Pago Pago - AMERIKA SAMOA

VALAAU SE TINA I LEOLEO INA UA FA'AFAIGATA LE TAMA O LE AIGA

O le taeao o Oketopa 14, 2024 na valaau ai se tina i le Ofisa a Leoleo, mo se fesoasoani ma ia fa’ailoa atu i leoleo, o ia o lo’o lalafi ma sona alo i totonu o le potu, ona ua le mafai ona fa’ato’ato’a lona to’alua.

[O le a le lomia igoa o i latou uma na a’afia faapea ma le ua molia, aua le puipuiga o fanau iti.]

E tusa ai ma fa’amaumauga a le malo, sa tau’ai solo e le tamaloa ia meafale i totonu o le potu malolo a le aiga, ona ia taumafai lea e sasa le fafine i se tama’i nofoa uga.  

O lea na sulufa’i ai le fafine ma sona alo tamaitai e ono tausaga, i totonu o le potu ma loka mai.

Ae na taumafai le tamaloa e tatala le faitoto’a o le potu i se tama’i naifi ma ta kiki le faitoto’a ma ia faapea atu i le fafine, e matala loa le faitoto’a, o le a ia (tamaloa) titinaina le fafine.

Sa fa’amaonia i su’esu’ega a leoleo e faapea, e le o se taimi muamua lea ua tupu ai se faalavelave faapenei i totonu o lenei aiga, ae o le taimi muamua lea ua valaau ai leoleo.

Ina ua taunu’u atu leoleo i le fale a lenei ulugalii, sa talosagaina e le tina ia leoleo, e o atu i totonu o le potu e latou te talanoa ai, ona o lona le fia va’ai i le tulaga ua iai lona fale ona o lona to’alua.

Sa faamatalaina e lenei tina e faapea, na sau i fafo mai i le potu, o lo’o moe lona toalua i totonu o le potu malolo.  Ma ina ua maleifua mai lona toalua, sa ia taumafai e talanoa iai e uiga i lona toe tagofia o vaega o fualaau faasaina, o mariuana.  Aua o taimi uma lava e tagofia ai e le tamaloa ia fualaau faasaina, e faapea lana amio.

Ae na avea lea ma tulaga sa matua’i le fiafia ai le tamaloa.

Sa faamatala atili e le tina e faapea, sa ia lokaina le potu na iai o ia ma si ona alo e 6 tausaga le matua.  Ma na iai se taimi na ia sau ai i fafo mai i le potu ae o lo’o moe lona toalua, ae ona o le pa’o o le lapisi, na te’i mai ai ma amata ona ta kiki solo meafale i totonu o le fale.

Sa ta’ua e le tina lona fai atu i lona toalua e soia le tau’aia solo o meafale, ae peitai, sa avea lea ma tulaga na fa’ateteleina ai le la misa.  Ma i’u ai ina u’u mai e le tamaloa se tama’i nofoa ma taumafai e ta ai le tina.

Ma na ta’ua e le tina lona toe sola i totonu o le potu ma loka mai, ae valaau loa leoleo mo se fesoasoani.

Ae o le taimi lea, sa lagona mai pea e le tina ia le pa’o solo o lona to’alua, i fafo ma taumafai e talepe le faitoto’a o le potu.

E taunu’u leoleo i le nofoaga na tupu ai le faalavelave, ae ua sola ese le ua molia.

Sa faatalanoaina e leoleo ia se alo tamaitai a le tina, e 15 ona tausaga.  O ia foi lea sa molimauina mea na tutupu.

Ma e tusa ai ma lana molimau, sa iai o ia i totonu o le potu ae ona faalogo mai i le pisa a lona tina ma le ua molia, ona ua masalomia le tagofia o le ua molia, i fualaau faasaina.

Na ta’ua foi e le molimau lona lagonaina o le palauvale a le ua molia, i lona tina ae ina ua amata ona pa’o meafale o le fale, sa ia faalogoina le sulufai o lona tina ma lona uso laititi, i totonu o le potu.

Sa ta’ua foi e le molimau le to’afilemu o mea uma mo sina taimi, pe a ma le 20 minute, ae ona ia toe faalogoina le pa’o solo o le ua molia, i totonu o le potu malolo.  Ae e sau i fafo lona tina e taofi le pa’o a le ua molia, ae ‘e’e atu iai le ua molimau.

Na ia lagonaina foi e talanoa o lona tina i se tagata, i luga o le telefoni ma le taumafai o le ua molia, e tatala le faitoto’a, ae ina ua le faamanuiaina ana taumafaiga, ona ia ‘e’e lea ma palauvale.

Sa ta’ua e le tamaitai 15 tausaga, e moni e na te le’i vaai i mea sa tutupu, ae sa ia lagonaina mea uma mai totonu o lona potu.

