Ads by Google Ads by Google

Solofua le moliaga o le sola i tua mai le Toese fa’asaga i le isi ali’i pagota

ausage@samoanews.com

Ua solofua e le Fa’amasinoga Fa’aitumalo le moliaga mamafa o le sola i tua mai le Toese i Tafuna sa tu’uaia ai le ali’i pagota o Falaniko Fetoai, ina ua le mafai e le malo ona latou tuuina atu ni mau e lagolago ai le latou tagi fa’asaga i lenei ali’i.

 

O le susuga a Fetoai, o ia lea e to’alima (5) i ai ali’i pagota na tu’uaia e le malo i le moliaga mamafa e tasi o le sola i tua mai le Falepuipui, e mafua mai i se fa’alavelave na tula’i mai i le masina na te’a nei, lea na tu’uaia ai i latou i lo latou tuua lea o le Toese e aunoa ma se fa’atanaga fa’aletulafono.

 

Ae i le mae’a ai o le ulua’i iloiloga o lenei mataupu sa faia i le vaiaso na te’a nei, na tuuina ai ai loa le fa’aiuga a le afioga i le ali’i Fa’amasino ia Elvis P. Patea, e le fa’amaonia le moliaga fa’asaga ia Fetoai, se’i vagana ai isi alii pagota e to’afa (4) ua tofu atu nei la latou mataupu i luma o le Fa’amasinoga Maualuga.

 

O i latou ia e to’afa e aofia ai Elliott Siaumau Jr ma lona uso o Thomas Siaumau; o le susuga a Pati Lepou faapea ai ma le ali’i o Gabriel Poe Tinai. O lo o molia i latou ta’ito’atasi i le moliaga o le sola ese mai le toese.

 

O le alii loia fautuaga lagolago ia Bob Stuart na tula’i mo i latou nei, ae o le ali’i loia sili lagolago ia Jason Mitchell na tula’i mo le malo i le taimi o le ulua’i iloiloga o lenei mataupu.

 

E leai se tupe ua fa’atulaga e le Fa’amasinoga e tatala ai i latou nei i tua, ona o lo o taofia uma i latou i totonu o le Toese mo le tuliina o a latou fa’asalaga.

 

E to’atasi le molimau na valaau e le malo i le taimi o le ulua’i iloiloga sa faia i le vaiaso na te’a nei, o le susuga lea i le ali’i Leoleo Suesue ia Det. Toia Levao, o ia fo’i lea na autu i ai le suesuega o lenei mataupu.

 

Na taua e Det. Levao i lana molimau e fa’apea, i le taeao o le aso 19 o Oketopa, 2019, na logoina ai o ia fa’atasi ai ma se vaega to’atele o Leoleo, ina ia latou aga’i atu i le nofoaga autu o le Toese, mo le suesueina o le mataupu e fa’atatau i ni pagota se toalima ua sosola ese mai totonu o le sela sa loka ai i latou.

 

Na taua e Leoleo o le Toese sa tiute i le po lea e fa’apea, na faatoa latou iloaina ua i ai le fa’alavelave ua tupu, ina ua latou aga’i atu e faitau le aofa’i o pagota o loo i totonu o le Toese, ma latou iloa ai loa ua leai uma ali’i pagota e to’alima sa loka i totonu o le Sela #18 i totonu o le nofoaga o le Bravo unit.

 

Na taua e Det. Levao e fa’apea, ina ua molimauina e Leoleo o le Toese le tulaga e pei ona masalomia, sa latou toe aga’i mai ai loa ma toe amata atu le faitauga o pagota uma lava o loo taofia i totonu o le Toese, atoa ai ma le siaki uma o vaega eseese o le Toese faapea ai le lotoa atoa, ina ia mautinoa e leai se vaega e misi i le latou faitau.

 

Na toe faagasolo le faitauga faalua o pagota ma i le toese ma faamaonia ai lava, e le o i ai alii pagota e to’alima sa taofia i totonu o le sela #18.

 

O le taimi lea na logoina ai loa e Leoleo o le Toese sa tiute le latou Ta’ita’i Uati e tusa ai o le fa’aletonu ua tula’i mai, ma logoina ai loa le Ofisa autu o Leoleo i Fagatogo.

