Ads by Google Ads by Google

Solosolo manuia taotoga afioga i le kovana sili i Seattle


[ata: foa'i]

I le tauaofiaga a le Maota Maugaluega i le taeao o le aso Faraile ua te’a sa saunoa ai le afioga i le Peresitene o le Senate, Gaoteote Tofau Palaie e fa’ailoa i senetoa ua solosolo manuia le fa’atafa gasegase o le afioga i le Kovana Sili, Lolo Matalasi Moliga, i se falema’i i Seattle, le setete o Uosinitone.

 

E pei ona lipotia e le Samoa News i se taimi ua fano, sa faia le taotoga o le kovana i le lua vaiaso talu ai ma ua amata ona faia ana fa’amalosi tino - e pei ona fa’ailoa e le afioga i le Lutena Kovana, Lemanu Palepoi Sialega Mauga i le fonotaga a le kapineta.

 

O le aso 14 o Mati sa malaga ai Gaoteote i Amerika e asia le kovana i le tulaga o lona gasegase ma sa toe taliu mai i le po o le aso Tofi o le vaiaso ua te’a. Ae o le aso Faraile sa saunoa fa’ailoa ai e Gaoteote tulaga o lana malaga ma le asiasiaga i le kovana.

 

“O lo’o momoli mai alofaaga o le afioga i le kovana i le mamalu o le Fono [Faitulafono], ae maise a outou afioga [i senetoa], e pei ona ou asia le falema’i ma momoli ai fo’i lo outou finagalo,” o le saunoaga lea a Gaoteote i le tauaofiaga a le Maota Maualuga i le aso Faraile ua te’a. “O le tatalo ma le nofo tapua’i, ia alofa le Atua, ia atoatoa lona malosi, fa’apena ona agalelei le Atua, po o a fa’aletonu o le tino, mana’omia le Atua, o le foma’i sili.”

 

Saunoa atili le afioga i le Tamaitai o le Ao e fa’apea, o le “agaga fiafia sa maua le avanoa e talanoa ai foi i le kovana” i le fale’mai.

 

“Ia ua amata ona fa’asolosolo lelei. Ua le o toe i ai i le potu o le ICU, ae ua alu i le potu e tapena i ai lana talavai ae maise foi o le fai i ai o galuega a foma’i. O le agaga fiafia lena ma le agaga fa’afetai ina ua maua foi tala fiafia,” o se vaega lea o le saunoaga a Gaoteote.

 

“Ua talanoa mai [le afioga i le kovana] ma ua fa’afetai mai. Ua uma foi ona momoli i ai le tatou ‘card’, e momoli atu ai o tatou alofaaga ma le tatalo a le Fono Faitulafono, ae maise foi le atunu’u ma le faigamalo, ia alofa le Atua, fa’aatoatoa le malosi, tatou feiloai manuia i se aso o muamua i lona agalelei,” o le fa’aiuga lea o le saunoaga a le Peresitene o le Senate.

 

Sa iloga le fiafia o afioga i senetoa i lenei tala matagofie, ma talosaga Gaoteote i afioga i Senetoa ae maise le atunu’u lautele, ina ia fa’aauau pea tatalo mo le afioga i le kovana.