ARONA SELESELE

O le ali’i lea na fufusu ma se isi alii i le vaega e paka ai ta’avale i luma o le Aoga Tulaga Muamua a Aua i le vaiaso na te’a nei, ua molia nei o ia e le malo i moliaga mama e 2, o le faatupu vevesi i nofoaga faitele atoa ai ma le fa’aoolima i le tulaga tolu.

Na teena e Arona Selesele moliaga fa’asaga ia te ia ina ua tula’i i luma o le fa’amasinoga fa’aitumalo i le vaiaso na te’a nei. I lona teena ai o tuuaiga faasaga ia te ia, ua fa’atulaga ai loa le isi ana iloiloa i le faaiuga o le masina nei, ma faia ai fo’i e le afioga i le ali’i Fa’amasino ia Fiti Sunia le poloaiga e tatala ai o ia i tua e aunoa ma se tupe e totogi, i lalo o tuutuuga e ao ona ia usita’i i ai.

O ni isi o ia tuutuuga e aofia ai le fa’asa lea ona ia toe taumafai e fa’afesoota’i le ali’i sa la vevesi, faasa ona ia toe soli se tulafono, a ia avea o ia ma tagatanu’u e tausisi i tulafono uma a le malo.

Na taua e molimau i Leoleo e fa’apea, na avea le poloka o le vaega e paka ai ta’avale ina ua aga’i atu matua e momoli a latou fanau i le aoga i le taeao na tula’i mai ai le fa’alavelave, ma itu na tula’i mai ai loa le vevesi i le va o Selesele ma le ali’i na a’afia.

Na talosaga le alii na aafia ia Selesele e alu tele i luma lana ta’avale, ona o loo poloka le auala ia te ia, ae na ita ai le ua molia ma ia lafo upu mamafa i le ali’i na a’afia. O se tauga upu laititi i le va o ali’i ia e to’alua, na fa’ai’u ai loa i le savali atu o Selesele ma tu’i le gutu o le ali’i na a’afia.

SONNY TUI

Ua talia e le fa’amasinoga maualuga le talosaga a le ali’i o Sonny Tui, ina ia fa’atulaga loa se aso e fa’ataunu’u ai lana fa’amasinoga autu.

O Tui o loo tuuaia i le moliaga mamafa e aofia ai le umia faasolitulafono o vaega o le fualaau faasaina o le aisa, atoa ai ma le moliaga o le umia o le aisa ma le fa’amoemoe e tulei ma fa’atau atu i isi tagata.

O loo taofia pea o ia i le toese i Tafuna ina ua le mafai ona ia totogi le $40,000 ua uma ona fa’atulaga e tatala o ia i tua.

O le vaiaso na te’a nei na toe fofogaina ai lana mataupu i luma o le afioga i le Fa’amasino Sili ia Michael Kruse. Ina ua valaau lana mataupu, sa faailoa e lana loia ia Marcellus T. Uiagalelei lo la tauaaoina lea o mau faamaonia o le tagi a le malo, peita’i e foliga mai ua le mafai ona latou ausia se maliliega autasi ma le malo e fa’amuta ai lenei mataupu.

Na talosagaina ai loa e Uiagalelei le fa’amasinoga ina ia fa’ataunu’u loa le fa’amasinoga autu mo lenei mataupu.

O le mataupu o loo tuuaia ai Tui na alia’e mai i le masina o Tesema 2017, ina ua alu e piki mai sana afifi mai le malae va’alele i Tafuna, ae maua ai fualaau faasaina i totonu o le afifi. E pei ona taua e le malo, i totonu o le afifi sa i ai se sipika, ae o totonu o le sipika sa aumai faanana ai vaega o le pauta o le aisa, lea e tusa ma le 7 aunese lona mamafa.

Na faailoa e Tui i Leoleo ina ua fesiligia o ia, o le afifi na alu atu e piki mai, o loo i ai le meaalofa mo si ona To’alua mo le Kerisimasi.

FA’AILI MATA’U

Ua aloaia le tuuina atu e le Fa’amasino Sili o se poloaiga e pu’e fa’apagota mai ai le ali’i o Fa’aili Mata’u, ina ua le oo atu o ia i lana iloiloga lea sa fa’ataunu’uina i le vaiaso na te’a nei i luma o le Fa’amasinoga Maualuga.

O Mata’u na poloaina e oo atu i luma o le fa’amasinoga, e tali i tu’uaiga o lona le usita’i lea i tuutuuga o lana nofovaavaaia. O loo tuuaia e le malo ia Mata’u i lona le usitaia lea o tuutuuga o lana nofovaavaaia, ina ua faia se suega i lona tino ma maua ai, o loo ia fa’aaogaina le fualaau fa’asaina o le aisa.

O se tasi o tuutuuga o le nofovaavaaia a Mata’u e 5 tausaga, ina ua ta’usala o ia i lona umia faasolitulafono o le pauta oona o le aisa, o le fa’asa lea ona ia toe tagofia fualaau oona poo le ‘ava malosi.

O le masina o Aperila o le tausaga nei na faia ai se suega i le tino o Mata’u e sui o le Ofisa Faanofovaavaaia, ma faamaonia ai le i ai o le vailaau o loo i le pauta o le aisa i lona tino.

Ua faatonuina e Kruse le malo ina ia saili Mata’u ma tuuina atui luma o le fa’amasinoga.