 

E tusa ai o ni fa’amatalaga na tuuina atu e Leoleo o le Toese ia Det. Levao e uiga i lenei mataupu, sa latou taua ai e fa’apea, a o fa’agasolo la latou suesuega i totonu o le lotoa o le Toese, sa latou mauaina ai se vaega o le pa o loo siomia ai le Toese ua masae.

 

I lea vaega o le pa ua masae poo se pu fo’i, e mafai ona ofi ai se tagata i totonu ma ulufale atu ai i fafo. O iina lea na masalomia na ui atu ai ali’i pagota i le taimi o le latou sola’aga.

 

E pei ona taua atili e le malo i le latou tagi e fa’apea, o se tagatanu’u na ia vaaia se tasi o pagota nei i se nofoaga faitele, na ia logoina ai loa le Ofisa o Leoleo ma mafua ai ona fesiligia le Toese i Tafuna ina ia siaki le sela o loo loka ai pagota nei pe fa’amaonia o lo o i ai lava i latou.

 

I se taimi o le po o le aso lava lea a o faagasolo pea suesuega i Leoleo o le Toese, na faafuase’i ai ona vaaia le ali’i pagota o Elliott Jr ua savali atu i le Faitoto’a tele e ulufale atu ai i totonu o le Toese.

 

E le i umi ona ulufale atu Elliott Jr i totonu o le faitoto’a tele lea, ae vaaia loa fo’i e Leoleo o le Toese le aga’i atu o isi ali’i pagota e to’atolu e pei o Thomas, Tinae ma Lepou.

 

Na siaki e Leoleo o le Toese alii pagota uma ia e to’afa mo ni a’upega ma ni fualaau fa’asaina, ma fa’amaonia ai, e leai ma se mea sa maua i se tasi o i latou nei. A o ta’ita’i atu e Leoleo ia le ali’i pagota o Elliott Jr e toe momoli i totonu o lona sela, sa faafuase’i ona vaaia le ali’i pagota o Fetoai o lo o oso mai i vaega pogisa i totonu lava o le Toese.

 

Ina ua fesiligia e Leoleo o le Toese ia le ali’i pagota o Elliott Jr poo fea sa alu i ai, ae na tali le ua molia o ia na alu i le latou fale i Peseta e su’e lona uso o Thomas poo fea ua alu i ai. Ina ua toe fo’i mai, sa piki mai o ia e se ta’avale ma momoli sa’o mai lava o ia i luma o le faitoto’a e ulufale ai i totonu o le Toese.

 

Na fesili le loia fautua ia Stuart i le molimau, poo fea na maua ai le ail’i pagota o Fetoai, poo fafo o le pa o le Toese poo totonu. Na tali le molimau, o totonu o le lotoa i le vaega pogisa na maua ai le susuga a Fetoai.

 

Na finau le loia a le malo ina ia faamaonia le latou tagi tusitusia faasaga i alii pagota uma nei e toatolu, ma ia tofu atu loa lenei mataupu i luma o le Fa’amasinoga Maualuga e fa’agasolo ai fa’amasinoga a i latou nei e to’alima.

 

Peita’i ina ua mae’a ona suesue ma iloilo e le afioga i le ali’i Fa’amasino ia Patea mau uma sa folasia e le malo, na faai’uina ai loa, e le faamaonia le tagi faasaga ia Fetoai, o lona sola ese lea mai le totonu o le Toese.

 

Saunoa Patea e fa’apea, o lo o manino i le molimau a le ali’i Leoleo Suesue ia Det. Levao, o Fetoai na oso mai i le vaega pogisa i totonu lava o le lotoa o le Toese i Tafuna, se’i vagana ai isi ali’i pagota e toafa, o i latou uma ia na savavali atu i le faitoto’a e ulufale atu ai i totonu o le Toese.

 

O le masina fou o Tesema lea ua fa’atulaga e toe valaau ai le mataupu fa’asaga i ali’i pagota e to’afa, i le mae’a ai lea ona latou teena o le tagi a le malo fa’asaga ia tei latou i le vaiaso na te’a nei, ina ua tofu atu le latou mataupu i luma o le Fa’amasinoga Maualuga.