Tala otooto o Fa’amasinoga
MALALA LUATAIMI
E 12 masina lea ua fa’asala ai e le fa’amasinoga maualuga le ali’i na tu’uaia i lona ave faagaoi o se telefoni o le ituaiga o le Samsung Galaxy S5 mai se faleoloa i Nuuuli.
O le vaiaso na te’a nei na tula’i ai Malala Lautaimi mo le lauina o lana fa’asalaga i luma o le fa’amasinoga maualuga. O le ali’i loia fautua ia Michael White na tula’i mo ia, ae o le tamaitai loia sili lagolago ia Christy Dunn na tulai mo le itu a le malo.
O le masina o Setema na te’a nei na ta’usala ai e le fa’amasinoga maualuga ia Lautaimi i le moliaga mamafa o le gaoi, ina ua talia e le fa’amasinoga se maliliega na sainia i le va o le ua molia ma le malo.
Ina ua maua lona avanoa mai le fa’amasinoga, na fa’atoese ai le ua molia e tusa ai o lana solitulafono, ma ia talosagaina ai se isi avanoa mo ia. Na taua e le ua molia e fa’apea, o masina e tele na taofia ai o ia i le toese i Tafuna a o fa’agasolo lana mataupu, ua ia a’oa’oina ai se lesona taua mo lona olaga, ma ua ia iloa ai, e le o se nofoaga lelei le falepuipui mo ia.
Na talosaga lana loia ia White ina ia faasala le ua molia i se faasalaga faanofovaavaaia, e aofia ai le aua lea ne’i toe i ai se isi fa’asalaga faa falepuipui e fa’aopoopo atu ia te ia.
Na talia e le loia a le malo le talosaga a le itu tete’e, ina ia faasala le ua molia i se fa’asalaga nofovaavaaia.
Na talia e le afioga i le ali’i fa’amasino ia Elvis P. Patea talosaga a loia, ma poloaina ai loa Lautaimi ina ia nofovaavaaia mo le 5 tausaga i lalo o tuutuuga e ao ona ia usita’i i ai.
O ni isi o ia tuutuuga e aofia ai lona tuliina o masina e 20 i le toese i Tafuna, peita’i o le a lava na o masina e 12 na te tuliina, ae o le umi e totoe ai o le a fa’amalumalu lona tuliina. Ua fautuaina fo’i le ua molia ina ia aua ne’i ona toe solia se tulafono, ma ia avea o ia o se tagatanu’u e tausisi i tulafono a le malo i soo se taimi.
FINAU LE UNCLE E FAIA SONA FAAMASINOGA AUTU
O le ali’i e 52 tausaga le matua lea o loo tu’uaia i lona faia o uiga mataga le taupulea i le tama teine a lona tuafafine, ua ia finau i le fa’amasinoga e fa’atulaga loa se aso e faia ai lona fa’amasinoga autu.
O le a le mafai e le Samoa News ona fa’alauiloa le suafa o le ali’i o loo molia i lenei mataupu, ona o puipuiga lava i le ono mafai lea ona iloa atu ai ma le teineititi o loo a’afia i lenei mataupu. O le teineititi o loo a’afia e pei ona taua i fa’amaumauga a le fa’amasinoga, o le tama teine a le tuafafine a le ali’i ua molia e 15 tausaga lona matua.
O le vaiaso na te’a nei na toe valaau ai le mataupu a le ua molia i luma o le fa’amasinoga maualuga. Na taua e lana loia fautua ia Michael White i le fa’amasinoga e fa’apea, ua mae’a ona la tauaaoina mau faamaonia atoa ai ma le ripoti a Leoleo mai le itu a le malo, ma ua teena fo’i e le ua molia le ofa sa tuuina atu e le malo, ae ua manatu o ia e fa’atulaga loa se aso e faia ai lana fa’amasinoga autu.
O le masina o Fepuari o le tausaga nei na faila ai e le malo le latou tagi fa’asaga i le ua molia, ona o tu’uaiga i lona faia lea o uiga mataga le taupulea i le tama teine a lona tuafafine. Ae na taua e le teineititi na a’afia i Leoleo e fa’apea, o le masina o Setema o le tausaga na te’a nei na amata ai ona faia e lona uncle uiga mataga le taupulea ia te ia.
O lo o taofia pea le ua molia i le toese ina ua le mafai ona ia totogi le tinoitupe e $30,000 na fa’atulaga e tatala ai o ia i tua.