Ads by Google Ads by Google

Tala otooto o Fa’amasinoga

ausage@samoanews.com

TIMATA ENOSA NAEA

 

O le ali’i talavou lea na tu’uaia i moliaga o le talepe fale ma le gaoi, atoa ai ma le sola i tua mai le toese ao taofia ai o ia i le Falepuipui i Tafuna, ua ia ta’utino i le Fa’amasinoga Maualuga i le vaiaso nei, e fa’amaonia tu’uaiga fa’asaga ia te ia.

 

E 3 tagi eseese na faila e le malo fa’asaga ia Timata Enosa Naea, e 20 tausaga le matua.

 

I le tagi muamua, o loo tuuaia ai e le malo ia Naea i le moliaga mamafa e tasi o le gaoi. I le tagi lona lua, o loo tuuaia ai e le malo ia Naea i moliaga e 10, lea e aofia ai moliaga mamafa e 4 o le gaoi; 1 le moliaga mamafa o le talepe fale i le tulaga muamua; 2 moliaga mamafa o le talepe fale i le tulaga lua; 1 moliaga mamafa o le sola i tua mai le toese, ma le moliaga mama e 1 o le sola ese ma leoleo.

 

I le tagi lona tolu, o lo o tu’uaia ai e le malo ia Naea i le sola ese mai le toese.

 

I lalo o le maliliega lea ua mae’a ona sainia e Naea ma le malo, ma ua talia fo’i e le fa’amasinoga, ua malie ai le ua molia e tali ioe i le moliaga o le gaoi o loo i le tagi muamua, faapea ai ma moliaga e 2 o le gaoi atoa ai ma le talepe fale i le tulaga muamua o loo i le tagi lona lua.

 

O le talia ai e le fa’amasinoga o le maliliega a le malo ma Naea, na toe talosaga ai loa le malo i le fa’amasinoga ina ia solofua uma isi moliaga o loo totoe ai i le tagi sa latou fa’aulu fa’asaga i le ua molia.

 

I le tali ioe ai o Naea i le moliaga o le gaoi mai le tagi muamua, sa ia ta’utino ai e fa’apea, i se taimi o le aso 7 Setema 2017 i Amerika Samoa, sa ia gaoia ai se  Samsung Galaxy Note 7 tablet mai se faleoloa i Nu’uuli.

 

Sa ia ta’utino fo’i e fa’apea, i se taimi o le aso 30 Oketopa, 2017, sa ia gaoia ai ni oloa e alu i le uila mai se isi fo’i faleoloa i Nu’uuli e silia ma le $100 lo latou tau aofa’i. O lea gaioiga sa ia faia sa leai sona fa’atanaga fa’aletulafono.

 

Sa ia ta’utino atili fo’i e fa’apea, i le aso 7 Novema 2017, sa ia ulufale faamalosi ai i se fale o se aiga i le po, ma ia gaoia ai le tele o oloa e aofia ai seti Televise e 2; laptop; 2 sipika; pea seevae e 4; o se ietoga; ma se Apple iPad, ma o ia oloa uma e silia i le $5,000 lo latou tau aofa’i.

 

O le tama’ita’i loia fautua ia Kate Hannaher o lo o tula’i mo Naea ae o le ali’i loia sili lagolago ia Robert Morris o lo o tula’i mo le malo.

 

O lo o taofia pea Naea i le toese i Tafuna ina ua le mafai ona ia totogi le $20,000 na fa’atulaga e tatala ai o ia i tua, e fa’atali ai le aso 13 Iuni lea ua fa’atulaga e lau ai lona fa’asalaga.

 

AVIU ASOFA TITIO

 

O le ali’i lea e to’alima i ai i latou o loo molia i faiga faasolitulafono o lo o tu’uaia na alia’e mai i le Falepuipui o Tamaiti i Tafuna (JDC) i le 2016, ua mae’a nei ona tuuina atu lana tali ioe i luma o le fa’amasinoga maualuga i le vaiaso na te’a nei.

 

Na tu’uaia e le malo le ali’i o Aviu Asofa Titio, 20 tausaga le matua i le moliaga o le faalavelave lea i le molimau a le malo. O le moliaga fo’i lea ua malie Titio e tali ioe ai.

 

I le tali ioe ai o Titio i lea moliaga, sa ia ta’utino ai e fa’apea i se taimi o le aso 8 Iuni 2016, sa ia faalavelave ai i se molimau a le malo, e ala i lona taumafai e fa’afefe o ia ina ia aua ai ne’i ona fa’ailoaina i Leoleo fa’amatalaga e tusa ai o le mataupu o loo a’afia ai ni Leoleo mai le JDC.

 

Na ta’utino atili Titio e fa’apea, e le gata sa ia fa’amata’u le molimau, ae sa ia folafola fo’i i ai, na te faia se mea leaga ia te ia ma lona Tina pe afai na te fa’ailoaina i Leoleo fa’amatalaga o le fa’alavelave sa tupu.

 

O loo taofia pea Titio i le toese i Tafuna e fa’atali ai le aso 29 Iuni lea ua fa’atulagae lau ai lana fa’asalaga.

 

O Titio, o lo o tuuaia fa’atasi ma ni Leoleo se to’afa i lenei mataupu. O ia Leoleo e aofia ai Okesene Alo; Alofagia Letuli; Olataga Wilson, ma Junior Utuga.

 

E ese mai ia Utuga lea o loo tuuaia i moliaga mama, o Alo, Letuli ma Wilson o loo tuuaia i moliaga mamafa, ma ua i luma nei o le fa’amasinoga maualuga a latou mataupu.

 

O le masina o Aperila na te’a nei na tali ioe ai Letuli ma Wilson i le moliaga o le umia fa’asolitulafono o vaega o le pauta fa’asaina o le aisa, i lalo o se maliliega sa latou sainia ma le malo ma ua talia e le fa’amasinoga.

 

O Alo, lea o loo tumau pea lona tete’e i tu’uaiga a le malo, ua fa’atulaga lana fa’amasinoga autu e faia i le fa’aiuga o le tausaga nei. O lo o tu’uaia e le malo ia Alo i moliaga e aofia ai le umia o fualaau faasaina, fa’ataga o tamaiti pagota e sosola i tua, atoa ai ma le faia o uiga mataga i se tama’ita’i sa taofia i le JDC.