Ads by Google Ads by Google

Suatia le eleele fausia maota fou Fono Faitulafono Amerika Samoa

Teo,Tuaolo,Satele

[ata: foa'i]

O le fa'auia esea o ta'avale mai le alatele i lumafale o le Malaeoletalu i Fagatogo i le taeao ananafi, sa fa'atulaga ina ia fa'atautaia ai le sauniga e suaina ai le eleele mo le amatalia o le galuega o le maota fou o le Fono Faitulafono.

 

O lona tolu o vaega o lenei galuega, ua fa'atulaga lea mo le tauofoga o le fausia o le o le falefono fou, ae o lona fa'avae lea ua mae'a fausia fa'amalo lelei i le vaega lua o le galuega. O lea tala'oto'oto na fa'amanino e le tama'ita'i Fa'atonu Sili o Galuega Lautele, Faleosina Faiai Voigt ina ua tutula'i e taua'ao le fa'amaoniga a lona Ofisa o le fausaga o le Falefono fou.

 

"O le tu'uina i lalo o le falefono tuai sa tauofo ai kamupani peita'i na taua'aoina lea i le Paramount Builders i le latou tau e $135,015. Ona soso'o lea ma le taumafaiga ina ia agava'a le eleele e fa'atuina ai le falefono fou, ona e mamafa lona fausaga toe fogafalelua."

 

"E le'i faigofie ona fa'apasia le eleele mo le fausaiga o lenei falefou toe fogafale lua ae u'amea fo'i lona fausaga. E mamafa ma e tatau ona mua'i fa'amaonia le eleele i lona malo ma le mautu lelei a'o le'i pasia lea ituaiga fale e tausia i eleele fo'i e tulata i le sami toe maulalo e ono lamatia i peau malolosi ma galulolo."

 

"E fa'atolu ona taumafai e saili patino po'o le a le ituaiga fa'avae e ao ina fa'apasia ai lenei faletele. Na i'u ina tasi moemoe e fa'aaogaina ala tau toe fa'aopoopo eleele i le tulaga fale ina ia fa'amalosia atili ai le fa'avae. Ua pasia ma ua mae'a fo'i ona maimoaina e le atunu'u le galuega ua tutula'i mai ua mae'a pasia” o le folasaga lea Voigt e tusa o le fa'avae ma le vaega muamua ma le lua o le galuega lenei ma le aso na tala ai i lalo le maota fono tuai Iulai 2017.

 

Na malo le Paramount Builders i ia vaega uma e lua o le galeuga, ae iva kamupani faufale sa piki a latou pepa fa'amaumau o le galuega peita'i, e na'o le lua kamupani na toe fa'afoi mai le latou ofo, lea e taugofie ai le Paramount Builders mo le galueaina o le eleele.

 

I le tauofoga la lenei mo le fausaga o le falefono fou, ua to'aiva fo'i na avea a latou fa'amaumauga o le galuega, ae na'o le lua kamupani na taua'ao mai a latou ofo, ua toe taua'aoina nei fo'i ia paramount Builders aua e toetoe lava atoa le $8miliona le eseesega o galuega e lua.

 

O le ofo a Paramount Builders mo le galuega e $12,892,256 ae fausia mo tausaga e lua.

 

O le sui ua talia lana ata o le fausaga o le Falefono Fou o le susuga Mark Lively mai le Lively Architects. Ua fa'ailoa fo'i e Voigt, "O le galuega lenei ua na'o le fausia lava o le falefou i lona tino atoa, ae ua leai se tala e faia i le fa'atulagaina o potu ma faameaafale lea fale mo fonotaga a le Maota Maualuga ma le Maota o Sui.”

 

I lana saunoga, sa fa’afetaia ai e Kovana Lolo Moliga, le auai mai o nisi o tama o le atunu'u sa aofia fo'i i le fa'atasiga ananafi, le afioga le Tama a le Malo Aumoeualogo Te'o J Fuavai ma le afioga le Matua Togiola Tulafono ma le faletua ia MaryAnn Tulafono.

 

Sa fa'apupula e Lolo le tulaga o tupe ua maua mo le galuega. "O le $6 miliona sa maua i le fa'atauga o Pone lea na fa'aagaaga mo le fausia o lenei falefono. O le $1.5 miliona sa fa'atulaga e totogia ai le vaega lea e fa'amalosia ai le laueleele mo le galuega.

