Ads by Google Ads by Google

Tala otooto o Fa’amasinoga

ausage@samoanews.com

FA’AFETAI APELU

 

E $500 lea ua faatulaga e le fa’amasinoga faaitumalo e totogi, ona fa’atoa mafai lea ona tatala le ali’i o Faafetai Apelu, lea ua tuuaia i lona faaoolima i se ali’i la te tuaoi i Fagatogo. O le vaiaso na te’a nei na taofia ai e Leoleo ia Apelu ma molia ai loa o ia i luma o le fa’amasinoga fa’aitumalo.

 

O loo tuuaia e le malo le ua molia i moliaga mama e 3 o le faaoolima i le tulaga tolu, faaleaga meatotino i le tulaga tolu, ma le fa’atupu vevesi i nofoaga faitele. O loo teena e le ua molia moliaga fa’asaga ia te ia.

 

Afai ae mafai ona totogi e le ua molia le tupe ua faatulaga e tatala ai o ia, ua fautuaina o ia e le afioga i le ali’i fa’amasino ia Fiti Sunia e aua ne’i ona toe taumafai e fa’afesoota’i le ali’i na a’afia i lenei mataupu, le ali’i lea na manu’a ina ua ia tu’iina ona foliga i le taimi o le latou inugapia.

 

O le mataupu fa’asaga ia Apelu na tofu atu i le Ofisa o Leoleo i Fagatogo, ina ua talosagaina e ni isi o le nu’u se fesoasoani mai le Ofisa o Leoleo, e mafua mai i se fusuaga na tula’i mai i totonu o le nu’u i Fagatogo i le vaiaso na te’a nei.

 

Na taua e molimau i Leoleo e fa’apea, o le vevesi na amata i se inugapia i le va o Apelu ma ni isi o ali’i e aofia ai le ali’i na manu’a i le po o le sao Tofi o le vaiaso a te’a nei.

 

O loo tuuaia fo’i e le malo le fa’aleaga e le ua molia o le telefoni feavea’i a le ali’i na a’afia, lea e silia i le $100 lona tau.

 

NOFOVAAVAAIA LE ALI’I NA FAAOOLIMA I LONA TO’ALUA

 

E 12 masina lea ua faanofovaavaaia ai e le fa’amasinoga fa’aitumalo se ali’i e 34 tausaga le matua mai Leone, ina ua faamaonia le moliaga o le faaoolima i le tulaga tolu, e mafua mai i le fa’alavelave lea na ia faaoolima ai i lona to’alua i le masina o Me o le tausaga nei.

 

Na fa’atoese le ua molia e tusa ai o lana solitulafono, ma ia talosagina ai se avanoa mai le fa’amasinoga mo ia. Na taua e le ua molia e fa’apea, na avea le ova o lona tagofia o le ‘ava malosi i le po na tula’i mai ai le fa’alavelave, ma itu na le mafai ai ona fa’atonutonu lona mafaufau, ma i’u ai loa i lona fa’aoolima i lona to’alua.

 

Sa ia fa’atoese fo’i i lona to’alua sa i ai i totonu o le potu fa’amasino e tusa ai o le fa’alavelave sa tula’i mai.

 

Na tutu fa’atasi loia a itu e lua ina ia fa’asala le ua molia i se fa’asalaga faanofovaavaaia, e aofia ai lona auai i ni aoaoga e fesoasoani ai i le fa’afitauli o le tagofia o le ‘ava malosi, atoa ai ma le fa’aauau pea o lona sauaina o lona to’alua pe a oo ina ita.

 

O ni isi o tuutuuga o le nofovaavaaia a le ua molia, o le fa’asa lea ona ia toe tagofia le ‘ava malosi, fa’asa ona ia toe faaoolima i lona to’alua, pe faia i ai ni upu tau fa’amata’u, a ia avea o ia ma tagata e tausisi i tulafono a le malo i taimi uma.

 

O aso e 45 lea na manatu le fa’amasinoga e taofia ai le ua molia i le toese, ua fa’amalumalu lona tuliina, ae o le a fa’aaoga aso e 2 na taofia ai o ia i le taimi na pu’e fa’apagota ai o ia e Leoleo e fai ma ana fa’asalaga i lenei mataupu. Ua fa’atonuina fo’i o ia na te totogi le salatupe e $125 i totonu o le ulua’i 30 aso o lana nofovaavaaia.

 

TOE A’AFIA FO’I SE ALI’I AVE PASI I LE TULAFONO

 

O le ali’i ave pasi lea na fa’atonu e le afioga i le ali’i Fa’amasino ia Fiti Sunia ina ia fa’amaoni e totogi ana sala, ua toe a’afia fo’i o ia i le tulafono, ina ua maua i fa’amaumauga a le fa’amasinoga le tele o ana sala e le i totogiina.

 

O le vaiaso na te’a nei na tula’i ai le ali’i o Mareko Alesana i luma o le fa’amasinoga fa’aitumalo, ina ua tuuina atu e le fa’amasinoga se tusi saisai e saili mai ai o ia, e mafua mai ina ua le oo atu i luma o le fa’amasinoga i le aso na valaau ai lana mataupu.

 

O le aso 14 Aokuso na faatulaga ai le mataupu a Alesana i luma o le fa’amasinoga, e mafua mai i pepa molia sa tuuina atu ia te ia, i lona le usitaia lea o tulafono i luga o le alatele.

 

E 4 pepa molia na saini e Alesana ma lana ta’utinoga, e tula’i i le aso e valaau ai lana mataupu. E ese mai i pepa molia fou ia, e $275 le sala tuai a Alesana o loo i ai i le fa’amasinoga e lei totogia.

 

Ina ua tula’i Alesana i luma o le fa’amasinoga faaitumalo i le vaiaso na te’a nei ina ua pu’e fa’apagota o ia, na faatonu ai loa e le afioga i le ali’i fa’amasino ia Sunia o ia ina ia totogi ana salatupe tuai o loo i ai i le fa’amasinoga, ona fa’atoa mafai lea ona tatala o ia i tua.

 

O le aso Tofi o le vaiaso nei lea ua fa’atulaga e toe valaau ai le mataupu a Alesana i luma o le fa’amasinoga fa’aitumalo.