E silia laititi lava i le 2 itula na iloilo ai e ali’i ma tama’ita’i iloilo iuga mau fa’amaonia o le tagi a le malo fa’asaga ia Iosefa Alo, ae latou tu’uina mai loa le fa’aiuga e le fa’amaonia le moliaga sa tu’uaia ai o ia.

O lea fa’aiuga na fa’avae mai lea i luga o le leai o ni mau fa’amaonia na tuuina atu e le malo e lagolago ai le moliaga mamafa o le tufatufa atu lea e Alo o fualaau fa’asaina o le aisa i fanau aoga.

O le ali’i Loia Fautua lagolago ia Rob McNeill na tula’i mo Alo, ae o tama’ita’i loia sili lagolago e to’alua ia Christy Dunn ma Laura Garvey na tula’i mo le malo.

E ui i le tumau pea o le malo i le latou fa’afinauga maumaututu o Alo na tuuina le paipa tioata sa i ai le pauta o le aisa i le ali’i aoga o C.K, peita’i na osofa’i e le itu tete’e lea fa’afinauga ma latou fesiligia ai le le fa’amaoni o nisi o molimau a le malo i le taimi na faia ai a latou molimau.

I le mae’a ai o masina e 14 sa taofia ai o ia i le toese i Tafuna e fa’atali ai se faaiuga o lana mataupu, o le vaiaso na te’a nei na tatala ai i tua Alo, ma ua avea nei o ia o se tagata sa’oloto.

O loimata o le fiafia sa vaaia i nisi o le aiga o Alo sa latou tapuaia lona fa’amasinoga, ina ua lau mai le fa’aiuga e le nofosala o ia i le moliaga sa tu’uaia ai o ia e le malo.

FA’AFINAUGA FA’AI’U

I lana faafinauga faai’u a o lei tuuina atu le mataupu e iloilo e ali’i ma tama’ita’i iloilo iuga, na toe fa’amanatu ai e le tama’ita’i loia ia Garvey le fa’amatalaga a le loia a Alo ia McNeill, faapea e tasi lava le mataupu o loo finauina i luma o le fa’amasinoga, poo ai le tagata sa ia tuuina le paipa sa i ai le pauta o le aisa ia C.K.

“Ou te ta’utino atu ma le fa’amaoni, e tusa ai o molimau ua folasia e le malo, o Alo na tuuina atu le paipa ia C.K,” o le fa’afinauga lea a Garvey.

Na taua e Garvey e fa’apea, e le o tete’e Alo i mau sa folasia e le malo e fa’apea, o le aso 6 o Oketopa, 2017 na alu ai C.K ma le paipa e i ai le pauta o le aisa i le aoga maualuga a Tafuna, o le aso fo’i lea na maua ai e le Leoleopo le paipa i totonu o le ato aoga a C.K, ma mafua ai loa ona tuuina atu lenei mataupu i Leoleo.

Na faailoa e Garvey i le vaega iloilo iuga le molimau tauto a C.K, lea sa ia taua ai i luga o le nofoa molimau le tuuina atu lea e Alo o le paipa ia te ia ao la eva i le fale o Alo i  Lauli’i i le po o le aso 5 o Oketopa.

“Aua la ne’i faaseseina outou i le fa’afinauga a le itu tete’e faapea e leai ni mau faamaonia e lagolago ai le matou tagi. O lea ua molimau C.K i le mea sa tupu, o le isi lena mau fa’amaonia o lenei mataupu,” o le fa’afinauga lea a Garvey.

Sa ia faamanatu fo’i i le vaega iloilo iuga molimau a Leoleo sa gafa ma le suesueina o lenei mataupu, lea sa latou taua ai le taimi na latou fesiligia ai Alo, ma ia ta’utino atu ai, o ia na tuuina le paipa ia C.K. Na fa’atoese fo’i Alo i Leoleo e tusa ai o lana gaioiga sa faia.

Ina ua maua le avanoa o McNeill e fa’asoa ai ona lagona faai’u e uiga i lenei mataupu, sa ia fa’amatalaina ai i le vaega iloilo iuga le taimi na fa’atoa tuuina atu ai le mataupu a Alo na te tauaveina.

