WAYNE OTTO SMITH

O le aso 22 o Iuni lea ua fa’atulaga e lau ai le fa’asalaga a se ali’i e 50 tausaga le matua, ina ua ta’usala o ia i lona faia o uiga mataga faafeusuaiga i se tama’ita’i e aiga i ai.

Na ulua’i tuuaia e le malo le susuga a Wayne Otto Smith i moliaga eseese e 17, lea e aofia ai moliaga e 3 o le faiaiga ma se tama’ita’i e laititi i lalo o le tulafono; 2 moliaga o le faia o amioga faasotoma; 6 moliaga o le tagofia o itutinosa o se tama’ita’i e le faaipoipo i ai; 3 moliaga o le faiaiga ma se tama’ita’i e aiga i ai, fa’atasi ai ma moliaga mama e 2 o le faia o gaioiga e ono lamatia ai le saogalemu o fanau laiti.

O le tausaga na te’a nei na taofia ai e Leoleo ia Smith i le falepuipui ina ua mae’a ona faila le tagi fa’asaga ia te ia, ae o le vaiaso na te’a nei na fa’atoa tula’i ai o ia i luma o le fa’amasinoga ma ia ta’utino e moni ma fa’amaoni tu’uaiga fa’asaga ia te ia.

O le ali’i loia ia Richard deSaulles o loo tula’i mo Smith ae o le tamaitai loia ia Christy Dunn o lo o tula’i mo le malo.

I le tali ioe ai o Smith i le moliaga e pei ona ta’usala ai o ia, sa ia ta’utino ai e fa’apea, i le va o le aso 1 Setema e oo atu ia Tesema 31, 2012, faapea ai ma le va o le aso 1 Iuni e oo atu i le aso 31 Tesema 2014, ma le va o le aso 1 Ianuari e oo atu i le aso 27 Mati 2015 i Amerika Samoa, sa ia fa’atinoina ai le solitulafono o le faiaiga ma se tagata e aiga i ai.

Na ta’utino Smith e fa’apea, i le taimi e pei ona taua, sa la fai’aiga ai ma lona afafine fai e 18 tausaga le matua, o ia o le tama a lona to’alua sa la nonofo i le taimi na tula’i mai ai lenei solitulafono.

Na ta’itno atili le ua molia e fa’apea, o lana gaioiga sa faia i lea aso sa le tusa lea ma ala o le tulafono.

O lo o taofia pea Smith i le toese i Tafuna e fa’atali ai le aso 22 Iuni i le itula e 9:00 i le taeao, lea ua fa’atulaga e lau ai lana fa’asalaga.

MICHAEL SENE

O le ali’i ave pasi e 28 tausaga le matua mai Nuuuli lea na tu’uaia i lona faia o uiga mataga i se tama’ita’i e 17 tausaga le matua, ua ia ta’utino i le fa’amasinoga e fa’amaonia tu’uaiga fa’asaga ia te ia.

Na ulua’i tuuaia e le malo ia Sene i moliaga mamafa e fa, lea e aofia ai le faiaiga ma se tamaitai e talavou i lalo o le tulafono, ave fa’amalosi o se isi tagata, faia o uiga faasotoma, atoa ai ma lona tagofia o itutinosa o se tama’ita’i e le fa’aipoipo i ai.

Ae i lalo o se maliliega na sainia e le ua molia ma le malo, na malie ai Sene e tali ioe i le moliaga o lona tagofia lea o itutinosa o se tama’ita’i e le fa’aipoipo i ai.

I le tali ioe ai o Sene i le moliaga e pei ona ta’usala ai o ia, sa ia ta’utino ai e fa’apea, i se taimi o le aso 31 Oketopa 2017 i Amerika Samoa, sa ia faia ai ni uiga mataga i se tamaitai e 17 tausaga le matua e ala i lona tagofia o lona itutinosa.

Na tautino atili le ua molia e fa’apea, i le aso e pei ona taua, sa ia ave ai le tamaitai na a’afia i lona fale i Nuuuli, ma ia faatinoina ai le solitulafono.

E pei ona taua e le malo i le latou tagi e fa’apea, o le tama’ita’i na a’afia i lenei mataupu sa tietie i le pasi sa galue ai Sene o se ave pasi.

O loo taofia pea Sene i le toese i Tafuna ina ua le mafai ona ia totogi le tupe e $10,000 na faatulaga e le fa’amasinoga e tatala ai o ia i tua.

O le aso 21 Iuni lea ua fa’atulaga e lau ai lana fa’asalaga.