Ads by Google Ads by Google

Tala otooto o Fa’amasinoga

ausage@samoanews.com

LOKA E LEOLEO SE TAMA’ITA’I ONA O LE LE MAFAUFAU I LONA TINA

 

Na taofia e Leoleo se tama’ita’i talavou mai Faleniu i le toese i Tafuna i le vaiaso na te’a nei, ona o tu’uaiga i lona save’uina lea o le nonofo filemu o lona aiga, e ala i lona fa’aali o uiga le mafaufau toe le fa’aaloalo i lona Tina.

 

Na taua e le Tina i Leoleo e fa’apea, sa ia fesili i lana tama poo fea le tupe sa i totonu o le ta’avale, ae na ee atu lana tama ia te ia ma amata ai loa le la finauga. Na taua e le Tina i Leoleo e fa’apea, sa ia mautinoa o lana tama na avea le tupe, ona o ia lea na sola i le ta’avale.

 

O le fiu o le Tina e taumafai e taofiofi uiga le mafaufau o lana tama, na ia talosagaina ai loa le fesoasoani a Leoleo, ma aga’i atu ai loa Leoleo ma loka le ua molia.

 

O le taeao o le aso Faraile na te’a nei na tula’i ai le tama’ita’i o Leinara Maui’a i luma o le fa’amasinoga fa’aitumalo, ma ia teena ai le moliaga mama o le fa’atupu vevesi i lona aiga.

 

O ni isi o tuutuuga ua tatala ai o ia i tua e fa’atali ai lana iloiloga lea ua fa’atulaga mo le aso 7 o Novema, 2018, e aofia ai le fa’asa lea ona ia toe solia se tulafono a le malo, pe na te toe fa’aalia fo’i ni uiga le mafaufau i lona Tina, a ia avea o ia ma tagatanu’u e usita’i i tulafono a le malo.

 

LEWIS LOKENI

 

O le ali’i e 31 tausaga le matua lea na tu’uaia i lona umia fa’asolitulafono o vaega o le fualaau fa’asaina o le aisa, ua ia ta’utino i le Fa’amasinoga Maualuga e moni ma fa’amaoni tu’uaiga fa’asaga ia te ia.

 

O le alii o Lewis Lokeni, lea na taofia mai lava i le toese talu mai le taimi na pu’e fa’apagota ai e Leoleo o ia i le masina o Iuni o le tausaga nei, na ulua’i tu’uaia i moliaga mamafa e 2 o lona umia faasolitulafono lea o vaega o fualaau o le aisa ma le mariuana.

 

Ae i lalo o se maliliega na latou sainia ma le malo, lea fo’i na talia e le fa’amasinoga i le vaiaso na te’a nei, na tali ioe ai Lokeni i le moliaga mamafa e tasi o le umia faasolitulafono lea o vaega o le pauta fa’asaina o le aisa.

 

I lona tali ioe ai i le moliaga e pei ona ta’usala ai o ia e le malo, sa ia ta’utino ai e fa’apea, i se taimi o le aso 12 o Iuni 2018, sa ia umia fa’asolitulafono ai se paipa tioata sa i ai i totonu vaega o le pauta fa’asaina o le aisa. Na taua atili e Lokeni e fa’apea, o lana gaioiga sa faia i lea aso, sa le tusa ai lea ma ala o le tulafono.

 

O loo taofia pea i le toese i Tafuna le ua molia e fa’atali ai le aso 26 o le masina nei, lea ua fa’atulaga e lau ai lana fa’asalaga.

 

O le fa’alavelave e pei ona ta’usala ai Lokeni, na afua mai ina ua aga’i atu Leoleo e saili mai o ia, ona o se poloaiga mai le fa’amasinoga, e mafua mai i le fa’alavelave lea na ‘ona ai lona atali’i e tasi le tausaga le matua ina ua ‘ona i le malosi o le pauta oona o le aisa.

 

O suesuega sa faia i le falema’i i Faga’alu fa’asaga i le atali’i a le ua molia sa ‘ona na manino mai ai, sa nofo i tafatafa o Lokeni lona atali’i i le taimi na ula ai e le ua molia le pauta o le aisa.

