Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

VAIMAUGA FILISI

 

O le ali’i mai Mesepa lea ua fai ma ana masani le tula’i soo i luma o le fa’amasinoga, ua faanofovaavaaia nei o ia mo le 6 masina, ina ua fa’amaonia e le fa’amasinoga fa’aitumalo le moliaga o le fa’atupu vevesi i nofoaga faitele na tu’uaia ai o ia e le malo.

 

Na ulua’i tu’uaia e le malo ia Vaimauga Filisi i moliaga e 2 o le faaoolima i le tulaga tolu, tete’e atu i Leoleo ao taumafai e pu’e fa’apagota o ia, atoa ai ma le fa’atupu vevesi i nofoaga faitele. Ae i lalo o se maliliega na latou sainia ma le malo, ma malie ai Filisi e tali ioe i le moliaga o le faatupu vevesi i nofoaga faitele, ae solofua ai e le fa’amasinoga isi moliaga na totoe ai i le tagi na fa’aulu e le malo.

 

I le tali ioe ai o Filisi i le moliaga e pei ona ta’usala ai o ia, na ia ta’utino ai e fa’apea, i se taimi o le aso 29 Aperila o le tausaga nei i Mesepa, sa ia auai i se fusuaga na tula’i mai i luma o se faleoloa, lea na ia laulau vavale solo ai ma tau’ai atigi fagupia i luga o le auala.

 

Talu mai le aso na taofia ai Filisi seia oo mai i le aso na lau ai lana fa’asalaga, tusa lea ua 152 aso na taofia ai o ia i le toese.

 

Ua fa’aaoga e le fa’amasinoga le umi lea na taofia ai o ia i le toese e fai ma ana fa’asalaga i lenei mataupu. O isi tuutuuga o lana nofovaavaaia, o le fa’asa lea ona ia toe soli se tulafono pe tagofia le ‘ava malosi, a ia avea o ia ma tagatanu’u lelei e tausisi i tulafono a le malo.

 

Na fa’atoese le ua molia e tusa ai o lana solitulafono sa faia, ma ia talosagaina ai se isi avanoa mo ia, peita’i na fa’ailoa i ai e le afioga i le ali’i fa’amasino ia Fiti Sunia e fa’apea, ua uma le taimi sa tuuina atu ai avanoa mo ia, o le isi taimi e toe molia atu ai o ia i se solitulafono ma faamaonia e le fa’amasinoga, o le a tuuina atu loa se faasalaga e sili atu ona mamafa.

 

O le tausaga e 2015 na ta’usala ai fo’i e le fa’amasinoga maualuga ia Filisi i moliaga mamafa o le ave ta’avale a o se’i lona laisene faapea ai ma le tete’e atu i Leoleo a o taumafai e pu’e fa’apagota o ia.

 

FALEPUIPUI LE ALI’I NA FAAOOLIMA I LONA TO’ALUA

 

E 10 aso lea ua fa’asala ai e le fa’amasinoga fa’aitumalo se ali’i e 45 tausaga le matua, ina ua ta’usala o ia i le moliaga o lona fa’aoolima lea i lona to’alua. O lea fa’asalaga na tuuina atu e le afioga i le ali’i fa’amasino ia Fiti Sunia, ina ua manino i fa’amaumauga a le fa’amasinoga, o le fa’alua ai lea ona tausala e le fa’amasinoga lenei ali’i i lona fa’aoolima i lona to’alua.

 

O le tausaga e 2011 na nofovaavaaia ai o ia mo le 12 masina, ina ua ta’usala o ia i lona faaoolia i lona to’alua. I le tausaga e 2014, na toe ta’usala ai fo’i o ia e le fa’amasinoga fa’aitumalo i le moliaga o le faaoolima i le tulaga tolu.

 

Na fa’atoese le ua molia e tusa ai o lana solitulafono, ma ia talosagaina ai se isi avanoa e fa’aauau ai pea lana tausiga i lona to’alua ma lana fanau. Na taua e le ua molia e fa’apea, na avea lona le fiafia i auala o lo o fa’aaoga ai e lona to’alua tupe a le la aiga ma itu na tula’i mai ai le solitulafono.

 

O le ua molia, o se ali’i fagota i luga o se alia. O le po na tula’i mai ai le fa’alavelave, sa faia ai se inugapia a le ua molia ma ana uo. O le mae’a ai o le inugapia na aga’i atu ai loa le ua molia i le fale ma amata loa le vevesi ma lona to’alua, seia oo ai loa i lona fa’atinoina o le solitulafono.

 

Na faailoa e Fiti Sunia i le ua molia e fa’apea, e le toe i ai se isi avanoa e tuuina atu ia te ia pe afai ae toe molia mai o ia i se taimi o i luma i lona faaoolima i lona to’alua.

 

O isi tuutuuga o le nofovaavaaia e 12 masina a le ua molia, e aofia ai le faasa ona ia tagofia le ‘ava malosi, aua ne’i ona toe faia ni upu tau fa’amata’u i lona aiga, a ia avea o ia o se tagata e tausisi i tulafono a le malo.