 

"O le totogi o le si'itia o tane suau'u mai le lumafale o le malae va'alele i le nofoaga fou ua i ai nei i gatai ane o le eleele o i ai le Vai Ta'ele fou o le Pala Lagoon Swimming Pool, na tu'u e fa'aalu ai le isi vaega tupe o lea lava $6 miliona mai Pone a le Malo. Le isi $3 miliona, lea ua fa'aagaaga mo auala e fa'aleleia i Fagaima ma itu na o le atunu'u."

 

Ona o sailiga na fa'ailoa mai e Lolo sa faia i le DOI ma le susuga le Faipule i le Konekeresi, ua mae'a tali mai nei le DOI ma ua fa'atulaga mai tupe ua lisia i lalo: tausaga fa'aletupe fa'asoa 2017 e $1.8 miliona, 2018 e $1.1miliona ma le tausaga fa'aletupe lea o le a savalia 2019 e $2 miliona, o lea se vaega tupe o le a fa'aagaaga e fa'atino ai le galuega lea o le falefono o le atunu'u.

 

"E le atoa i ai le tau o le galuega, ae o lo'o fa'aauau pea le galuega saili ia maua mai le totogi aofa'i o le galuega lenei. E le malolo ta'ita'i nei, e ao ina galulue pea, pe fa'asea mai le atunu'u ia te outou tama o le atunu'u, o i tatou lava e talia na mea uma, ae a o'o fo'i ina ea se galuega ua lelei ma tutula'i mai, ona tatou fiafia fa'atasi lea,” o se tala lea a le kovana.

 

Sa maua foi le avanoa e saunoa ai le sui sinia o le Matagaluega o le Initeria a le malo tele, Nikolao Pula, ma ia fa’ailoa ai nisi o tupe mo galuega tetele (CIP) i le teritori.

 

Ina ua maimoaina e ia le maota fono fou o le a fausia, sa ia fa'apea ai, "Matagofie le tatou maota, ua foliga mai o se va'a o le vateatea, ae o le mea silisili o le tomatau a le susuga le Fa'afeagaiga lea ua tima'ia ai i tatou uma, ‘E le fiafia le Atua i se tagata pala'ai, ae na'o le tagata e tau, o le auupega i le tasi lima ae fau le galuega i le tasi ona lima’."

 

I le tula'i ai o le afioga le Peresetene o le Senate Gaoteote Palaie, sa ia taumafai ai e toe fa'atepa le aofia i le Maota Fono Tuai ua le toe va'aia ma lona vaitau i taeao iloga o le atunuu na faatula'ia mai ai.

 

"O le tausaga na fausia ai o le 1973 ae na fa'ato'a faa'aogaina i le tausaga 1974. E to'aono sui o lo'o soifua mai pea o lena nofoa'iga, ma o se mea sili ona matagofie, o lo'o i ai pea se tasi o nei sui i le tatou nei nofoa'iga a le Fono Faitulafono, le afioga Tuaolo Fruean,” o se tala fiafia lea a Gaoteote, ma ia fa’ailoa ai nisi mai lea vaitau sa auai i le sauniga, le afioga le Tama a le Malo Aumoeualogo Te'o Fuavai ma le Afioga Alo Steffany ma le tofa Fofo I. F. Sunia.

 

O le suaina o le eleele sa fa'ai'u iai suaga o le taeao a tamali'i, ma sa vala'auina tagata uma i le 'aiga fiafia na tapena i ai le fono faitulafono e talimalo ai i le aoauli ananafi i le Maota o le Fono ma sa saunia fo'i le Keke e fa'amanuia ai le suaina o le eleele ma sa toto'o i ai le tina o le atunu'u, Cynthia Malala Moliga.

 

O le sauniga mamalu sa si'itia lea tatalo amata e lana susuga le Fa'afeagaiga Iasepi Ulu o le EFKAS ma lana aufaipese sa peseina vi'iga o le sauniga mamalu i le Malae o le Talu, ae o le Faife'au Toeaina Fa'amao Asalele o le Ekalesia a Iesu i Samoa, Fagatogo na saunia le upu fa'amalosi'au a'o le'i suaina le eleele ma toe tatalo e fa'ai'u ai le sauniga mamalu i le taeao ananafi.