FA’AMANU KITIONA

Ua molia nei e le malo le ali’i o Fa’amanu Kitiona i se fa’alavelave na tula’i mai i le masina o Aokuso o le tausaga na te’a nei, lea o loo tu’uaia ai o ia i lona ulufale fa’amalosi i totonu o se fale i Utulei ma gaoi meatotino ae aiga.

O moliaga e tolu ua faia fa’asaga ia Kitiona e aofia ai le talepe fale i le tulaga lua ma le gaoi, o moliaga mamafa ia, atoa ai ma le moliaga mama o le tu fua i le fale poo le fanua o le isi tagata.

O le lata ai i le tausaga talu ona tula’i mai lenei fa’alavelave, o le vaiaso na te’a nei a fa’atoa pu’e fa’apagota ai e Leoleo ia Kitiona ma molia ai loa o ia i le tulafono. Ina ua tula’i Kitiona i luma o le fa’amasinoga fa’aitumalo, sa ia talosagaina ai le fa’amasinoga mo se avanoa e fa’ataunu’u ai lana ulua’i iloiloga.

E $5,000 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala o ia i tua. Afai ae mafai ona tatala o ia i tua, e i ai tuutuuga e ao ona ia usita’i i ai, e aofia ai le fa’asa lea ona ia toe taumafai e fa’afesootai molimau a le malo, fa’asa ona toe tu i le fanua ma le fale o loo tu’uaia ai o ia, fa’asa fo’i ona ia taumafai e sola ese ma le atunu’u, a ia avea o ia o se tagatanu’u e tausi i tulafono uma a le malo.

E pei ona taua i fa’amaumauga a le Fa’amasinoga e fa’apea, o le aso 11 Aokuso 2017 na logo ai e se tama’ita’i mai Utulei le Ofisa o Leoleo i Fagatogo mo se fesoasoani, e mafua mai i le fale o se tasi o a latou aiga tuao na talepe e le tagata. E tula’i mai le fa’alavelave e pei ona osofaia ai le fale, ae o lo o faigaluega le ali’i e nofo ai i le fale. O le tagata e ana le fale sa malaga o ia i fafo.

Na taua e le ali’i sa nofo i le fale ina ua fesiligia e Leoleo e fa’apea, na fa’ateia o ia ina ua manava mai i le aso 11 Aokuso i le afiafi ma ia vaaia ai lona potu ua faaleagaina solo ana meatotino i totonu. Sa ia iloa fo’i le faitoto’a o le potu ua matala, e foliga mai sa vane e se tagata.

O mea na gaoia mai totonu o le potu o le ali’i e nofo ai i le fale e aofia ai lavalava ma se tupe e $75.

O le masina lava o Aokuso ina ua fo’i mai le tagata e ana le fale mai fafo, sa ia fa’afesoota’iina ai loa Leoleo ma faailoa i ai mea totino mai totonu o lona potu ua gaoia, e aofia ai filifili, o seevae, sipika, o se telefoni ma lavalava.

Na taua atili e le tagata e ana le fale i Leoleo e fa’apea, na faamatala atu e aiga tuaoi ia te ia, sa latou vaaia le tagata e igoa ia Fa’amanu o fealua’i i tafatafa o le latou fale i le aso 11 Aokuso, 2017.

O Fa’amanu e pei ona taua e le tagata e ana le fale i Leoleo, sa nofo i le latou fale i tausaga ua mavae, peita’i e le o toe nofo o ia i le latou aiga i le taimi nei. Ua ese le nofoaga lea ua nofo ai o ia.

Na taua e se molimau i Leoleo lona vaaia o Fa’amanu o savali mai i luma o le fale ma se ato, atoa ai ma se fagu pia o loo uu i lona lima.

Na taumafai Leoleo e saili Fa’amanu mo se taimi umi, seia oo lava ina maua o ia. Ina ua fesiligia o ia e tusa ai o lenei mataupu, sa ioeina ai e le ua molia lona alu i le fale ma aveese mai le sipika ma le telefoni, peita’i na te lei aveesea isi meatotino e pei ona taua i le lisi a Leoleo.

O lo o taofia pea Kitiona i le toese i Tafuna e fa’atali ai le aso lea ua fa’atulaga e faia ai la ulua’i iloiloga.

TAISIA LEMALIE

O le aso 28 o Setema 2018 lea ua fa’atulaga e lau ai le fa’asalaga a Taisia Lemalie, ina ua mae’a ona ta’usala o ia e le fa’amasinoga i le moliaga mamafa o le umia fa’asolitulafono lea o vaega o le pauta o le aisa, i lalo o se maliliega sa latou sainia ma le malo i le vaiaso na te’a nei.

I le tali ioe ai o Lemalie i le moliaga e pei ona ta’usala ai o ia, i le aso 9 Novema 2017, na taofia ai e Leoleo lana ta’avale i luga o le alatele i Tafuna, a o galue ai o se ave taxi. Na saili e Leoleo le taga o lona ofu sa fai ma maua ai se paipa tioata o loo i ai vaega o le pauta o le aisa.

Na tautino le ua molia e fa’apea, o lana gaioiga sa faia i lea aso, sa le tusa lea ma ala o le tulafono.

O lo o taofia pea le ua molia i le toese i Tafuna, ina ua le mafai ona ia totogi le tupe e $5,000 na fa’atulaga e tatala ai o ia, e fa’atali ai le aso e lau ai lana fa’asalaga.

O Lemalie, o se tasi lea e to’atolu i ai i latou na taofia e Leoleo i le latou osofaiga sa faia i le aso 9 Novema 2017. O isi e to’alua na pu’e fa’apagota e aofia ai Cody Wood, lea o lo o taofia foi i le toese ina ua le mafai ona ia totogi le tupe e $200,000 e tatala ai o ia i tua, ma le ali’i o Steven Tuato’o, lea na sola ese ma le atunu’u ina ua tatala o ia i tua.

I le mataupu a Wood, na teena e le fa’amasinoga se talosaga na fa’aulu e lana loia, mo se avanoa e fa’aitiitia ai le tupe e tatala ai o ia i tua mai le $200,000 i se isi lava aofaiga e talafeagai ma le finagalo o le fa’amasinoga.

Na fa’avae le talosaga e fa’aitiitia ai le tupe e tatala ai Wood i tua, ona o se manaoga ia mafai ai ona alu e tausi lona Tina ua matua.

E 3 nofoaga eseese na osofa’i e Leoleo ina ua latou fa’ataunu’uina se poloaiga mai le fa’amasinoga. O ia nofoaaga e aofia ai le fale o Wood i Taputimu, lea na maua i ai se vaega tupe tele e silia i le $50,000, o le fale o Tuatoo i Alofau, lea na maua i ai se vaega o fualaau fa’asaina, atoa ai ma le ta’avale a Lemalie lea na taofi i luga o le auala i Tafuna.