Ua solofua e le afioga i le ali’i Fa’amasino ia Fiti Sunia le moliaga mamafa na tu’uaia ai e le malo ia Fiu Johnny Saelua, ina ua le mafai e le malo ona latou tu’uina atu ni mau fa’amaonia e lagolago ai le tagi fa’asaga ia te ia.

O le aso Tofi o le vaiaso na te’a nei na fa’atulaga e faia ai le ulua’i iloiloga a Fiu i luma o le Fa’amasinoga Fa’aitumalo.

O le aso Gafua o le vaiaso na te’a nei na faila ai e le malo le latou tagi fa’asaga ia Fiu, ma tu’uaia ai o ia i le moliaga mamafa e tasi o le tagofia lea o itutinosa o se tama’ita’i e le fa’aipoipo i ai i le tulaga muamua, atoa ai ma le moliaga mama e tasi o le tagofia lea o itutinosa o se tama’ita’i e le fa’aipoipo i ai i le tulaga lua.

O le ali’i loia tua ia Marcellus T. Uiagalelei na tula’i mo Saelua, ae o le ali’i loia tua ia David Vargas, lea na filifilia e avea ma Loia Tuto’atasi na te suesueina i lenei mataupu o lo o tula’i mo le malo.

Ina ua valaau le mataupu a Fiu, na tu’u atu ai loa le avanoa i le itu a le malo mo le valaauina o le latou molimau.

A o le i valaauina le molimau a le malo, na muamua talosaga le ali’i loia ia Vargas i le fa’amasinoga, mo se avanoa e fa’atonu ai tagata e le aofia i le iloiloga o loo i totonu o le potu faamasino e aofia ai a le au fa’asalalau, ina ia tula’i ese mai totonu o le potu fa’amasino, ona e i ai tulaga o le mataupu o lo o taumafai le malo e puipui, e le tatau fo’i ona fa’afofoga i ai ni isi o le atunu’u lautele.

Na teena e Sunia le talosaga ma ia fa’atonu ai ia le ali’i loia ia Vargas e valaau le latou molimau mo le iloiloga.

I le teena ai e le fa’amasinoga o le talosaga a Vargas, na ia fa’ailoa ai loa i le fa’amasinoga, e leai se molimau a le malo e valaauina mo le iloiloga.

E ui e le i finagalo le malo e valaau sa latou molimau, ae sa nofo i tafatafa o le loia a le malo le ali’i Leoleo sa autu i ai le suesueina o lenei mataupu, susuga Capt. P. Clements.

Talu ai e le i finagalo le malo e valaau sa latou molimau, na le mafai ai loa fo’i e le fa’amasinoga ona iloilo ni mau e lagolago ai le tagi a le malo. Ona o lea tulaga, na faia ai loa le fa’aiuga a le afioga a Sunia e solofua ai le moliaga mamafa fa’asaga ia Fiu, se’i vagana ai le moliaga mama e tasi o lo o totoe pea.

O le itula e 11:00 i le taeao nei lea ua fa’atulaga e toe valaau ai le mataupu a Fiu i luma o le Fa’amasinoga Fa’aitumalo, mo le fa’aauauina o lana iloiloga i le moliaga mama o lo o totoe ai i le tagi sa fa’aulu fa’asaga ia te ia.

O lo o tumau pea tuutuuga o lo o tatala ai i tua Fiu e aunoa ma se tupe na totogi e tatala ai o ia.

O ni isi o ia tuutuuga e aofia ai le fa’asa lea ona taumafai e fa’afeso’ota’i le molimau a le malo i soo se auala, o ia fo’i lea o le tama’ita’i o lo o a’afia i lenei mataupu.