Ads by Google Ads by Google

Tala otooto o Fa’amasinoga

ausage@samoanews.com

FONOTAGA JASMINE FAANU

 

O le aso 5 o Setema lea ua fa’atulaga e toe valaau ai le mataupu a Fonotaga Jasmine Faanu i luma o le fa’amasinoga maualuga, ina ua le mafai ona maua se tasi i itu e lua i le aofa’i o le tupe e tatau ona toe totogi e le ua molia.

 

O Faanu, lea sa avea ma Pule o le Ofisa a le kamupani fai auala a le McConnell Dowell, na tula’i i luma o le fa’amasinoga i le vaiaso na te’a nei mo le tolaulauina o le latou maliliega ua mae’a ona sainia ma le malo.

 

Ina ua valaau le mataupu, na faailoa e le loia a le malo ia Jason Mitchell i le fa’amasinoga e fa’apea, e ui o lea ua maea ona sainia le maliliega i le va o le malo ma Faanu, ae i ai si mataupu e le o maua i ai se tasi i itu e lua. E le i fa’ailoaina e Mitchell i le fa’amasinoga poo le a lea mataupu.

 

Na fa’aluaina e le loia a Faanu ia Richard deSaulles le folasaga a le itu a le malo, ma ia faailoaina ai loa i le fa’amasinoga le mataupu e le o maua i ai se latou tasi, o le mataupu lea e fa’atatau i le aofa’i o le tupe e tatau ona toe totogi e Faanu.

 

Na faailoa e deDaulles e faapea, ua malie Faanu na te toe totogi se vaega o le tupe, peita’i e le o le tupe atoa e pei ona tuuaia e le malo o ia sa ia gaoia mai le kamupani na galue ai.

 

Na silasila le afioga i le ali’i fa’amasino ia Elvis P. Patea i le kopi o le maliliega a le malo ma Faanu o loo i ona luma, ona ia faitauina lea o se vaega o le maliliega.

 

I se vaega o le maliliega o loo faapea mai, afai ae talia e le fa’amasinoga le tali ioe a Faanu i moliaga e 2 e pei ona malilie i ai ma le malo, ona talosaga loa lea o le malo i le fa’amasinoga, ina ia solofua moliaga e 42 o loo totoe i le tagi sa latou fa’aulu fa’asaga ia te ia.

 

Na fesili Patea i le loia a le malo poo le atoaga lea o le latou maliliega, na tali Mitchell, o lea lava.  Saunoa atili Mitchell e faapea, o le vaiaso na te’a nei lea na fa’atoa taunuu mai ai i le atunuu le pule sili o le kamupani sa malaga i fafo, ma ua faamoemoe e fesiligia o ia i sona finagalo e tusa ai o le maliliega ua mae’a ona sainia ma Faanu.

 

O le aso 5 o Setema lea ua faatulaga e toe fofogaina ai lenei mataupu i luma o le fa’maasinoga maualuga, ma o loo taofia pea Faanu i le toese ina ua le mafai ona ia totogi le $200,000 na faatulaga e tatala ai o ia i tua.

 

O loo tuuaia e le malo ia Faanu i lona ave faagaoi o se vaega tupe mai le kamupani o le McConnell Dowell sa galue ai i le aofaiga e silia i le $400,000.

 

O le auala o loo taua e le malo na faaaoga faagaoi ai e le ua molia lenei vaega tupe, o lona talaina lea o siaki e amata mai i le $4,400 le aofa’i e oo atu i le $9,986.56. O ia siaki sa fuafua e tuuina atu mo le kamupani a le Pacific Energy (PE).

 

MOLIA PAGOTA E TO’ATOLU I LE SOSOLA ESE MA LE TOESE

 

E to’atolu ni ali’i pagota o loo tuli ni a latou fa’asalaga fa’a falepuipui ua molia i le sosola ese i tua ma le toese i Tafuna i le masina o Iulai o le tausaga nei.

 

O i latou e to’atolu e aofia ai Andrew Peters, Jason Muasau ma Vatia Tugaga. O le vaiaso na te’a nei na fa’atoa faila ai e le malo le latou tagi fa’asaga i nei ali’i e to’atolu, ma molia ai loa i latou i moliaga ta’itasi o le sola ese ma le toese, o se vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala foi i le salatupe e le silia i le $5,000, poo le fa’asala fo’i i fa’asalaga uma ia e lua.

 

O lo o taua i le tagi a le malo e fa’apea, i se taimi o le aso 6 o Iulai, 2018 ao taofia ai o i latou i le falepuipui i Tafuna mo le tuliina o a latou fa’asalaga, na latou tuua ai le toese ma aga’i ese atu i fafo e aunoa ma se fa’atanaga fa’aletulafono.

 

O le vave o gaioiga a Leoleo na mafua ai ona toe maua i latou nei, ma toe fa’afo’i atu ai loa i totonu o le toese.

 

O le aso Faraile na te’a nei na tutula’i ai i latou nei e to’atolu i luma o le fa’amasinoga maualuga, ma latou fa’auluina ai tali tete’e i le moliaga e pei ona tu’uaia ai i latou e le malo. O le ao 2 Novema 2018 lea ua fa’atulaga e toe valaau ai le latou mataupu i luma o le fa’amasinoga maualuga.

 

O Peters o loo tuli sona fa’asalaga fa’a falepuipui e 5 tausaga, e mafua mai ina ua faamaonia e le fa’amasinoga le moliaga o le gaoi fa’asaga ia te ia. O Tugaga ma Muasau o loo tuli le la fa’asalaga e ta’i 27 tausaga i le falepuipui, ina ua faamaonia e le faamasinoga le moliaga o le faaoolima i le tulaga muamua sa tu’uaia ai i laua.

 

O lea faasalaga na afua mai i le faalavelave lea na la fasi fa’amo’amo’a ai se Tamaloa e 70 tausaga le matua sa nofo i luga o lana va’a faila i le 2013, lea na toeitiiti lava maliu ai o ia.