IOAKIMO FELISE

Ua talia e le fa’amasinoga maualuga le talosaga a Ioakimo Felise ma lana loia fautua ia Michael White, ina ia fa’atulaga loa se aso e faia ai le fa’amasinoga autu a le ua molia, ina ua le mafai ona ausia e itu e lua se maliliega aufa’atasi e fa’amuta ai taualumaga o lenei mataupu.

O le vaiaso na te’a nei na toe valaau ai le mataupu a Felise i luma o le afioga i le ali’i fa’amasino ia Elvis P Patea.

Na faailoa e le alii loia ia White e fa’apea, ua mae’a ona la tauaaoina ma Felise mau fa’amaonia mai le malo, ma ua atagia mai ua le maua se tasi poo se maliliega e faai’u ai lenei mataupu. Ona o lea tulaga, sa talosagaina loa e White le fa’atulaga o se aso e faia ai le fa’amasinoga autu a Felise.

O Felise, lea o lo o taofia pea i le toese i Tafuna ina ua le mafai ona ia totogi le tupe na fa’atulaga e tatala ai o ia, o lo o tu’uaia i moliaga eseese e 10, e mafua mai i le fa’alavelave lea o lo o tu’uaia ai o ia, i lona faia lea o uiga mataga i se teineititi e 10 tausaga le matua i Nu’uuli.

E le o se taimi muamua lenei ua tu’uaia ai e le malo Felise i tu’uaiga faapenei. I le tausaga e 2011, na ta’usala ai fo’i o ia e le fa’amasinoga maualuga i lona faia o uiga mataga i se teineititi e 10 tausaga le matua, ma faasala ai o ia i le toese mo le umi e 28 masina, o se tasi lea o tuutuuga o lana nofovaavaaia e 7 tausaga, ina ua ta’usala o ia i le moliaga mamafa o le tagofia o itutinosa o se tama’ita’i e talavou i lalo o le tulafono.

TATALA I TUA TUTUILA ALOLU

O le vaiaso na te’a nei na faia ai le fa’aiuga a le afioga i le ali’i Fa’amasino ia Fiti Sunia, ina ia tatala i tua se ali’i sa pu’e fa’apagota mai e Leoleo mai Vaitogi i le po o le aso 2 Iuni, 2018, ona o tu’uaiga i lona faia o ni gaioiga e save’u ai le nonofo filemu o tagata lautele.

Na taofia e Leoleo ia Tutuila Alolu i le falepuipui talu mai le po o le aso 2 Iuni na pu’e fa’apagota ai o ia, ina ua le mafai ona ia totogi le tupe na fa’atulaga e tatala ai o ia i tua. O le vaiaso na te’a nei na tula’i ai o ia i luma o le Fa’amasinoga Fa’aitumalo mo le lauina o lana fa’asalaga, ma ua atoa ai fo’i le 46 o aso talu ona taofia o ia i le falepuipui i Tafuna.

Na taua e le malo le laulauvavale o Alolu i totonu o le nu’u ma fa’aumuumu, sosoo ai ma lona faia o ni folafolaga e fa’amata’u ai le saogalemu o tagata ao ova lona ‘ona, ma ia faaleagaina ai ni isi o meatotino a tagata o le nu’u.

Na molia o ia i le fa’atupu vevesi i nofoaga faitele ma le faaleaga meatotino, ae i lalo o le maliliega na latou sainia ma le malo, na tali ioe ai le ua molia i le faatupu vevesi i nofoaga faitele.

O ni isi o tuutuuga o lana nofovaavaaia e 12 masina, e aofia ai lona tuliina o aso e 46 i le toese, e aofia ai aso e 46 sa taofia ai o ia, totogi le salatupe e $100, aua ne’i ona toe tagofia le ‘ava malosi poo fualaau fa’asaina, a ia avea o ia ma tagatanu’u lelei e tausisi i tulafono a le malo.

TAAI TAUFETE’E

O le aso 28 Iulai lea ua toe tolopo i ai le lauina o le fa’asalaga a le ali’i o Taai Taufete’e, ina ia lava se taimi e iloilo ai e le fa’amasinoga fa’amaumuuga mai isi ana solitulafono na ta’usala muamua ai o ia e le fa’amasinoga.

A o faanofovaavaaia ai Taufete’e mo le umi e 12 masina, ina ua ta’usala o ia e le faamasinoga faaitumalo i le moliaga o le faatupu vevesi i nofoaga faitele i le masina o Me o le tausaga nei, na toe pu’e fa’apagota ai o ia e Leoleo i ni nai vaiaso mulimuli ane ai, ma tu’uaia i le tele o moliaga mama e aofia ai le faatupu vevesi i nofoaga faitele, faia o gaioiga e lamatia ai le saogalemu o fanau, ulufale fua i le fanua o le isi tagata, atoa ai ma le tete’e atu i Leoleo a o taumafai e pu’e fa’apagota o ia.

Na taofia pea lava Taufete’e i le toese talu mai le aso na pu’e fa’apagota ai o ia, seia oo mai i le aso Lulu o le vaiaso na te’a nei, lea na tula’i ai i luma o le fa’amasinoga mo le lauina o lana fa’asalaga. Ua toe taofia nei o ia i le toese i Tafuna seia aulia le aso 28 o Iulai lea ua toe tolopo i ai lana mataupu.

I lalo o se maliliega na sainia e Taufete’e ma le malo, na malie ai le ua molia e tali ioe i le moliaga e tasi o le faatupu vevesi i nofoaga faitele, faapea ai ma le isi moliaga o le faia o gaioiga e lamatia ai le saogalemu o fanau laiti.

I le tali ioe ai o Taufete’e i moliaga e pei ona ta’usala ai o ia, sa ia ioeina ai fo’i lona le usitaia o tuutuuga o lana nofovaavaaia e 12 masina masina, ina ua ia toe tagofia le ‘ava malosi, atoa ai ma lona soli o tulafono a le malo.

Na talosaga le malo ina ia faasala le ua molia i se fa’asalaga faanofovaavaaia e 18 masina, peita’i na tete’e i ai le afioga i le ali’i Fa’amasino ia Fiti Sunia.

Na taua e Sunia i lana saunoaga e fa’apea, “E faapefea ona tupu lenei mea, o le masina o Me o le tausaga nei na faasala ai e le fa’amasinoga Taufete’e ma faanofovaavaaia mo le 12 masina, i lalo o tuutuuga e ao ona ia usita’i i ai, e aofia ai le faasa ona toe tagofia le ‘ava malosi pe na te toe soli fo’i se tulafono. Ae o nai vaiaso mulimuli ane ai i le aso 2 Iuni, na toe loka ai o ia e Leoleo ona ua toe soli fo’i le tulafono.”

Saunoa atili Sunia e fa’apea, i le mataupu e pei ona nofovaavaaia ai Taufete’e e le fa’amasinoga, na solofua e le fa’amasinoga isi mau solitulafono e aofia ai ma moliaga e lua o le ave ta’avale ‘ona, i lalo o se maliliega na sainia ma le malo.

Ua toe taofia nei Taufete’e i le toese e fa’atali ai le aso lea ua fa’atulaga e toe tula’i ai i luma o le fa’amasinoga.