Na mauaina le ua molia, i se taimi mulimuli ane, o lafi i totonu o se fale tu’ufua, i tua o le latou fale.  Sa lokaina mai ai loa o ia ma aveina atu i le Ofisa a Leoleo i Tafuna.

Ina ua fa’atalanoaina e leoleo ia le ua molia, sa ia ta’ua e faapea, na amata le la misa ina ua sauni e alu i le faleoloa e faatau se vai.  Ae ia tatalaina le faitoto’a ma tau i le ili uila sa i tua o le faitoto’a, ma pa’u ai.  Ae ita ai le tina o le aiga ma o la misa ai.

Na fa’ateteleina le la misa ma ia tau’aia uma ai mea sa i luga o le laulau i lalo o le foloa o le fale.  Sa fa’amaonia e le ua molia ia lona taumafai e tatala fa’amalosi le faitoto’a, i se tamai naifi, ae e le’i matala ona ia tago loa lea i le kiki le faitoto’a ma pu ai.

Ua molia nei o ia i moliaga, e aofia ai:

Faitauga 1:  Fa’ao’olima i lona tulaga e tolu (sauaga i totonu o aiga) o se vaega ‘C’ o solitulafono mama, e mafai ona nofosala ai i aso e sefululima, po o se sala tupe i le va o le $150 ma le $300; po o faasalaga uma e lua.

Faitauga 2:  Faatupu Vevesi i totonu o le aiga (sauaga i aiga); o se vaega ‘B’ o solitulafono mama, e mafai ona nofosala i le o’o atu i le ono masina, po o se sala tupe e $500; po o faasalaga uma e lua.

E $5,000 le vaegatupe sa faatulagaina e mafai ona tatalaina ai o ia, e faatalitali ai lona faamasinoga.

FUFUSU ONA O SE TELEFONI FEAVEA'I

O le vaveao o Oketopa 6, 2024 na fa’afeso’ota’i ai e se alii ia le Ofisa a Leoleo i Tafuna, ona o se fa’alavelave na tupu i lo la va ma seisi alii, i le fale kalapu a le Bowling Sports Bar.

Na malaga atu ni taavale se lua i le nofoaga na tupu ai le misa, ma pisi mai ai le na a’afia ma le ua molia, mo le aumai uma o i la’ua i le Ofisa Leoleo i Tafuna mo le su’esu’eina.

Ae peitai, sa malaga mai le na a’afia i le ofisa a leoleo, i totonu o lana lava taavale.

Ina ua faatalanoaina le ua molia, e leoleo, sa valaaulia o ia e le na a’afia, e la te tafafao i le falekalapu.  Ma sa ia ta’ua foi lona fa’ailoa atu i le na a’afia, e leai san tupe mo se taavale e malaga atu ai i le falekalapu, ae na tali mai le na a’afia, e totogi uma e ia (le na a’afia) ia le tupe o le la tafaoga.

Ma sa ta’ua e le ua molia, na ia tu’uina atu lana telefoni, i se taimi o le po, i le na a’afia, e na te taofia.  Ae ina ua tapuni le falekalapu, sa ia fesiligia le na a’afia mo lana telefoni, ae tali mai le na a’afia, e le o ia te ia se telefoni.

Na fa’amonia e le ua molia, lona ita tele ma ia tago i le tata’e se fagu pia i se koneteine sa i fafo o le pakaga taavale.

Ae i le faamatalaga a le na a’afia, sa ia valaauina leoleo ona o le mea lea sa tupu i fafo i le pakaga o le falekalapu.  Ma na faamanino e le na a’afia, e le’i tu’uina atu e le ua molia, ia lana telefoni ia te ia (le na a’afia).  Ae peitai, sa palauvale atu le ua molia ia te ia (le na a’afia) ma ia togia le na a’afia i se fagu pia.

Na ta’ua foi e le na a’afia le tu’iina o ona foliga e le ua molia, lea na matapogia ai, ma ma’osia ai se vaega o lona tino, ina ua pa’u i lalo.

Sa malaga atu le vaega a le EMS ma su’esu’eina le tino o le na a’afia, ae e le’i maua ai se manu’a mai i le fagu lea na tata’eina e le ua molia.

Ua molia nei lenei alii 21 tausaga i moliaga, e aofia ai;

Faitauga 1:  Faatupu Vevesi i Nofoaga Faitele, o se vaega ‘B’ o solitulafono mama, e mafai ona fa’afalepuipui ai i le ono masina, po o se sala tupe e $500 po o faasalaga uma e lua.

Faitauga 2:  Fa’ao’olima i lona tulaga e tolu, o se vaega ‘A’ o solitulafono mama, e mafai ona nofosala ai i le o’o atu i le tausaga e tasi, po o se sala tupe e $1,000; po o faasalaga uma e lua.

E $500 le vaegatupe sa faatulagaina e tatalaina ai le ua molia, e faatalitali ai lona faamasinoga.