TOE A’AFIA FO’I ALEKI SIFOA I LE TULAFONO

O le alii e 23 tausaga le matua lea na fa’atonu e le fa’amasinoga e aua ne’i ona toe tagofia le ‘ava malosi, a o fa’agasolo ai taualumaga o le mataupu e pei ona molia ai o ia e le malo i le masina na te’a nei, ua toe a’afia fo’i o ia i le tulafono, ina ua toe loka e Leoleo o ia i le vaiaso na te’a nei ma molia i le fa’atupu vevesi i nofoaga faitele.

Na teena e le ali’i o Aleki Sifoa le moliaga o le faatupu vevesi i nofoaga faitele fa’asaga ia te ia, atoa ai ma le tu fua i le fanua o le isi aiga. O le masina fou o Iulai lea ua fa’atulaga e toe valaau ai lana mataupu.

Na taua e le malo i le latou tagi e fa’apea, pe tusa o le itula e 11:40 i le po o le aso 21 Iuni na te’a nei, ae valaau se ulugali’i Asia i le ofisa o Leoleo i Tafuna mo se fesoasoani, ina ua alu atu Sifoa ma taumafai e gaoi le uila vilivae a le la tama sa tu i fafo o le fale.

E le i umi se taimi ae taunu’u Leoleo ma latou maua ai Sifoa i totonu o le fanua o le aiga, o loo fealua’i solo ai ma lana fagupia vailima e lei uma ona inu. E lei toe i ai lava nisi upu, ae na pu’e fa’apagota loa e Leoleo ia Sifoa ma taofia i le falepuipui.

Na taua e le ua molia i Leoleo e fa’apea, na fa’atonu o ia e le atali’i o le toeaina mai Asia e alu atu e ave ma ia lana uila. Sa ia taua atili i Leoleo, na te uo ma le atali’i o le toeaina Asia.

O ni isi o poloaiga ua tatala ai i tua Sifoa, e aofia ai le fa’asa lea ona toe alu i le fanua o le aiga, fa’asa ona ia toe tagofia le ‘ava malosi, a ia usita’i uma i tulafono a le malo.

ESAU LAULU

O le vaiaso na te’a nei na taofia ai e Leoleo se ali’i e 42 tausaga le matua, ona o tu’uaiga i lona fa’aoolima lea i se isi ali’i i totonu o se faleoloa i Leone.

Ua tuuaia e le malo ia Esau Laulu i moliaga mama e 2 o le faaoolima i le tulaga tolu atoa ai ma le fa’atupu vevesi i nofoaga faitele. Na teena e le ua molia moliaga fa’asaga ia te ia, ma ua toe tatala nei o ia i tua e fa’atali ai le aso lea ua toe tolopo i ai lana mataupu.

O le mataupu na tofu atu i le Ofisa o Leoleo i Leone, ina ua talosagaina e ni tagata sa i ai i le taimi o le fa’alavelave atoa ai ma le fa’atau oloa o le faleoloa na tula’i mai ai le vevesi se fesoasoani a Leoleo.

Na taua e molimau i Leoleo e fa’apea, o le vevesi na tula’i mai ina ua ulufale atu Laulu i totonu o le faleoloa, ae o le taimi lea ua sauni ai le ali’i na a’afia e totogi lana fa’atau i le fa’atauoloa.

Na fesili Laulu i le ali’i na a’afia poo afea e totogi atu ai lana tupe o loo nofo aitalafu ai, ae na tali i ai le ali’i na a’afia, e le sa’o le nofoaga o loo la talanoa ai, ae lelei pe a alu atu i lona fale la te talanoa fa’alelei ai.

E le i uma lelei le fa’amatalaga a le ali’i lea ae tu’i loa e Laulu ma pau ai i lalo. Sa toe tago atu Laulu ua kiki lona papatua.

Ina ua fesiligia e Leoleo ia Laulu, sa ia taua ai lona le fiafia i le fiu e tulituli le ali’i na a’afia e toe totogi atu lana tupe sa ia aitalafuina e totogi ai le inisinia sa faia lana ta’avale. Na fa’atoese le ua molia i Leoleo e tusa ai o lana gaioiga sa faia, aemaise ai lona talitonuga, sa le tatau ona ia fa’aoolima i le ali’i na a’afia.

Ua poloaina e le fa’amasinoga ia Laulu ina ia aua ne’i ona toe taumafai e fa’afesootai le ali’i na a’afia i soo se auala, ao fa’agasolo ai taualumaga o lenei mataupu.

O le ali’i na a’afia e galue o ia o se ave tasi, ae o Laulu, e faigaluega i se tasi o matagaluega a le malo.

VALAAU  MATA’U

Ua aloaia le tuuina atu e le Fa’amasino Sili o se poloaiga e pu’e fa’apagota mai ai le ali’i o Valaau Mata’u, ina ua le oo atu o ia i lana iloiloga lea sa fa’ataunu’uina i le vaiaso na te’a nei i luma o le Fa’amasinoga Maualuga.

O Mata’u na poloaina e oo atu i luma o le fa’amasinoga, e tali i tu’uaiga o lona le usita’i lea i tuutuuga o lana nofovaavaaia. O loo tuuaia e le malo ia Mata’u i lona le usitaia lea o tuutuuga o lana nofovaavaaia, ina ua faia se suega i lona tino ma maua ai, o loo ia fa’aaogaina le fualaau fa’asaina o le aisa.

O se tasi o tuutuuga o le nofovaavaaia a Mata’u e 5 tausaga, ina ua ta’usala o ia i lona umia faasolitulafono o le pauta oona o le aisa, o le fa’asa lea ona ia toe tagofia fualaau oona poo le ‘ava malosi.

O le masina o Aperila o le tausaga nei na faia ai se suega i le tino o Mata’u e sui o le Ofisa Faanofovaavaaia, ma faamaonia ai le i ai o_ le vailaau o loo i le pauta o le aisa i lona tino.

Ua faatonuina e Kruse le malo ina ia saili Mata’u ma tuuina atui luma o le fa’amasinoga.