Ads by Google Ads by Google

Tala otooto o Fa’amasinoga

ausage@samoanews.com

MOLIA SE ALI’I I LONA FA’AOOLIMA I LONA TO’ALUA

 

E 43 tausaga o se ali’i na loka e Leoleo i le vaiaso na te’a nei, ona o tuuaiga i lona fa’aoolima lea i lona to’alua i totonu o le la ta’avale. Ua molia e le malo lea ali’i i moliaga mama e tolu e aofia ai le faaoolima i le tulaga tolu, fa’atupu vevesi i nofoaga faitele, atoa ai ma le fa’afoe o le ta’avale ae o loo ‘ona o ia.

 

O le aso Faraile na te’a nei na tula’i ai lea ali’i i luma o le fa’amasinoga fa’aitumalo, ma ia teena ai tu’uaiga fa’asaga ia te ia. O le amataga o le masina fou lea ua fa’atulaga e toe valaau ai lana mataupu i luma o le fa’amasinoga fa’aitumalo.

 

Na talia e le afioga i le ali’i fa’amasino ia Fiti Sunia talosaga a loia mai itu e lua, ina ia tatala le ua molia i tua e aunoa ma se tupe e totogi, e fa’atalitali ai taualumaga o lona fa’amasinoga.

 

O tuutuuga ua tatala ai i tua le ua molia, e aofia ai le fa’asa lea ona ia toe taumafai e fa’afesoota’i lona to’alua i soo se auala, fa’asa ona ia toe faia ni gaioiga e save’u ai le nonofo filemu o tagata lautele, pe na te toe soliina fo’i se tulafono a le malo, a ia avea o ia ma tagatanu’u e tausisi i tulafono a le malo i taimi uma, ma auai i soo se taimi e valaau ai lana matapu. Ua fa’asa fo’i ona ia toe tagofia le ‘ava malosi.

 

O le mataupu e pei ona molia ai lenei ali’i, na alia’e mai ina ua fa’afesootai e le fafine le ofisa o Leoleo i Tafuna mo se fesoasoani. Na taua e le fafine i Leoleo e fa’apea, o le afiafi ina ua manava galuega, na alu atu ai lona to’alua ma piki mai o ia mai lana fale faigaluega i Nu’uuli, ma la aga’i atu ai loa i lo latou fale.

 

A o lei alu ese mai le ta’avale mai le fale faigaluega, sa fa’atofa mai ni isi o le aufaigaluega i le fafine. Ae na avea le toe fa’atofa mulimuli ane o le isi ali’i e faigaluega fa’atasi ma le fafine ma auala na oso ai loa le masalosalo o le loto a le ua molia, ma ia manatu ai, ai e fai se fa’anunumi a lona to’alua ma le ali’i lea.

 

I le ogatotonu o talanoaga a le ulugalii i le manava ai o galuega, na fa’afuase’i ai ona fesili le ua molia i lona to’alua, poo ai lea tamaloa na fa’atofa mulimuli atu ia te ia, ae na faailoa i ai e le fafine, o le isi lava tamaloa o le aufaigaluega.

 

Na taua e le fafine i Leoleo le ita o lona to’alua ma avavau atu ia te ia, ona e le fiafia lona loto i le auala na fa’atofa ane ai le ali’i lea ia te ia. Na fa’ateia le fafine ina ua pasasa le po a lona to’alua i ona foliga, toe sosoo atu ai ma isi po pe tolu i ona foliga ao alu pea le ta’avale.

 

Na afe le ta’avale i luma o se faleoloa i Nuuuli a o fa’aauau pea ona fa’aoolima le ua molia i lona to’alua. Na ona tu lava o le ta’avale, oso loa i fafo le fafine ma alu i le atoa i totonu o le faleoloa, ma ia fa’aaogaina ai loa lana telefoni e vili ai Leleo.

 

E le i umi se taimi ae taunu’u Leoleo ma latou talanoa ma le fafine na a’afia, mulimuli ane latou taofia faapagota loa le ua molia ae auina atu i le Ofisa o Leoleo i Tafuna mo suesuega fa’aauau.

 

A o fa’atalatalanoa e Leoleo le ua molia, sa fa’alogoina le malosi o le manogi pia sa sau mai lona tino ma lana manava

 

ALFED VIILVILI

 

O le ali’i lea na taofia mai e Leoleo mai Vaitogi i le vaiaso na te’a nei ma tu’uaia i lona taumafai lea e fa’aoolima i le uso o lona Tina, ua fa’atonu e le Fa’amasinoga Fa’aitumalo e saili se isi nuu e nofo ai, a o fa’agasolo ai taualumaga o lana mataupu.

 

O le vaiaso na te’a nei na tula’i ai Alfred Vilivili i luma o le fa’amasinoga fa’aitumalo, ma ia teena ai moliaga fa’asaga ia te ia, lea e aofia ai le fa’atupu vevesi i nofoaga faitele, faaoolima i le tulaga tolu, atoa ai ma lona faia o ni gaioiga e ono lamatia ai le saogalemu o fanau laiti.

 

O le maea ai o le ulua’i iloiloga a le ua molia i le vaiaso na te’a nei, na tatala ai loa o ia i tua e le afioga i le ali’i fa’amasino ia Fiti Sunia e aunoa ma se tupe na totogi i lalo o tuutuuga e ao ona ia usita’i i ai.

 

O ni isi o ia tuutuuga e aofia ai le fa’asa lea ona ia toe tu ona vae i le fale o lona aunty na a’afia i lenei mataupu, fa’asa ona ia toe taumafai e fa’afesootai le na aafia i soo se auala, a ia avea o ia ma tagatanuu e tausisi i tulafono a le malo i taimi uma, ma ia auai i soo se taimi e valaau ai lana mataupu.

 

O le mataupu lenei na tofu atu i le Ofisa o Leoleo i Tafuna i le vaiaso na te’a nei, ina ua logo e le na a’afia Leoleo mo se fesoasoani, i le mae’a ai lea o se fa’alavelave na tula’i mai i le va o ia ma lona nephew, le ali’i o Vilivili.

 

Na taua e le na a’afia i Leoleo e fa’apea, o le vevesi na tula’i mai ina ua ia fesiligia Vilivili poo fea lavalava ma le tupe sa ia gaoia. Na ita Vilivili ina ua fesiligia o ia e lona aunty e uiga i lea mataupu, ma ia togiina ai loa lona aunty i le atigi fagupia sa tu i ona luma. E tula’i mai le fa’alavelave ae o le taimi lea o lo o fa’asua’ava ai le ua molia.

 

O le vave o le alo a le na ‘aafia ma misi ai le togi, ae o le taimi lea o loo si’i e le na a’afia lona granddaugher e 3 masina le matua.

 

O le fefe o le na a’afia na vave ai lona oso i totonu o le potu ma lafi ai, ma ia viliina ai loa Leoleo mo se fesoasoani.

 

E lei umi se taimi ae taunu’u Leoleo ma latou fesiligia le ua molia sa nofonofo i luma o le fale e tusa ai o le mataupu, ma taofia fa’apagota ai loa o ia i le taimi na mae’a ai ona tuuina atu e le na a’afia fa’amatalaga e tusa ai o le faalavelave sa tula’i mai.

 

Na talosagaina e le na a’afia Leoleo ina ia taofia lona nephew i le falepuipui i le po lava lea, ona o popolega i le saogalemu o ia ma lona aiga.