Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

OKESENE SULUGA

 

O le ali’i e 45 tausaga le matua lea na faanofovaavaaia e le fa’amasinoga mo le 24 masina i le ogatotonu o le tausaga nei, ua toe a’afia fo’i o ia i le tulafono ina ua toe loka o ia e Leoleo i le vaiaso na te’a nei, ma tula’i ai loa i luma o le Fa’amasinoga Fa’aitumalo.

 

Na teena e Okesene Suluga moliaga mama e 4 ua tu’uaia ai o ia e le malo. O ia moliaga e aofia ai le fa’aoolima i le tulaga tolu, tete’e atu i Leoleo ao taumafai e pu’e fa’apagota o ia, tu fua i le fanua o le isi tagata, atoa ai ma le fa’atupu vevesi i nofoaga faitele.

 

O le ali’i loia fautua ia Ryan Anderson na tula’i mo Suluga ae o le tama’ita’i loia sili lagolago ia Laura Garvey na tula’i mo le itu a le malo i lenei mataupu.

 

E $1,000 le tupe na fa’atulaga e le afioga i le ali’i fa’amasino ia Fiti Sunia e tatala ai Suluga i tua. Afai ae tatala o ia i tua, ua fautuaina o ia ina ia tausisi i tulafono a le malo, fa’asa ona ia toe solia se tulafono pe taumafai fo’i e sola ese ma le atunu’u, aua fo’i nei ona toe taumafai e fa’afesoota’i molimau a le malo.

 

O loo tu’uaia e le malo ia Suluga i lona tu fa’amalosi lea i le fanua ma le fale o le aiga latou te tuaoi ma fa’aoolima i le Tamaloa o le aiga, e ala i lona ta tu’i o ona foliga ao fa’asua’ava o ia. Na faailoa e le to’alua o le ali’i na a’afia i Leoleo, e le o se taimi muamua lenei ua faia ai e Suluga amioga nei i lona to’alua, o le alu atu fasi lona to’alua i totonu o le latou fale ma le fanua e aunoa ma se fa’atanaga.

 

O le vevesi na mafua mai i le fanua o lo o nonofo ai le aiga o le ali’i na a’afia. E pei ona taua e le malo i le latou tagi, na fa’atonu e Suluga le aiga e aua ne’i toe galulue i le isi vaega o le fanua. O le aiga o Suluga e ana le fanua o loo nonofo ai le aiga na a’afia.

 

A o i ai Suluga i le toese i le tuliina o lana fa’asalaga faa falepuipui e 120 aso e aofia ai le masina o Iuni o le tausaga nei, na fa’atonu ai e le uso matua o Suluga le aiga na a’afia, e o pea latou e galulue i le fanua.

 

E magalo mai Suluga mai le falepuipui, ua toe galulue le aiga i le fanua, ae o le taimi fo’i lea ua malaga ese ai ma le atunu’u le uso matua o Suluga na faia le fa’atonuga i le aiga e galulue pea latou i le fanua.

 

O le ita tele o Suluga i le aiga, na ‘ona ai loa i le vaiaso na te’a nei, ma alu ai loa i le fale o le aiga ma fa’atino le solitulafono.

 

Ua fautuaina malosi e le afioga i le ali’i fa’amasino ia Sunia ia Suluga, e aua ne’i toe alu i le fanua poo le fale o le aiga na a’afia.

 

ELISALINA MOSESE

 

Ua fa’atonuina e le afioga i le ali’i fa’amasino ia Fiti Sunia le tama’ita’i o Elisalina Mosese ina ia usita’i i poloaiga a le fa’amasinoga o lo o tatala ai o ia i tua. Afai e toe maua o ia ua ia soli se poloaiga a le fa’amasinoga, o le a mamafa loa se fa’asalaga e tuuina atu ia te ia.

 

O le vaiaso na te’a nei na tula’i ai Mosese i luma o le fa’amasinoga, ina ua tuuina atu se poloaiga a le ali’i fa’amasino e pu’e fa’apagota mai ai o ia, e mafua mai ina ua fa’alua ona valaau lana mataupu ae lei auai o ia i totonu o le potu fa’amasino.

 

Ina ua fesiligia e Sunia ia Mosese poo fea sa i ai i masina e 2 ua mavae atu, na tali le ua molia, o ia na malaga i Tonga e asi lona Tina.

 

Na toe faamanatu e Sunia ia Mosese tuutuuga o loo tatala ai o ia i tua, e aofia ai le fa’asa lea ona ia tuua le atunu’u i soo se taimi, sei vagana o se faatonuga a le fa’amasinoga.

 

Na fa’aleaoga e le fa’amasinoga le tusi saisai na sainia e loka ai Mosese, ae ua toe fautuaina o ia ina ia usita’i i poloaiga a le faamasinoga.

 

“O lea la ua e malamalama i tuutuuga o loo tatala ai oe i tua, e le mafai ona e tuua le atunuu i lou lava loto malie, se’i vagana ua fa’ataga atu oe e le fa’amasinoga,” o le saunoaga lea a Sunia ia Mosese.

 

Na faaleaoga e le fa’amasinoga le tusi saisai ma ua tolopo le mataupu a Mosese e toe valaau i le vaiaso fou.

 

WILLIAM OTTO

 

Ua molia nei e le malo le ali’i o William Otto i le moliaga mamafa o le umia faasolitulafono o vaega o le laau fa’asaina o le aisa. Na taofi e Leoleo le ta’avale a Otto i le vaiaso na te’a nei ina ua maitauina le alu saoasaoa, ae ina siaki e Leoleo le ta’avale, na maua i ai se sikaleti mariuana ua uma ona taai o lo o teu i le vaega ta lefulefu o le ta’avale.

 

Ina ua fesiligia e Leoleo ia Otto poo le a lea sikaleti, na tali le ua molia, o le sikaleti mariuana na ia maua i le auala, ona ia tago lea ma tuu i totonu o lana ta’avale.

 

O le aso Faraile o le vaiaso nei lea ua fa’atulaga e faia ai le ulua’i iloiloga o le mataupu a Otto, ma ua fa’atulaga e le fa’amasinoga le $2,000 e totogi ona fa’atoa mafai lea ona tatala o ia i tua.