Ads by Google Ads by Google

Su’esu’e e Leoleo le fa’alavelave na manu’a ai se ali’i i se pulu fana


[ata: foa'i]
ausage@samoanews.com

O lo o fa’agasolo i le taimi nei su’esu’ega a le Ofisa o Leoleo e fa’atatau i le fa’alavelave lea na tula’i mai i le vaveao o le Aso Sa na te’a nei, ina ua manu’a se ali’i mai le afioaga i Leone e mafua mai i se pulufana.

 

Na fa’amaonia mai e se sui sinia o le Ofisa o Leoleo i le Samoa News, le fa’agasolo lea o suesuega a le Vaega o Leoleo Su’esu’e e uiga i lenei mataupu. E le i manatu lea ali’i sinia e tu’uina mai ni isi fa’amatalaga auiliili e tusa ai o lenei su’esu’ega.

 

Ae na taua e se molimau fa’atuatuaina i le Samoa News e fa’apea, o lo o masalomia le a’afia ai o se ali’i pagota i lenei fa’alavelave. E tusa ai o le fa’amatalaga sa tuuina mai e le molimau i le Samoa News, o lo o i ai masalosaloga e fa’apea, o se ali’i pagota na fa’atonu na te fa’ataunu’uina lenei galuega mata’utia, na sola i tua mai le toese i le po o le aso Toonai na te’a nei, ma ia aga’i atu ai loa i Leone ma fa’ataunu’u le fa’alavelave ma toe fo’i ane ai i totonu o le toese.

 

E le o manino mai i le taimi nei pe na fa’apefea ona maua e le tagata na fa’atinoina le fa’alavelave le ‘aupega e fa’aoo ai manu’a i le ali’i na a’afia.

 

Na fa’amaonia mai e se sui sinia o le falema’i i Faga’alu i le Samoa News, le fa’anatinati atu o se ali’i talavou i le falema’i mo togafitiga, ona o manu’a i lona vae e mafua mai i se fana.

 

E le i manuia taumafaiga mo se fa’amatalaga mai le Komesina o Leoleo poo nisi o ons sui sinia e tusa ai o lenei mataupu.