O le aso lona 3 talu ona fa’agasolo le Fa’amasinoga Autu a le ali’i sa avea ma Leoleo i le Falepuipui o Tamaiti i Tafuna (JDC), na vaaia ai le solofua e le Fa’amasinoga o isi moliaga e 2 sa faila e le malo fa’asaga ia te ia.

O le mae’a ai ona fesiligia o molimau a le malo, na tuuina atu ai loa e le loia a le itu tete’e se talosaga i le fa’amasinoga, ina ia solofua uma moliaga fa’asaga ia Okesene Alo. Na taua e le loia a Alo ia Richard deSaulles e fa’apea, ua fa’atamala le malo ina ua le mafai ona latou tuuina atu mau faamaonia e lagolago ai le tagi fa’asaga ia Alo.

O molimau mulimuli lava a le malo sa valaauina e lagolagoina ai le latou tagi fa’asaga ia Alo, o i laua sa avea ma Leoleo i le JDC, lea fo’i o lo o tu’uaia fa’atasi i latou ma Alo i lenei mataupu. O i latou ia e aofia ai Alofagia Lilia Letuli ma Olafou Wilson.

O Letuli ua mae’a ona talia e le fa’amasinoga lana tali ioe i le moliaga o le umia faasolitulafono o le fualaau o le aisa, atoa ai ma le fesoasoani e fa’asola i tua se tamaititi pagota. O Wilson ua mae’a fo’i ona talia e le fa’amasinoga lana tali  ioe i le moliaga o le umia faasolitulafono o fualaau faasaina o le aiga ma le gaoi.

O ni isi o tuutuuga o le maliliega a Letuli ma Wilson ma le malo, o le la molimau lea ma le fa’amaoni i le fa’amasinoga autu a Alo.

Na taua e Letuli i lana molimau e fa’apea, na te iloaina lelei lava Alo aua sa la faigaluega fa’atasi i le JDC i le taimi sa suesueina ai e Leoleo le mataupu lenei i le 2016. Sa ia taua atili, e leai se taimi na la faigaluega fa’atasi ai ma Alo i se sifi e tasi.

Na fesili le loia a le malo ia Lornalei Meredith ia Letuli pe sa i ai se taimi na ia vaaia ai Alo o ia umia fualaau oona o le aisa, na tali le molimau ioe. Na toe fesili le loia pe fa’afia ona ia vaaia Alo o ia umia fualaau faasaina, na tali le molimau, e na o le fa’atasi lava.

“O le a le ituaiga fualaau faasaina sa e vaai o umia e alo?” o le fesili lea a le loia. Na tali le molimau, “O le fualaau faasaina o le pauta oona o le aisa.”

“Sa i ai se taimi na lua ulaina ai ma Alo lea fualaau oona o le aisa?” o le fesili lea a le loia. Na tali le molimau, “O lea lava, e na o le fa’atasi lava.”

Ina ua fesiligia e le loia a Alo le molimau, sa aga’i ai ana fesili i le mafua’aga o le latou maliliega ma le malo, o tala sa talanoaina i le latou talanoaga ma loia a le malo, aemaise ai o lona poto aoaoina e mafai ai ona ia iloa ituaiga fualaau faasaina eseese.

Na taua e Letuli e fa’apea, e fa’alua ona latou talanoa ma loia a le malo. O le fonotaga muamua lea sa faia i le falepuipui i Tafuna i ni nai vaiaso ua mavae atu, e na o le 5 minute le umi o lea fonotaga. Sa i ai fo’i lana loia fautua ia Ryan Anderson i le taimi o lea fonotatga. Ae o le fonotaga lona lua, sa latou feiloa’i ai i fafo o le potu fa’amasino i le vaiaso lava lenei, ae na o le 3 sekone le umi lea fonotaga.

Na fesili deSaulles ia Letuli pe aisea ua ia molimau ai fa’asaga ia Alo, ae na tali le molimau, o lona mana’o lea e fa’ailoa le mea moni, o le autu atoa fo’i lena o lana molimau.

Na fesili le loia a Alo ia Letuli pe faamaonia lana molimau sa ia vaai o umia e Alo vaega o le pauta o le aisa. Na tali le molimau, o lea lava.