Na taua e McNeill e fa’apea, ina ua fa’atoa taunu’u mai i Amerika Samoa i ni nai masina e lei mamao atu, sa tuuina atu ai e le Ofisa o le Loia Fautua ia te ia mataupu latou te le fiafia i ai e tauave, e aofia ai ma le mataupu a Alo.

Ina ua ia taulimaina le faila o le mataupu a Alo, sa ia iloilo ma le toto’a i ai, atoa ai ma lona faitauina o mau fa’amaonia uma e fa’atatau i le mataupu, ma ia iloa ai le tele o se fa’aletonu o loo tula’i mai ai.

Na muamua lava osofa’i e McNeill le ituaiga tamaititi aoga e i ai C.K i le taimi o lana folasaga mulimuli. Sa ia taua e fa’apea, o le molimau a le Leoleopo a le aoga maualuga i Tafuna, na atagia mai ai le ituaiga tamaititi e i ai C.K.

Na taua e McNeill e fa’apea, e tusa ai ma le molimau a le Leoleopo a le aoga, e fa’a fa ona ia fa’atonu C.K e alu ese mai lalo o le laau sa nofonofo ai ae le usita’i. Na i’u lava ina alu atu loa le Leoleopo ma ta’ita’i C.K i le ofisa ma saili lana ato, ae maua ai i totonu o le paipa o loo afifi i le mitiafu lanu mumu.

Sa taua e McNeill e fa’apea, ua lava le gaioiga a C.K o lona le usitaia lea o le fa’atonuga a le Leoleopo sa fai atu ia te ia e alu ese mai lalo o le laau sa nofonofo ai e ta’u mai ai, o ia o se tamaititi e le usita’i toe le fa’aaloalo.

Sa ia fa’atepa fo’i le vaega iloilo iuga i nisi o mau fa’amaonia o le mataupu, i le mafua’aga e aoga mamao ai lava C.K i Tafuna, ae o ia e nofo i Lauli’i.

“O lea ua tatou maua i molimau, sa tulei ma fa’atau atu e C.K fualaau fa’asaina i ana uo, e atagia mai ai o ia o se tagata solitulafono. Sa taofia fo’i o ia e Leoleo i le falepuipui ona o le mataupu e fa’atatau i le paipa sa maua ia te ia, a o lea ua ia taumafai i lona malosi e una’i lana solitulafono ia Alo,” o le fa’afinauga lea a McNeill.

O le isi mataupu na fesiligia a McNeill, o le mafua’aga na le mafai ai e le malo ona valaau le ali’i Leoleo Suesue ia Det. Johnny Paselio, o ia lea sa fesiligia Alo i le ulua’i taimi na fa’atoa tula’i mai ai lenei mataupu. Na taua e McNeill e fa’apea, e tatau i le vaega iloilo iuga ona latou vaavaai toto’a i le mataupu lenei, e foliga mai o loo i ai se mea lilo o loo alia’e mai i lenei mataupu.

E mafua lea tulaga, ona o C.K e sau mai Lauli’i, o Alo e sau mai Lauli’i, o le ali’i Leoleo Suesue foi ia Det. Paselio e sau mai fo’i o ia i Lauli’i.

Na osofa’i fo’i e McNeill le fa’amaoni o le molimau mulimuli a le malo, le ali’i Leoleo Suesue ia Det. John Seumanutafa. Na taua e McNeill e fa’apea, sa pepelo Det. Seumanutafa i lana molimau, sa ia fai mai o ia le isi Leoleo sa molimau i le taimi na fesiligia ai e Leoleo ia Alo, peita’i e le o i ai sona igoa i le lisi o Leoleo sa molimau i le taimi na fesiligia ai Alo.

O se tasi o mataupu na matua osofa’i e McNeill, o le muamua lea ona fesiligia e Leoleo ia Alo, ae fa’atoa fa’ailoa i ai ona aia tatau fa’aletulafono i le tuana’i ai o aso e 2 talu ona mae’a le fa’atalanoaina o ia.

I le faaiuga o le fa’afinauga a McNeill, sa ia finau ai loa i le vaega iloilo iuga ina ia tuuina atu le fa’aiuga, e le nofosala Alo i le tagi a le malo.