Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

TOE AFIA FO’I SE ALII ASIA I LE TULAFONO

 

O le ali’i Asia lea na ta’usala e le Fa’amasinoga Maualuga i ni nai tausaga ua mavae i le moliaga mamafa o le ave ta’avale ua mafua ai ona maliu se tagata, ua toe a’afia fo’i o ia i le tulafono i le taimi nei, ina ua toe tu’uaia o ia e le malo i le moliaga mama o le ave ta’avale ‘ona.

 

O le moliaga o le ave ta’avale ‘ona fa’asaga ia Chung Se Lee lea o loo taoto i luma o le Fa’amasinoga Fa’aitumalo, na mafua ai ona faila e le malo sa latou tagi i luma o le Fa’amasinoga Maualuga, mo se poloaiga e fa’aleaoga ai le nofovaavaaia a lenei ali’i.

 

O le vaiaso na te’a nei na fofogaina ai i luma o le Fa’amasinoga Maualuga le talosaga a le malo, lea fo’i na maua le avanoa o le ua molia e tula’i ai ma lana loia fautua ia Matalupevao Leupolu Jr. O le tama’ita’i loia sili lagolago ia Christy Dunn na tula’i mo le malo i lea iloiloga.

 

Ina ua valaau le mataupu a Lee, na talosaga lana loia ina ia toe tolopo le iloiloga i se isi taimi, se’i mae’a le fa’amasinoga autu a Lee lea ua fa’atulaga e faia i luma o le Fa’amasinoga Faaitumalo i le aso 18 o Ianuari 2019.

 

Na taua atili e Leupolu Jr e fa’apea, o le iloiloga lea fa’atoa iloa tonu ai loa le nofosala o Lee i le moliaga fou e pei ona tu’uaia ai o ia e le malo.

 

E ui ua talia e le fa’amasinoga le talosaga ina ia tolopo le iloiloga a Lee se’ia mae’a lana fa’amasinoga autu i le tausaga fou, peita’i na fa’amanino e le afioga i le ali’i Fa’amasino Sili ia Michael Kruse e fa’apea, ua mana’o le Fa’amasinoga e taofia loa le toe fa’afoe e lenei ali’i o se ta’avale i luga o le alatele.

 

E le o galo i le fa’amasinoga le mataupu e pei ona ta’usala ai Lee i tausaga ua mavae, ina ua ia fa’asolomuli se ta’avale la’u uta a se Fale’aiga i Nu’uuli ma taia ai se tamaititi sa i tua o le ta’avale ma maliu ai lava.

 

O le tamaititi pepe na maliu i lea fa’alavelave, o le tama a le ulugali’i e ana le Fale’aiga sa galue ai Lee i le taimi lea, o i laua fo’i ia o le sponsor a le ua molia.

 

E ui o lea ua toe tolopo lenei mataupu, ae ua taofia nei e le fa’amasinoga le laisene ave ta’avale a Lee, ma ua poloaina o ia e aua ne’i ona toe fa’afoeina se ta’avale sei vagana ua toe tuuina mai se isi poloaiga a le fa’amasinoga.

 

FA’AMANATU LALOIFI

 

O le vaiaso na te’a nei na tula’i ai i luma o le fa’amasinoga fa’aitumalo se ali’i e 36 tausaga le matua o Pava’ia’i, ona o tu’uaiga i lona fealua’i lea ma se agaese i luga o le auala ma fa’afefe ai ni isi o lona aiga.

 

Ua molia e le malo ia Fa’amanatu Laloifi i moliaga mama e 2 o le faaoolima i le tulaga tolu atoa ai ma le fa’atupu vevesi i nofoaga faitele.

 

E ui na tatala e le fa’amasinoga i tua le ua molia e aunoa ma se tupe e totogi, peita’i sa fautuaina o ia e le afioga i le ali’i fa’amasino ia Fiti Sunia, e le mafai ona tatalaina o ia i tua mai le toese, se’i vagana ua mae’a ona faia lana suega faapitoa mai le Foma’i o le mafaufau i le falema’i o le LBJ i Faga’alu.

 

O lenei mataupu na tofu atu i le Ofisa o Leoleo i Tafuna, ina ua talosagaina e le tuafafine a le ua molia se fesoasoani a Leoleo, ina ua le mafai ona taofia le fealua’i o Laloifi ma le agaese i luma o le latou fale faapea ai totonu o le latou nu’u.

 

A o le i fealua’i le ua molia ma le agaese, sa muamua ona ia faaoolima i se isi ali’i o lona aiga, sosoo ai ma lona folafola i ai o le fasiotia o lea ali’i i le agaese.

 

Na umi se taimi o taumafai Leoleo e saili poo fea ua oo i ai le savaliga a Laloifi ma lana agaese. Mulimuli ane i le isi itu o le nu’u, na vaaia ai loa e Leoleo le ua molia o loo savali aga’i atu i luga o se aega ma le agaese.

 

Na vave ona tu’u e le ua molia i lalo le agaese ina ua ia iloa mai Leoleo ae sola ese i le itu o le auala. E lei umi ae maua e Leoleo o ia ma taofia faapagota loa. Na taua e le malo i le latou tagi le fa’alogoina lea e Leoleo o le manogi pia mai le tino o Laloifi i le taimi na fa’atalatalanoa ai o ia e Leoleo.