Ads by Google Ads by Google

Suesue e Leoleo le fa’alavelave i se ali’i talavou na maliu mai Pago Pago

ausage@samoanews.com

O lo o fa’agasolo i le taimi nei su’esu’ega a le Ofisa o Leoleo e tusa ai o le fa’alavelave e fa’atatau i se ali’i talavou na maua atu ua maliu mai totonu o lona fale i Pago Pago i le taeao o le aso Lua o le vaiaso nei.

 

O le ali’i ua maliu, e 18 tausaga le matua, e aoga i se tasi o aoga maualuga i le vaega 12.

 

Na taua e se Leoleo Sinia i le Samoa News e fa’apea, o lo o faagasolo i le taimi nei a latou suesuega, ma e le mafai ona vave tuuina mai se fa’amatalaga e uiga i lenei mataupu. Sa ia faamaonia mai i le Samoa News, se alii talavou na maua atu e lona aiga ua maliu mai totonu o le fale.

 

Na fesili le Samoa News poo i ai ni masalosaloga i le ono faia i ai e se tagata o se gaioiga na mafua ai ona maliu lenei ali’i. Na tali le Leoleo Sinia, “E le mafai ona ou tuuina atu ni fa’amatalaga e fa’atatau i le fa’alavelave, ona o lea fa’atoa amata suesuega a le Ofisa o Leoleo”.

 

Na toe fesili le Samoa News i le Leoleo Sinia, pe fa’amaonia ripoti o le ali’i ua maliu na pule i lona soifua, ae na toe tali fo’i le Leoleo Sinia, “E le mafai ona tuuina atu ni fa’amatalaga e tusa ai o fa’amatalaga o loo salalau solo. Ae mafai ona maua atu se ripoti mae’ae’a e tusa ai o lenei fa’alavelave i le mae’a ai o suesuega a Leoleo.”

 

Pe tusa o le itula e 7:00 i le taeao o le aso Lua o le vaiaso nei, na vaaia ai le tumu tumu o luma o le fale o le aiga i Pago Pago i ta’avale leoleo, atoa ai ma ali’i ma tama’ita’i leoleo o lo o feoa’i solo.

 

Na manatu ni isi o le afioaga, e foliga mai o se osofaiga a leoleo o lo o faia i le fale o le aiga lea, peita’i na fa’atoa manino le tulaga o le fa’alavelave ina ua vaaia le ta’avale a le EMS ua aga’i atu, ma vaaia ai loa le tino o se tagata ua si’i aga’i i totonu o le ta’avale ma auina atu loa i le falema’i.

 

Na maua le avanoa e fesiligia ai e le Samoa News le uso matua o le ali’i ua maliu e tusa ai o le fa’alavelave. Na taua e le uso matua o le ali’i ua maliu e fa’apea, pe tusa o le itula e 7:00 i le taeao, na sau ai e fafagu lona uso e sauni i le aoga. O lona uso sa moe i le latou fale o loo tu i luma tonu o le auala tele a le malo, ae o ia sa momoe ma lona Tama i le isi a latou fale e le mamao ese lava mai le auala.

 

Na fa’ateia o ia ina ua ia tatala atu totonu o le potu, o loo sisi mai le ua o lona uso i totonu o le potu. Sa ia tago atu ua tatala mai o ia i lalo ma tatala ese le maea sa nonoa i lona ua, ae logo loa lona aiga e tusa ai o le fa’alavelave.

 

Na fesili le Samoa News i le uso o le ali’i ua moliu, pe sa i ai se mea na tula’i mai ua mafua ai ona tupu lenei fa’alavelave, ae na tali le molimau, na pau tala sa fa’alogo ai ma nisi o le latou aiga, sa i ai le mea na ita ai lona uso i le po, ma vaaia ai lona featofa’i solo i mea i totonu o le fale.

 

Na taua atili e le uso e fa’apea, “E le faigofie lenei fa’alavelave ua tula’i mai i si o matou aiga. E lei leva atu fo’i ona maliu si o’u Tina, a o lea ua tula’i mai lenei fa’alavelave isi o’u uso laititi”.

 

Na taua e le uso e fa’apea, o lona uso ua maliu, o se tagata e aga malie ma fiafia e fa’auo i soo se tagata. Sa fa’ailoa atu e lona uso ua maliu ia te ia i se tasi o aso lona fa’anaunauga o loo i ai, ia i’u lelei lana aoga ma saili sana galuega e fesoasoani ai i lo la Tama i le tausiga o le latou aiga.