TEENA LE TALOSAGA A MANOA NIUKAVU

Na teena e le afioga i le ali’i Fa’amasino ia Fiti Sunia le talosaga a le ali’i mai Fiti ia Manoa Niukavu, ina ia fa’aitiitia i le $30,000 le tupe e tatala ai o ia i tua, mai le aofaiga e $50,00 lea ua mae’a ona fa’atulaga e le malo.

O Niukavu, o se ali’i mai Fiti e faigaluega i le falema’i o le LBJ i le vaega o le Fa’ata, o loo tu’uaia i lona faia o amioga mataga i se tama’ita’i e 16 tausaga le matua, o ia fo’i o se tagatanu’u o Fiti.

O le aso Gafua na te’a nei na tula’i ai Niukavu i luma o le fa’amasinoga fa’aitumalo, mo le fa’atulagaina o le aso e faia ai lana ulua’i iloiloga. O le aso Tofi, Aokuso 9, 2018 i le aoauli lea ua fa’atulaga e faia ai lana ulua’i iloiloga.

O le mae’a ai ona fa’atulaga o le aso mo lana ulua’i iloiloga, na talosagaina ai loa e le loia a Niukavu ia Ryan Anderson le fa’amasinoga, ina ia fa’aitiitia le tupe e tatala ai le ua molia. Na taua e Anderson e fa’apea, o Niukavu, o se ali’i e mana’omia tele i lana galuega i le falema’i, e i ai lona aiga i Amerika Samoa, e le o se tagata fo’i e ono sola ese ma le atunu’u pe afai ae tatala i tua.

Na tete’e le loia a le malo i le talosaga a le itu tete’e, ma talosagaina ai loa le fa’atumau pea o le tupe i lona aofaiga e $50,000. Na taua e le malo e fa’apea, o mau o loo siomia ai tu’uaiga fa’asaga ia Niukavu e matuia ma mamafa, e le tatau fo’i ona tatala i tua ona o puipuiga i le saogalemu o tama’ita’i o le atunu’u.

Na talia e Sunia le fa’atuiese a le malo ma ia fa’atumauina ai loa le tupe i lona aofaiga e pei ona i ai. Saunoa Sunia e fa’apea, afai e mana’omia e le falema’i i Faga’alu le ua molia i lana galuega, e tatau ona latou saili se auala e tatala atu ai o ia i tua.

Saunoa atili le ali’i fa’amasino e fa’apea, e fai lava si matuia o tu’uaiga fa’asaga ia Niukavu. E oo foi i lana galuega o loo galue ai, o loo i ai lava fo’i faaeteetega i le mafai lea ona ia fesootai atu i tama’ita’i e aga’i atu i le falema’i.

MOLIA SE ALI’I I LE GAOI MA LE FAAOOLIMA

E 26 tausaga o se ali’i na pu’e fa’apagota mai e Leoleo mai Pago Pago i le fa’aiuga o le vaiaso na te’a nei, ona o tu’uaiga i lona fa’aoolima lea i se ali’i Filipino ae fao fa’amalosi lana tupe e $15 atoa ai ma lana telefoni feavea’i, le ituaiga o le Samsung S7 Mobile cell phone.

Na teena e le ali’i o Bernard Himphill moliaga o le faaoolima i le tulaga tolu ma le gaoi o loo tuuaia ai o ia e le malo, ina ua tula’i i luma o le fa’amasinoga fa’aitumalo i le vaiaso na te’a nei.

O le masina fou lea ua fa’atulaga e toe tula’i ai o ia i luma o le fa’amasinoga fa’aitumalo mo lana ulua’i iloiloga.

O le mae’a ai ona faia e le ua molia o le solitulafono, na vili ai loa e le ali’i Filipino le ofisa o leoleo mo se fesoasoani. Na fa’amatala e le ali’i Filipino i Leoleo e fa’apea, na fa’ateia o ia a o savali mai i luma o se faleoloa i Pago Pago ina ua valaau atu le ua molia ia te ia pe i ai sana $1 ma ia.

A o taumafai le na a’afia e se’i mai le $1 mai totonu o lana ato tupe, na fa’afuase’i ona se’i e le ua molia lana ato tupe, sosoo ai ma lona tago ua titina lona ua, ma fai atu e avatu ia te ia lana telefoni.

O le fefe tele o le ali’i Filipino na tago ai loa ma ave lana telefoni i le ali’i ua molia. O le taimi lava lea na sola ese ai loa le ua molia. O se tagata sa matamata ai i le fa’alavelave sa tupu, na ia fa’ailoa i Leoleo le igoa o le ua molia, o ia lea na faia le solitulafono.

Ina ua pu’e faapagota e Leoleo le ua molia ma fesiligia i le ato tupe ma le telefoni, sa tali le ua molia, ua uma ona ia tuuina atu i lana uo teine le ato tupe ma le telefoni. Na fiu Leoleo e saili le uo teine a le ua molia i lea po e le i maua.

MISA POO AI E FAIA LE SAKA FA’I

O se ulugali’i na misa poo ai e faia le saka fa’i o le afiafi, ma i’u ina fa’aoolima ai loa le tamaloa i lona to’alua, ma vili ai loa e le fafine Leoleo mo se fesoasoani. Na taua e le fafine i Leoleo e fa’apea, na muamua tu’i e lona to’alua lona itu i le ipu ti, soso’o ai loa ma lona ta tu’iina o ia. Sa ‘ona le ua molia i le taimi na tula’i mai ai le fa’alavelave.

O le itu e sili ona ita ai le fafine e pei ona ia taua i Leoleo, e fasi e lona to’alua o ia, ae o loo ia sii ina le la pepe e 2 tausaga le matua.

Ua tu’uaia nei e le malo le ua molia i moliaga mama e 3 o le faaoolima i le tulaga tolu, faia o gaioiga e lamatia ai le saogalemu o fanau, atoa ai ma le fa’atupu vevesi i totonu o lona aiga.

Ua toe tatala i tua le ua molia e fa’atali ai lana ulua’i iloiloga i le masina fou, ma ua poloaina o ia e aua ne’i toe alu i le fale o loo nonofo ai lona to’alua ma lana fanau, fa’asa ona ia toe taumafai e fa’afeso’ota’i lona to’alua i soo se auala, a ia avea o ia ma tagatanu’u lelei e tausi i tulafono a le malo.