Ads by Google Ads by Google

Solofua tagi na faila fa’asaga i Leoleo e to’alua Toese i Tafuna

ausage@samoanews.com

O le vaiaso na te’a nei na solofua ai e le Fa’amasinoga Fa’aitumalo tagi sa fa’aulu e le malo fa’asaga i Leoleo e to’alua sa galulue i le Toese i Tafuna. O tagi sa faia fa’asaga i Leoleo ia e to’alua, na afua mai i le fa’alavelave lea na sola ai se ali’i pagota i tua mai le toese i Tafuna i le vaveao o le aso 12 o Aokuso, 2018, ma ia fana se ali’i i Leone i se a’upega mamafa.

 

O le tagi sa faia fa’asaga i le tama’ita’i Leoleo ia Viopapa Vitolio, na solofua ina ua talia e le afioga i le ali’i Faamasino ia Fiti Sunia se talosaga a le malo, ina ia fa’aleaoga le tagi sa faia fa’asaga ia te ia. Ae o le tagi sa faia fa’asaga i le ali’i Leoleo ia Toloa Koowaiyou, na solofua ina ua le mafai e le malo ona tu’uina atu ni a latou mau e lagolago ai le latou tagi fa’asaga i lea ali’i.

 

MATAUPU A VITOLIO

 

O le aso Tofi o le vaiaso ua te’a na fa’atulaga ai le isi iloiloga a Vitolio i luma o le fa’amasinoga fa’aitumalo, mo le moliaga mama o lona fa’aleaga lea o faamaumauga a le malo o lo o tu’uaia ai o ia.

 

O lea moliaga na afua mai i le taimi a o galue Vitolio i le toese o se tasi e faia faamaumauga a le Toese mo gaioiga uma e fa’atino e ali’i ma tama’ita’i Leoleo. O loo tu’uaia e le malo ia Vitolio i lona faia o suiga i fa’amaumauga a le Toese i le vaveao na sola ai i tua le ali’i pagota ia Manu Lefatia.

 

O ia faamaumauga e aofia ai lona tusia i lalo o api faamaumau a le Toese, e ta’i 30 minute ma alu le siaki a Leoleo i totonu o le lotoa atoa o le Toese, e siaki ma faitau poo atoa pagota i totonu o latou sela.

 

I fa’amatalaga na maua e Leoleo Suesue, e le moni ia fa’amaumauga, e leai fo’i ni siaki sa faia i le vaveao o le aso 12 o Aokuso, 2018. Na gata lava le siakiina o pagota i le itula e 11:00 i le po o le aso 11 o Aokuso, fa’atoa toe faia lava le isi siaki i le itula e 3:30 i le vaveao na sola ai i tua le pagota, ina ua talosagaina le faia o se siaki e fa’amaonia ai o loo i ai Lefatia i totonu o lona sela.

 

Ina ua valaau le mataupu a Vitolio, na talosaga ai loa le loia a le malo ia Woodrow Pengelly i le fa’amasinoga, ina ia solofua le tagi sa latou fa’aulu fa’asaga i le tama’ita’i Leoleo.

 

Na talia e Sunia le talosaga a le malo, ma faia ai loa le faaiuga e solofua ai le tagi sa tu’uaia ai Vitolio.

 

O le ali’i loia tua ia Richard deSaulles na tula’i mo Vitolio i lenei mataupu.

 

MATAUPU A KOOWAIYOU

 

O Koowaiyou na tula’i i le taeao o le aso Tofi na te’a nei i le fa’amasinoga fa’aitumalo mo lana ulua’i iloiloga.

 

O le ali’i loia fautua mo tagata lautele ia Ryan Anderson na tula’i mo le ua molia, ae o le ali’i loia sili lagolago ia Woodrow Pengelly na tula’i mo le itu a le malo.

 

Na tu’uaia e le malo ia Koowaiyou i le moliaga mamafa e tasi o lona faia lea o ni gaioiga fa’asolitulafono. Na tuuaia e le malo le ua molia i lona lagolagoina lea o gaioiga sa faia i le toese e ufiufi ai le sola i tua a le ali’i pagota o Lefatia.

 

I le taimi o le ulua’i iloiloga, na valaau ai e le malo le ali’i Leoleo Suesue ia Det. Justin Thomsen e molimau e fa’atatau i le suesuega sa ia fa’atinoina e uiga i lenei mataupu.

 

I le molimau a Det. Thomsen, sa ia taua ai lona fesiligia o ni isi o Leoleo sa galulue fa’atasi ma Koowaiyou i le toese, ma latou taua ai le galulue fa’atasi o Koowaiyou ma le isi ali’i Leoleo o loo molia fo’i i lenei mataupu ia Mosese Lomu e ufiufi le mataupu na sola ai i tua Lefatia.

 

Ina ua fesiligia e Leoleo ia Koowaiyou, sa ia teena ai lona taumafai e faia lea tulaga, ae ina ua toe fesiligia fa’alua o ia, sa ia ta’utino ai loa i Leoleo, e sa’o sa talanoa atu le ali’i Ta’ita’i ia Lomu ina ia tasi le latou tala e fa’amatala i Leoleo, o Lefatia sa i totonu lava o lona sela e le i sola i tua.

 

E ui i le finau atu o le malo e lagolago le latou tagi fa’aaga ia Koowaiyou, peita’i na saunoa Sunia e fa’apea, e le o lava mau a le malo e lagolago ai le latou tagi fa’asaga i le ua molia. Ona o lea tulaga, na solofua ai loa e le fa’amasinoga le tagi sa faila fa’asaga ia Koowaiyou.