Ads by Google Ads by Google

Tala otooto o Fa’amasinoga

ausage@samoanews.com

ISAIA LEI SAM

 

O le vaiaso na te’a nei na taofia fa’apagota ai e Leoleo le alii lea na oso i luma o se ta’avale ina ua tula’i mai se vevesi i le va o ia ma lana uo tama’ita’i. Na teena e Isaia Lei Sam moliaga faasaga ia te ia, ina ua tula’i i luma o le Fa’amasinoga Fa’aitumalo i le taeao o le aso Lua o le vaiaso lenei.

 

Ua toe tatala nei i tua Lei Sam e aunoa ma se tupe e totogi, e fa’atali ai le isi ana iloiloga lea ua fa’atulaga e faia i le fa’aiuga o le masina nei. O ni isi o tuutuuga ua tatala ai o ia i tua, o le fa’asa lea ona ia toe taumafai e fa’afesoota’i molimau a le malo, pe na te toe soli fo’i se tulafono, a ia avea o ia ma tagatanu’u lelei e tausisi i tulafono uma a le malo.

 

I le tagi a le malo o loo taua ai e fa’apea, o le faaiuga o le vaiaso na te’a nei na aga’i atu ai se molimau i le Ofisa o Leoleo i Fagaitua, ma ia fa’ailoa i Leoleo se ali’i na taia i se ta’avale i luma o lona fale, ma ua fa’anatinati atu nei lea ali’i i le falema’i i Faga’alu mo togafitiga.

 

O le mae’a ai ona tuuina atu i leoleo fa’amatalaga uma e fa’atatau i le fa’alavelave, e aofia ai ma le lanu o le ta’avale na tula’i mai ai le fa’alavelave, na aga’i atu ai loa Leoleo ma saili le ave ta’avale o le ta’avale na tula’i mai ai le fa’alavelave.

 

Na taua e le ave ta’avale i Leoleo e fa’apea, na fa’ateia o ia ina ua fa’afuase’i ona oso ane i luma o lana ta’avale se ali’i na taia ai loa o ia i le itu o le ta’avale. O le ali’i na taia i le ta’avale, sa talanoa ma se tama’ita’i i autafa o le auala.

 

Na taua atili e le ave ta’avale e fa’apea, na ia taofi lana ta’avale ae oso i fafo e fesoasoani i le ali’i na manu’a, ae ina ua ia vaaia tupulaga o le nu’u ua aga’i atu ia te ia, na vave ai loa ona toe oso i totonu o lana ta’avale ma sola ese loa mo lona saogalemu.

 

Na aga’i atu Leoleo i le falema’i i Faga’alu ma latou fesiligia ai le tama’ita’i na talanoa ma le ali’i na a’afia. Na taua e le tama’ita’i i Leoleo e fa’apea, o le ua molia o lana uo tama, ma sa la tau upu i autafa o le auala.

 

A o faia le la taugaupu ma le ua molia, na fa’afuase’i ona fesili atu le ua molia ia te ia poo le a sona lagona pe afai ae so’a o ia e se ta’avale. Na tali le tama’ita’i i le ua molia, e le taitai popole pe afai ae so’a o ia e se ta’avale. O se taimi laititi lava na autilo ese ai le tama’ita’i, ae fa’ateia o ia i lona fa’alogoina o se pao, ma le vaai atu i le isi itu, o loo ta’atia mai i luga o le auala le ua molia.

 

E le matuia tele manu’a na a’afia ai le ali’i ua molia. Sa fautuaina fo’i e le foma’i ia Leoleo ina ia fa’atulaga se taimi e ave ai le na a’afia e fai se siaki i lona mafaufau ina ia mautinoa ai o lo o lelei lona mafaufau.

 

TIE LOMON

 

Ua molia nei e le malo se ali’i talavou i moliaga o lona taumafai lea e osofa’i se fale o se aiga i Lauli’i i le fa’aiuga o le vaiaso na te’a nei. Na taua e le ali’i e ana le fale i Leoleo e fa’apea, na fa’ateia o ia ina ua alu atu e siaki lona fale e latalata i le mauga ina ua ia vaaia le ali’i o Tie Lomon o loo lafi mai i tua o le fale.

 

Na maua e Leoleo le ua molia i totonu o se faleoloa, ma auina atu ai loa o ia i le Ofisa o Leoleo i Fagatogo mo isi fa’atalatalanoaga. Na taua e le ua molia lona pisi e tau saili se fale e moe ai i le po, ina ua tuli ese e lona Tama o ia mai lona aiga. Sa ia teena lona taumafai e osofa’i le fale a le na a’afia.

 

Na teena e le ua molia moliaga o le taumafai e osofa’i se fale ma le faatupu vevesi i nofoaga faitele ua tuuaia ai o ia e le malo. O le fa’aiuga o le masina nei lea ua fa’atulaga e toe tula’i ai Lomon i luma o le fa’amasinoga mo le isi ana iloiloga.

 

SELENI FILO

 

Ua molia nei e le malo le ali’i o Seleni Filo i le moliaga mamafa o le ave ta’avale ao se’i lona laisene, e mafua mai i le fa’alavelave lea na maua ai e Leoleo o ia o loo ia fa’afoeina se ta’avale i le vaiaso na te’a nei.

 

Afai ae fa’amaonia e le fa’amasinoga le moliaga mamafa lea ua tu’uaia ai Filo, e ono mafai ona fa’asala o ia i se faasalaga faa falepuipui i le toese mo le umi e le silia i le 5 tausaga, pe fa’asala foi i le salatupe e le silia i le $5,000, e aofia ai ma le fa’amalosia lea ona ia tuliina o le umi e 90 aso i le falepuipui e pei ona fa’atulaga mai e le tulafono.

 

E $1,000 lea ua fa’atulaga e le fa’amasinoga e totogi ona fa’atoa mafai lea ona tatala Filo i tua e fa’atali ai taualumaga o lana mataupu.

 

O se fa’alavelave tau ta’avale na tula’i mai i Tafuna i le vaiaso na te’a nei, na mafua ai ona su’esu’e e Leoleo i lenei mataupu. Na maua i suesuega a Leoleo, o le ali’i o Filo na fa’afoeina le ta’avale na mafua ai ona tula’i mai le fa’alavelave tau ta’avale, ma i’u ina fetoa’i ai ni ta’avale se 2. E leai se isi na manu’a i lenei fa’alavelave.

 

O se tasi o tuutuuga o le nofovaavaaia a Filo na tuuina atu e le faa’masinoga i le amataga o le tausaga nei, ina ua ta’usala o ia i le moliaga o le ave ta’avale ‘ona, o le fa’asa lea ona ia toe fa’afoeina se ta’avale mo le umi e 6 masina.