

O le vaiaso na te’a nei na toe faafo’i ai e le Fa’amasinoga Fa’aitumalo i Samoa se ali’i e 4 tausaga o tau sailia, ina ua ia le usitaia tuutuuga o lana nofovaavaaia sa tuuina atui le 2014, e aofia ai le fa’asa lea ona ia tuua Amerika Samoa a o fa’anofovaavaaia ai o ia mo le 12 masina.

O le mae’a ai ona ta’usala e le fa’amasinoga o le ali’i o Fa’amanatu Tugaga i tu’uaiga o lona le usitaia lea o poloaina o lana nofovaavaaia, na faia ai loa e le afioga i le ali’i Fa’amasino ia Fiti Sunia le fa’aiuga, ina ia tuua e Tugaga le teritori ae toe fo’i atu i Samoa ma aumau ai mo le umi e 2 tausaga lea ua faanofovaavaaia ai o ia e le fa’amasinoga.

E tele ni mataupu sa fia malamalama i ai le fa’amasinoga e fa’atatau i le mataupu a Tugaga.

E pei ona taua i fa’amaumauga a le fa’amasinoga e fa’apea, ina ua nofovaavaaia Tugaga mo le 12 masina i le tausaga e 2014, sa tuuina atu ai loa e le fa’amasinoga tuutuuga e ao ona ia usita’i i ai. O nisi o ia tuutuuga e aofia ai le fa’asa lea ona ia tuua le teritori, ma ia faia i suega i lona tino ina ia faamaonia ai na te le o toe tagofia le ‘ava malosi poo fualaau fa’asaina.

I le masina o Iulai o le 2014, na faatonu ai e le Ofisa Faanofovaavaaia ia Tugaga mo le faia o se suega e faamaonia ai na te le o tagofia le ‘ava malosi poo fualaau fa’asaina. Na fiu le Ofisa Faanofovaavaaia e faatali Tugaga mo le faia o le suega ae ua le oo atu. Na fa’atulaga fo’i lana iloiloga i luma o le fa’amasinoga peita’i ua le oo atu lava o ia. O le mafua’aga lea na tuuina mai ai loa e le fa’amasinoga se poloaiga e sailia ai Tugaga.

I le so 14 o Setema o le tausaga nei, na aga’i atu ai Tugaga i le Fa’amasinoga mo le pikiina mai o sana kilia, ae maua ai loa o ia ma taofia ai lava i le taimi lea i lalo o le vaavaaiga a le Masela o le Fa’amasinoga.

Talu mai le 2014 seia oo mai ia Setema 2018, o le taimi lea na mae’a ai le aoga o le pepa nofomau a le ua molia, peita’i, o lea na alu atu o ia e piki mai sana kilia e fa’afou ai lona pepa nofomau.

Na faailoa e Sunia ia Tugaga e fa’apea, afai e toe ulufale mai i totonu o le 2 tausaga lea ua faatonu o ia e alu ese ai ma Amerika Samoa, o le a sili loa ona mamafa se isi faaiuga e tuuina atu e le fa’amasinoga ia te ia.

FERETI LOLESIO

O le vaiaso na te’a nei na faila ai e le malo le moliaga mamafa o le ave ta’avale ao se’i le laisene fa’asaga ia Fereti Lolesio, e mafua mai i le fa’alavelave lea na maua ai o ia o loo ia fa’afoeina se ta’avale pikiapu i luga o le alatele i Vaitogi ae o loo se’i lona laisene.

O le masina o Iulai o le tausaga nei na faamaonia ai e le Fa’amasinoga Faaitumalo le moliaga o le ave ta’avale ‘ona fa’asaga ia Lolesio, ma se’i ai loa e le fa’amasinoga lona laisene mo le 6 masina.

Na taua e le malo i le latou tagi e fa’apea, ao tiute ni isi o Leoleo i le itu i sisifo o le atunuu i le vaiaso na te’a nei, sa vaaia ai se ta’avale pikiapu ma se uta e le saogalemu mo luga o le alatele o loo aga’i atu i le auala a le malo i Vaitogi.

Na taofi e Leoleo le ta’avale ma fesiligia le ave ta’avale i lona laisene. Na pepelo Lolesio i Leoleo o lona laisene o loo galo i le fale, ae ina ua fa’aauau pea suesuega, na toe suia ai lana tali ma ia ta’utino ai loa i Leoleo, o loo se’i e le fa’amasinoga lona laisene.

O le moliaga o le ave ta’avale ao se’i le laisene, e mafai ona taofia ai se tasi i le toese i Tafuna mo le umi e le silia i le 5 tausaga, ae faamalosia le tuliina o aso e 90 i le toese.