Ads by Google Ads by Google

Tala otooto o Fa’amasinoga


[ata: foai]
ausage@samoanews.com

PUOU VILI

 

Ua talia e le afioga i le alii Fa’amasino ia Fiti Sunia le talosaga ina ia tatala i tua mai le toese i Tafuna le Tama e 59 tausaga le matua lea na ia faaoo manu’a i lona lava tino ina ua teena o ia e se tama’ita’i, e fa’atali ai le aso lea ua fa’atulaga e valaau ai lana fono i luma o le Komiti o le Ofisa o Femalagaaiga mo le fa’afouina o ona pepa nofomau i Amerika Samoa.

 

O Puou Vili na mae’a le aoga o lona ID nofomau i le masina o Fepuari 2016. Ina ua taofia o ia e Leoleo i le masina o Setema ona o le fa’alavelave e pei ona molia ai o ia, sa faia ai le faaiuga a le afioga i le ali’i Fa’amasino ia Sunia ina ia taofia o ia i le toese e aunoa ma se tupe e tatala ai o ia i tua, ona o le tulaga fa’aletonu i ona pepa nofomau.

 

O le vaiaso na te’a nei na fa’ailoa ai e le loia a le malo ia Jason Mitchell i le fa’amasinoga, le i ai lea o se tagata fou ua ia sauni e sponsor Vili, ma ua mae’a foi ona tuuina atu se talosaga i luma o le Komiti Fa’afoe o Femalagaaiga mo le toe fa’afouina o le ID a lenei tama.

 

Saunoa Sunia e fa’apea, e i ai le tulafono e tatau ona usitaia, ae talu ai o lea ua manino le folasaga a le malo, o le a talia ai e le fa’amasinoga le tatala i tua i Vili e fa’atali ai le aso lea ua fa’atulaga e toe tulai ai i luma o le fa’amasinoga, le aso 23 o Novema.

 

PITA NAILUA

 

O le ave ta’avale o le ta’avale lea na tula’i mai ai se fa’alavelave tau ta’avale i se vaega o Tafuna i le 2 vaiaso talu ai, ua molia nei o ia e le malo i moliaga tau ta’avale e 2 o le ave ta’avale ‘ona, atoa ai ma le ave ta’avale fa’atamala.

 

O le itu ogaoga o le tagi a le malo fa’asaga ia Pita Nailua, o le maualuga lea o le pasene (%) o le ‘ava malosi sa maua i lona tino lea e tusa ma le .33%, tusa lea ua fa’afa mai le maualuga fa’atapula’a e fa’ataga i lalo o le tulafono e tatau ona i ai le pasene o le ‘ava malosi i totonu o le tino o le tagata.

 

O ni ta’avale se 2 na a’afia i se fa’alavelave tau ta’avale i Tafuna i le aso Faraile o le vaiaso i ona tua atu, na mafua ai ona auina atu le pasese o le isi ta’avale na a’afia i le falema’i, mulimuli ane toe te’a i tua i le aso lava lea.

 

O le aso 14 o Tesema lea ua fa’atulaga e toe valaau ai le mataupu a Nailua, ae ua poloaina o ia e le afioga i le ali’i Fa’amasino is Fiti Sunia ina ia aua ne’i ona toe tagofia le ‘ava malosi pe na te toe fa’afoeina fo’i se ta’avale i luga o le alatele a le malo, a o fa’agasolo ai taualumaga o lana mataupu.

 

THOMAS WILLIAM

 

O le vaiaso na tea nei na faila ai e le malo le moliaga mamafa o le ave ta’avale ao se’i le laisene fa’asaga i le ali’i o Thomas William, e mafua mai i le fa’alavelave lea na maua ai o ia o loo ia fa’afoeina se ta’avale, ae o loo se’i e le Fa’amasinoga lona laisene mo le 6 masina, e mafua mai ina ua ta’usala o ia i le moliaga mama o le ave ta’avale ‘ona i le masina o Iuni o le tausaga nei.

 

O le moliaga mamafa lea ua molia ai William e le malo, afai ae fa’amaonia e le fa’amasinoga, e mafai ona fa’asala o ia i le falepuipui mo le umi e le silia i le 5 tausaga, ae fa’amalosia lona tuliina o le umi e 90 aso i le toese.

 

O le po o le aso 8 o Novema a o tiute Leoleo i luga o se vaega o le alatele i Tafuna, sa latou maitauina ai se ta’avale pikiapu lanu uliuli o loo aga’i atu i Vaitogi i se saoasaoa uiga ese, ma taofia ai loa e Leoleo le ta’avale.

 

Ina ua fesiligia le ave ta’avale, sa ia faailoa ane, o ia o William. Ae ina ua tapa e Leoleo lona laisene, na ta’utino lenei ali’i, e le o i ai sona laisene ave ta’avale, o loo se’i e le fa’amasinoga mo le 6 masina. Sa maitauina e Leoleo le malosi o le manogi pia sa sau mai totonu o le ta’avale faapea ai ma le tino a le ua molia.

 

Ina ua fesiligia o ia e Leoleo pe sa ia tagofia le ‘ava malosi, na tali le ua molia, ioe, o ia sa inu ana fagu pia i le faamanatuina o le aso fanau a lona afafine.

 

E $500 lea ua fa’atulaga e totogi ona fa’atoa mafai lea ona tatala William i tua. Afai e tatala o ia i tua, ua fa’asa ona ia toe fa’afoeina se ta’avale ao fa’agasolo ai lana ta’avle.