IOSEFA FUIMAONO

Ua poloaina nei e le afioga i le ali’i Fa’amasino ia  Fiti Sunia le sui o le Ofisa o Femalagaaiga a le malo, ina ia saili mai le ali’i lea na tu’uina atu i lalo o le vaavaaiga a le Ofisa o Femalagaaiga, mo le toe fa’aleleia o ona pepa nofomau.

O lea poloaiga a Fiti Sunia na tu’uina atu lea i le sui o le Ofisa o Femalagaaiga ia Puni Paelo, ina ua le oo atu le ali’i o Iosefa Fuimaono i luma o le Fa’amasinoga Fa’aitumalo i le vaiaso na te’a nei mo le isi iloiloga o lana mataupu.

Saunoa Sunia e fa’apea, soo se taimi lava e tatala ai e le Fa’amasinoga se tagata o loo molia ae tuu atu i lalo o le vaavaaiga a le Ofisa o Femalagaaiga, lona uiga o le matafaioi a lena ofisa, o le mautinoa lea ia latou vaavaaia lea tagata ma ia mautinoa e toe tula’i o ia i le isi aso e toe valaau ai lana mataupu.

E lei auai Fuimaono i totonu o le potu fa’amasino ina ua valaau lona igoa mo le isi ana iloiloga i le vaiaso na te’a nei.

Na avea lea itu ma auala na fesiligia ai e Sunia le ali’i loia mai le Ofisa Fautua ia Ryan Anderson, po o fea o i ai le o lo o ia tauaveina. Ae na tali le ali’i loia, e le i toe maua lava se la feiloaiga ma Fuimaono talu mai le taimi na tatala ai o ia e le fa’amasinoga i le masina na te’a nei.

Na silasila Sunia i fa’amaumauga o loo i ona luma mo ni nai sekone, ma ia fa’ailoa mai ai loa e fa’apea, o Fuimaono lea sa tatala ma tu’uina atu i lalo o le vaavaaiga a le Ofisa o Femalagaaiga.

Na valaau e Sunia le susuga Paelo sa alala i le pito i tua o le potu fa’amasino, ina ia aga’i atu i luma e fa’amanino le tulaga e fa’atatau ia Fuimaono.

“E tusa ai ma fa’amaumauga o loo i o’u luma i le taimi nei, o Fuimaono sa tatala atu i lalo o le vaavaaga a le Ofisa o Femalagaaiga. E mafua lea tulaga ina ua maua i fa’amaumauga, na mae’a i le masina o Iuni 2017 le aoga o lona pepa e nofo ai i Amerika Samoa. O fea o i ai Fuimaono,” o le fesili lea a Sunia ia Paelo.

Na tali le ali’i Ofisa o Fuimaono sa toe tatala i tua i le mae’a ai lea o ni feutanaiga sa faia e le latou Ofisa ma lana sponsor.

E le i fiafia Sunia i le tali a le ali’i Ofisa.

“Soo se tagata e tatala atu i lalo o le vaavaaia a le Ofisa o Femalagaaiga, e tatau lava ona i ai i latou i lalo o le vaavaaiga a la outou Ofisa,” o le saunoaga lea a Sunia ia Paelo.

“O le tiute tauave lena a lo outou Ofisa o le vaavaai o le tagata lea, ae le o le tatala i tua. O lea la ua le iloa nei poo fea ua o o i ai lenei ali’i. O le fa’aiuga faigofie lava e faia e le fa’amasinoga i tagata fa’apenei ua mae’a le aoga o pepa nofomau, o le taofia lea i le toese, peita’i e le manatu le fa’amasinoga na te faia lea tulaga. O le mafua’aga lena e ala ai ona tatala atu i latou nei i lalo o le vaavaaiga a la outou Ofisa.”

Na fa’amalulu Paelo i le Fa’amasinoga e tusa ai o lea fa’aletonu.

O le aso 15 Iuni lea ua toe tolopo i ai le mataupu a Fuimaono, ma ua fa’atonuina le Ofisa o Femalagaaiga ina ia mautinoa e oo atu Fuimaono i luma o le fa’amasinoga i le aso lea. Afai e leai, o le a tuuina atu loa se poloaiga e pu’e fa’apagota mai ai o ia.

TU’UAIA SE ALI’I I LONA FA’AOOLIMA I LONA TO’ALUA

E 39 tausaga o se ali’i mai Aua na loka e Leoleo i le vaiaso na te’a nei ma molia e le malo i lona fa’aoolima lea i lona to’alua. Na fa’aalia e lea ali’i i Leoleo ina ua fesiligia o ia, o le vevesi i le va o ia ma lona to’alua na mafua mai ina ua ia masalomia o loo faia se mafutaga fa’alilolilo a lona toalua ma le isi ali’i latou te tuaoi.

O se feeseeseaiga i le va o le ulugali’i, na mafua ai loa ona faaoolima le ua molia i lona to’alua. Ua molia nei o ia i moliaga mama e lua o le faaoolima i le tulaga tolu atoa ai ma le faatupu vevesi i totonu o lona aiga.

O le aso 24 o Iuni lea ua tolopo i ai le mataupu a le ua molia, ma ua poloaina o ia e le fa’amasinoga e aua ne’i toe taumafai e fa’afesoota’i lona to’alua ma le la fanau e to’atolu, a ia saili se isi nofoaga e nofo ai mo le taimi nei, ao fa’agasolo ai taualumaga o lana mataupu.