 

Ao aga’i atu Leoleo e saili le ua molia, sa latou vaaia ai o ia o loo nofonofo i luma o se faleoloa i Fagaima. Na vave gaioiga a Leoleo e ala i lo latou fa’aali ia Lokeni o le poloaiga a le fa’amasinoga e pu’e faapagota ai o ia, ma sauni ai loa mo le auina atu o ia i le Ofisa o Leoleo mo suesuega.

 

A o le i auina atu Lokeni mo suesuega, na muamua saili e Leoleo lona tino ina ia mautinoa na te le o umia se a’upega poo ni isi lava tulaga e ono lamatia ai le saogalemu o Leoleo. Ina ua saili e Leoleo le tino o le ua molia, sa maua i ai e Leoleo se paipa tioata ua ta’e le pito i totonu o le taga o lona ofu sa faia. I totonu o le paipa o loo i ai vaega o le pauta fa’asaina o le aisa.

 

Sa faapea fo’i ona maua i le taga o lona ofu se pepa iila sa i ai se sikaleti ua mae’a ona taai. Sa faia se suega i le sikaleti ma iloa ai, o le sikaleti mariuana sa umia e le ua molia.

 

PENIAMINA SE’ELUA

 

O le ali’i lea na ia fa’aalia i lona Tina uiga le mafaufau ma le le fa’aaloalo, ua fa’atonu e le afioga i le ali’i Fa’amasino ia Fiti Sunia e saili se isi nofoaga e nofo ai, aua ne’i toe nofo i le fale o loo nofo ai lona Tina a o fa’agasolo ai taualumaga o le mataupu e pei ona a’afia ai o ia.

 

O le vaiaso na te’a nei na pu’e fa’apagota ai e Leoleo le ali’i o Peniamina Se’elua, ina ua talosagaina e lona Tina se fesoasoani a Leoleo ona o se fa’alavelave na tula’i mai i le va o le ua molia ma lona Tina.

 

Na teena e Se’elua le moliaga mama o le fa’atupu vevesi i nofoaga faitele o loo tu’uaia ai o ia e le malo, ina ua tula’i o ia i luma o le Fa’amasinoga Fa’aitumalo i le vaiaso na te’a nei. O le ali’i loia fautua mo tagata lautele ia Ryan Anderson na tula’i mo Se’elua i lana ulua’i iloiloga, ae o le ali’i loia ia Jason Mitchell na tula’i mo le itu a le malo i lenei mataupu.

 

O le mae’a ai o le ulua’i iloiloga a Se’elua, na tatala ai loa o ia i tua e le afioga i le ali’i Fa’amasino ia Sunia e aunoa ma se tupe e totogi, i lalo o tuutuuga e ao ona ia usita’i i ai. O ni isi o ia tuutuuga e aofia ai le fa’asa lea ona ia toe fa’atupu se vevesi i totonu o lona aiga, fa’asa ona ia toe solia se tulafono, a ia avea o ia ma tagatanu’u e tausisi ma usita’i i tulafono uma a le malo. Na fa’atonuina fo’i o ia e saili se isi nofoaga e nofo ai ao fa’agasolo ai taualumaga o lana mataupu, lea ua fa’atulaga e toe fofogaina i le aso 7 o Novema, 2018.

 

Na  taua e le Tina i Leoleo e fa’apea, ina ua ia fa’atonu lana tama i feau masani, sa fa’afuase’i ona faliu atu o ia ma ee atu ia te ia. E le gata sa ia fa’aalia uiga le mafaufau ia te ia o le Tina, ae sa ia palauvale atu fo’i ia te ia. Na taua e le tuafafine a Se’elua i Leoleo e fa’apea, na avea le popole o lona Tina ina ua ia vaaia le aga’i atu o Se’elua ma le fa’amoemoe e fa’aoolima ia te ia, na mafua ai loa ona tagi lona Tina i le laupapa ma taumafai e sasa ai le ua molia ina ia puipuia ai o ia.