Ads by Google Ads by Google

Solofua moliaga mamafa fa’asaga ia Fiatupu Tavai

ausage@samoanews.com

Ua solofua e le afioga i le ali’i Fa’amasino ia Fiti Sunia le moliaga mamafa na tu’uaia ai e le malo le ali’i sa avea muamua ma tagata faigaluega o le Ofisa o Tiute, susuga Fiatupu Tavai, le moliaga o le umia fa’asolitulafono lea o vaega o le laau fa’asaina o le mariuana.

 

O le mae’a ai ona solofua e le fa’amasinoga o le moliaga mamafa sa tu’uaia ai e le malo ia Tavai, na fa’ailoa ai loa e le malo lo latou failaina lea o se tagi fou fa’asaga ia te ia, lea e pei ona tu’uaia ai o ia i le moliaga mama o le fesoasoani i se tagata i le aumaia o le fualaau fa’asaina o le mariuana i le atunu’u.

 

O le aso Tofi o le vaiaso na te’a nei na fa’atulaga e faia ai le ulua’i iloiloga o le mataupu a Tavai i luma o le Fa’amasinoga Fa’aitumalo.

 

O le ali’i loia sili lagolago ia Robert Morris na tula’i mo le malo, ae o le ali’i loia tua ia Marcellus T. Uiagalelei na tula’i mo le ua molia, lea sa fa’aauau pea ona tatala i tua ina ua mae’a ona ia totogi le tupe e $5,000 sa fa’atulaga e tatala ai o ia i tua.

 

Ina ua valaau le mataupu a Tavai, na tuuina atu ai loa e Sunia le avanoa i le malo mo le valaauina o le latou molimau, peita’i na fa’ailoa e Morris, e leai se molimau a le malo e valaauina mo le ulua’i iloiloga.

 

Ona o lea fa’aiuga mai le malo, na saunoa ai loa Sunia e fa’apea, “E le mafai e le fa’amasinoga ona faia se faaiuga e fa’atatau i tau sailia pe lava mau e lagolago ai le tagi fa’asaga ia Tavai, ona o lea ua manatu le malo e le valaauina sa latou molimau. Ona o lea tulaga, ua solofua ai loa e le fa’amasinoga le moliaga sa tu’uaia ai Tavai.”

 

Na faailoa e Sunia le tauaaoina lea e le fa’amasinoga o se faila fou mai le malo fa’asaga i le mataupu a Tavai. Na malolo le fa’amasinoga mo sina taimi ae sei iloilo le tagi fou lea ua fa’aulu e le malo.

 

Ina ua toe valaau le mataupu a Tavai, na faailoa ai loa e lana loia lo la tauaaoina lea o le kopi o le tagi fou a le malo, la te tete’e fo’i i le moliaga e pei ona tu’uaia ai Tavai.

 

O le moliaga mama o le fesoasoani i le aumaia i Amerika Samoa o fualaau faasaina, o se solitulafono A lea i le fa’atulagaina o solitulafono mama, lea e mafai ona fa’asala ai se tasi i le toese mo le umi e le silia i le tausaga atoa, pe fa’asala foi i le salatupe e le silia i le $1,000, poo le fa’asala fo’i i fa’asalaga uma ia e lua.

 

Ina ua mae’a ona faailoa e Uiagalelei lo la tete’e i le tagi a le malo, na faailoa atu ai loa e Morris i le fa’amasinoga, le mae’a lea ona i ai o se maliliega i le va o itu e lua e fa’amuta ai taualumaga o lenei mataupu.

 

Na fesili Sunia ia Uiagalelei poo le a le tali a Tavai e tusa ai o le moliaga fa’asaga ia te ia, na saunoa Uiagalelei, o le tali a le ua molia, e le tete’e o ia i le tagi a le malo fa’asaga ia te ia.

 

Na fa’amauina e le Fa’amasinoga le tali, e le tete’e a Tavai i le moliaga fa’asaga ia te ia, ma ua fa’atulaga ai loa le aso 10 o Aokuso i le itula e 10:30 i le taeao e lau ai lana fa’asalaga.

 

E $1,000 le tupe na fa’atulaga e le Fa’amasinoga Fa’aitumalo e tatala ai i tua Tavai, o lea tupe o le a toese mai i le tupe e $5,000 lea sa ia totogiina i le mataupu lea na molia ai o ia e le malo i le moliaga mamafa, lea ua solofua e le Fa’amasinoga. O le paleni e totoe ai o le a toe fa’afo’i atu ia te ia.

 

Ua talosagaina fo’i e Sunia le Ofisa Faanofovaavaaia, ina ia tapena se ripoti e fesoasoani i le Fa’amasinoga mo sana fa’aiuga.

 

E pei ona taua e Sunia i ni isi o mataupu ua mavae atu, e le mana’omia e le Fa’amasinoga se ripoti mai le Ofisa Faanofovaavaaia, pe afai ae ta’usala se tasi i ni solitulafono mama, peita’i, se’i vagana ai mataupu e matuia tulaga na alia’e mai ai, ona fa’atoa manaomia lea e le Fa’amasinoga se ripoti mai le Ofisa Faanofovaavaaia, e fesoasoani ai i le tuuina atu o se fa’aiuga mo se tasi ua nofosala.

 

O le mataupu e pei ona ta’usala ai nei Tavai, na alia’e mai i le aso 6 Aperila o le tausaga nei, ina ua maua i totonu o se afifi na fa’atuatusi mai i le igoa o Tavai vaega o le fualaau fa’asaina o le mariuana.

 

Na taua i fa’amaumauga a le fa’amasinoga e fa’apea, o le afifi e pei ona maua i ai e sui o le Ofisa o le Tiute mariuana, na fa’atuatusi mai i le igoa o Tavai, na aumai fo’i i le pusa meli a Tavai, ae o lona uncle ia Logona Tigilau e ana le afifi.

 

O lo o tu’uaia fa’atasi e le malo ia Tavai ma Tigilau i lenei mataupu. O se taimi o le masina nei lea ua fa’amoemoe e fa’atoa faia ai le ulua’i iloiloga o le mataupu a Tigilau i luma o le Fa’amasinoga Fa’aitumalo.

 

Na fa’ailoa e Tigilau i sui o le Ofisa o Tiute i le aso lava lea na fesiligia ai o ia e tusa ai o lenei mataupu e fa’apea, o ia e ana le afifi, ae na aumai i le pusa meli a si ona tei o Tavai.

 

Na taua e Tavai i Leoleo e fa’apea, i le 2 vaiaso talu ai ae lei taunu’u mai le afifi, na alu atu ai lona uncle o Tigilau i lona fale i Vailoa ma talosaga atu ia te ia, pe mafai ona fa’aaoga lana pusa meli e auala mai ai lana afifi mai fafo. E le i fa’ailoa e Tigilau ia Tavai poo le a lea afifi.

 

Na faailoa fo’i e Tavai i Leoleo lona vaaia o se paipa tioata e ula ai le pauta oona o le aisa i totonu o le ta’avale a Tigilau, i le aso na la malaga atu ai i le Falemeli e piki mai le afifi.