“E fa’afefea ona e iloaina o le aisa lea sa umia e alo,” o le fesili lea a le loia. Ae na tali le molimau, “O Alo lava na fai mai ia te a’u o le aisa o loo ia umia.”

“O le a le eseesega o le aisa ma le mariuana?” o le isi lea fesili a le loia. Ae na tali le molimau, “O le aisa e lanu pa’epa’e ae o le mariuana e lanu meamata.”

Ina ua maua le avanoa o le loia a le malo e toe fesiligia ai le molimau, na fesili ai Meredith ia Letuli pe aisea ua ia malie ai e tali ioe i le moliaga o le umia faasolitulafono o le aisa. Ae na tali le molimau, e mafua mai i le taimi lea na la ulaina ai ma Alo lea fualaau fa’asaina.

“Sa i ai se taimi na lua ulaina ai ma Alo le pauta o le aisa?” o le fesili lea a le loia. Ae na tali le molimau, “O lea lava.”

“O le a se suiga i lau fa’alogo ina ua e ula i le aisa?” o le isi lea fesili a le loia. Ae na toe tali le molimau, “Na vave lava ona ou tago taofi ona e ese lava le manogi.”

“O le a le manogi o le aisa?” o le toe fesili atu lea a le loia. Ae na tali le molimau, “E manogi tagata oti.”

I le molimau a le ali’i sa avea ma Leoleo o Wilson, sa ia fa’amatala ai mea uma sa tutupu i totonu o le JDC, e pei o le fa’atele lea ona ia vaaia o Alo o ia umia le pauta o le aisa, o le taimi na ia vaaia ai Alo o ia aveese mai meaai mai totonu o le JDC ae la’u i lana ta’avale sa paka i fafo, atoa ai ma le taimi e fai ai Alo i tamaiti pagota mo ni tupe.

Na fesili le loia a le malo ia Wilson pe aisea na te iloaina ai o le aisa lea sa umia e Alo. Ae na tali le molimau, e masani ai lana vaai, aua o le aisa e tuu i totonu o le straw e tipi fa’amaai le tulimanu.

O le mae’a ai o molimau a le malo, na finauina ai loa e le itu tete’e le talosaga ina ia solofua moliaga fa’asaga ia Alo. Na taua e deSaulles e fa’apea, ua fa’atamala le malo i le tuuina atu o mau faamaonia e lagolagoina ai la latou tagi.

Fai mai deSaulles, sa tatau i le malo ona tuuina atu fualaau faasaina o loo latou finau sa umia e Alo. E oo fo’i i fa’amaumauga o suega sa faia i tamaiti pagota ia na maua i ai le vaailaau oona o le aisa i o latou tino, sa tatau fo’i ona tuuina atu i luma o le vaega iloilo iuga, peita’i, e leai ma se mau faamaonia na tuuina atu e le malo.

Ae na finau le loia a le malo ia Christy Dunn e fa’apea, ua lava ma totoe molimau ua tuuina atu e le malo e lagolagoina ai le tagi fa’asaga ia Alo. E le gata o lea ua molimau tamaiti sa taofia i le JDC ma latou fai mai sa latou vaai ia Alo o ia umia fualaau faasaina, ae oo lava fo’i ia i laua sa Leoleo fa’atasi ma Alo i le JDC, o lea fo’i ua la molimau, sa la vaai ia Alo o ia umia fualaau fa’asaina.

E na o le 2 moliaga na talosaga le malo e solofua, o le moliaga 11 ma le 13, ona ua talitonu le malo, ua le mafai ona latou fa’amaonia ia molia.

Saunoa le afioga i le ali’i Fa’amasino Sili ai Michael Kruse e fa’apea, e le o se tiute o le fa’amasinoga le iloilo o mau fa’amaonia, o le galuega lena a le vaega iloilo iuga.

Na talia e Kruse le talosaga a le malo ma solofua ai loa moliaga e 2 fa’asaga ia Alo. O moliaga e 11 o loo totoe ai, o le a tuuina atu i luma o le vaega iloilo iuga latou te iloilloina.