Ads by Google Ads by Google

Tala otooto o Fa’amasinoga

Photograph of the front entrance of the American Samoa District Court. [SN]
[ata: SN]
ausage@samoanews.com

IOE METHODIST KUKA MIKA I TU’UAIGA A LE MALO

 

Ua ioeina e le ali’i o Methodist Kuka Mika tu’uaiga a le malo fa’asaga ia te ia, i lona le usitaia lea o tuutuuga o lana nofovaavaaia sa tuuina atu e le Fa’amasinoga Maualuga i le masina na te’a nei, o le aua lea ne’i ona toe tagofia se vaega o fualaau fa’asaina poo le ‘ava malosi.

 

O le vaiaso na te’a nei na tula’i ai Mika i luma o le Fa’amasinoga mo lana ulua’i iloiloga, e saili ai pe fa’amaonia mau a le malo ua ia le usita’i i tuutuuga o lana nofovaavaaia. Ina ua valaau le mataupu a Mika, sa ia fa’ailoa i le fa’amasinoga lona le mana’o e fa’ataunu’u lana ulua’i iloiloga, ae ua ia sauni e talia tu’uaiga fa’asaga ia te ia.

 

I lona tali ioe ai i tu’uaiga, na ta’utino ai le ua molia e fa’apea, i le masina na te’a nei ina ua fa’atoa mae’a ona lau lona fa’asalaga, sa ia tagofia ai vaega o le fualaau fa’asaina o le aisa. Ua toe taofia nei Mika i le toese i Tafuna e fa’atali ai le aso 22 Iuni lea ua fa’atulaga e tuuina atu ai le fa’asalaga a le fa’amasinoga.

 

O le masina o Tesema 31, 2017 na pu’e fa’apagota ai e Leoleo ia Mika ma tu’uaia i lona umia fa’asolitulafono o vaega o le pauta fa’asaina o le aisa, e mafua mai ina ua maua e Leoleo ia te ia se paipa tioata o loo i ai vaega o le pauta o le aisa i totonu.

 

O le masina o Aperila na te’a nei na lau ai le fa’asalaga a Mika, ina ua ia tali ioe i le moliaga o le umia faasolitulafono o vaega o le fualaau fa’asaina o le aisa, ma faanofovaavaaia ai loa o ia mo le 5 tausaga.

 

O ni isi o tuutuuga o lana nofovaavaaia, e aofia ai le faasa lea ona ia toe tagofia fualaau fa’asaina, atoa ai ma le tatala o ia i tua, ae fa’aaoga le umi e 4 masina na taofia ai o ia e faatalitali le faaiuga o lana fa’amasinoga e avea ma ana faasalaga i lenei mataupu.

 

E 4 aso talu ona tatala Mika i tua ae fa’amaonia le i ai o le vailaau oona o le aisa i totonu o lona tino, ina ua faia lana suega e sui o le Ofisa Nofovaavaaia.

 

O le ali’i Loia ia Michael White o lo o tula’i mo Mika, ae o le tama’ita’i loia sili lagolago ia Christy Dunn o loo tula’i mo le malo i lenei mataupu.

 

MANU LEFATIA

 

Ua talia e le faamasinoga maualuga le talosaga a le loia mo le malo, susuga Woodrow Pengelly, ina ia fa’aleaoga le poloaiga a le fa’amasinoga o loo tatala ai Manu Lefatia i tua, ae poloaina le taofia o ia i le toese e fa’atali ai le faaiuga o lana mataupu, e mafua mai i tuuaiga i lona le usitaia lea o tuutuuga o loo tatala ai o ia i tua.

 

Na taua e le malo e fa’apea, i le amataga o le tausaga lenei, na faila ai e le malo le moliaga mamafa o le faaoolima i le tulaga lua fa’asaga ia Lefatia, e pei ona i ai lana mataupu numera #08-18 i luma o le Fa’amasinoga Maualuga.

 

O tuutuuga o loo tatala ai Lefatia mai lana mataupu lea, ia avea o ia ma tagatanu’u lelei e tausisi i tulafono uma a le malo, ma aua ne’i ona toe solia se tulafono.

 

I le masina na te’a nei, na toe a’afia ai fo’i Lefatia i se tasi o solitulafono e pei ona tu’uaia ai o ia e le malo i le moliaga mamafa o le fa’aoolima i le tulaga muamua, lea fo’i o loo tatala ai o ia i tua ina ua ia totogi le tupe sa fa’atulaga e le fa’amasinoga.

 

O le talitonuga o le malo e pei ona finau Pengelly, o le tagi fou ua faia fa’asaga ia Lefatia, ua atagia mai ai lona le usitaia o tuutuuga na tuuina atu e tatala ai o ia i tua i le mataupu muamua.

 

Ona o le manatu o le malo e puipui le saogalemu o le atunuu lautele, na talosagaina ai loa e Pengelly le fa’amasinoga mo sana poloaiga e faaleaoga ai tuutuuga na tatala ai le ua molia i tua, a ia taofia loa o ia i le toese e fa’atali ai le aso o lona fa’amasinoga.

 

Na tete’e le loia a Lefatia ia Michael White i le talosaga a le malo. Na taua e White e fa’apea, o tu’uaiga fou e pei ona faila fa’asaga ia Lefatia, ua na o ni tu’uaiga e lei fa’amaonia e le malo.

 

Na talia e le fa’amasinoga maualuga le talosaga a le malo, ma poloaina ai loa e le afioga i le ali’i Fa’amasino Sili ia Michael Kruse le taofia o Lefatia i le toese e aunoa ma se tupe e tatala ai o ia i tua.

 

Ua poloaina fo’i e le fa’amasinoga le fa’aaogaina o le malo i lalo o le tulafono e taofia ai loa e le fa’amasinoga le tupe na totogi e tatala ai le ua molia i tua.

 

O Iuni 1 lea ua fa’atulaga e toe valaau ai le mataupu a Lefatia.