FA’AFEFE LONA TAMA MA LONA USO I LE NAIFI

Na pu’e fa’apagota e Leoleo se Tina e 41 tausaga le matua mai Pago Pago i le po o le aso Faraile o le vaiaso na te’a nei, ona o tu’uaiga i lona fealua’i solo lea i autafa o le latou fale ma se naifi i lona lima, faatasi ai ma lona folafola o lona ta tuiina o lona Tama ma lona uso.

O le aso Lua na te’a nei na tula’i ai Katerina Tufele i luma o le fa’amasinoga fa’aitumalo, ma ia teena ai moliaga mama e 2 ua faila e le malo fa’asaga ia te ia. O ia moliaga e aofia ai le fa’atupu vevesi i lona aiga, atoa ai ma lona umia o se a’upega mata’utia.

O le tama’ita’i loia fautua ia Anna Wells na tula’i mo Tufele i le taimi o lana iloiloga, ae o le ali’i loia sili lagolago ia Jason Mitchell na tula’i mo le itu a le malo.

O ni isi o tuutuuga ua tatala ai i tua Tufele e fa’atali ai le isi ana iloiloga i luma o le fa’amasinoga, o lona tausia lea o le filemu i totonu o lona aiga, fa’asa ona ia toe soli se tulafono, a ia auai i soo se taimi e valaau ai lana mataupu. Ua poloaina fo’i o ia e le fa’amasinoga e aua ne’i ona toe umia ni a’upega mata’utia.

E 3 ta’avale Leoleo na aga’i atu i Pago Pago ina ua talosagaina e se tasi o le aiga o Tufele le fesoasoani a Leoleo, fa’asaga i se vevesi na tula’i mai i le latou aiga. Na taua e le molimau i Leoleo e fa’apea, o se tauga upu i le va o Tufele ma lona uso, na mafua ai ona fealua’i le ua molia ma se naifi ma ia folafola ai loa lona ta tuiina o lona uso faapea ai ma lona Tama.

O le faaiuga o le masina nei lea ua fa’atulaga e toe valaau ai le mataupu a Tufele i luma o le afioga i le ali’i fa’amasino ia Fiti Sunia.

MARK ALESANA

O le ali’i lea na tatala i tua e le afioga i le ali’i Fa’amasino ia Fiti Sunia i le masina na te’a nei ma le poloaiga e aua ne’i ona toe solia se tulafono a le malo, na toe pu’e fa’apagota fo’i o ia e Leoleo i le fa’aiuga o le vaiaso na te’a nei, ona o tu’uaiga i lona fa’aoolima lea i ni tagata se to’alua, atoa ai ma lona fa’aleagaina o le fale a se aiga.

O moliaga mama 6 ua tu’uaia ai Mark Alesana e aofia ai moliaga e 2 o le faaoolima i le tulaga tolu, 2 moliaga o le faaleaga meatotino, o le faatupu vevesi i nofoaga faitele, atoa ai ma lona le usitaia o poloaiga a le fa’amasinoga.

O le vaiaso nei na tula’i ai Alesana i luma o le fa’amasinoga fa’aitumalo, ma ia teena ai moliaga fa’asaga ia te ia. O le ali’i Loia Fautua lagolago ia Ryan Anderson na tula’i mo Alesana, ae o le ali’i loia sili lagolago ia Jason Mitchell na tula’i mo le itu a le malo i lenei mataupu.

O lenei mataupu na tofu atu i le Ofisa o Leoleo i Tafuna, ina ua talosagaina e se aiga le fesoasoani a Leoleo, fa’asaga i se tagata o loo tauaiina le latou fale i ni ma’a. Na aga’i atu Leoleo ma latou vaaia ai se ali’i o loo tu i luma o le fale o le aiga na a’afia, ae tofu ona lima ma ma’a.

O le taimi lava na iloa mai ai e le ali’i lea o ta’avale a Leoleo, na ia tia’i ai loa ma’a ae alu i le atoa. E lei umi ona fai tuliga a Leoleo ma le ali’i lea ae maua, ma pu’e fa’apagota ai loa o ia. Na iloa mulimuli ai, o le ali’i na tamo’e i le atoa, o ia o Alesana.

Na taua e se molimau i Leoleo e fa’apea, na fa’ateia le latou aiga ina ua tofu atu se ma’a i totonu o le latou fale ma taei ai tioata pito i luma o le fale. Na latou aga’i mai i fafo e vaai poo ai na togia le ma’a, ae latou vaaia ai Alesana o loo tu atu i fafo ma ma’a i ona lima.

Na toe togi e Alesana le isi ma’a ma lavea ai le ali’i na a’afia, ae o le isi ma’a na toe togi ma lavea ai fo’i lona uso.

E $500 le tupe lea ua fa’atulaga e le fa’amasinoga e totogi ona fa’atoa mafai lea ona tatala Alesana i tua mai le toese i Tafuna.