Ads by Google Ads by Google

Solofua Fa’amasinoga le isi moliaga mamafa fa’asaga ia Mosese Lomu


[ata: foa'i]
ausage@samoanews.com

Na solofua e le afioga i le ali’i Fa’amasino ia Fiti Sunia le isi moliaga mamafa e tasi na tu’uaia ai e le malo le ali’i Leoleo ia Mosese Lomu, ina ua le mafai e le Fa’amasinoga ona maua ni mau fa’amaonia e lagolago ai le moliaga fa’asaga ia te ia.

 

I le solofua ai e le fa’amasinoga o le moliaga mamafa o le fa’aleagaina lea o faamaumauga faalaua’itele sa tu’uaia ai Lomu, e 2 isi moliaga mamafa o lo o totoe pea lava i le tagi a le malo fa’asaga i le ali’i Leoleo. O ia moliaga mamafa e 2 e aofia ai le faia o gaioiga faasolitulafono, atoa ai ma le faalavelave i le molimau a le malo.

 

E 2 tagi eseese o loo tu’uaia ai e le malo ia Lomu. O le tagi muamua, sa tuuaia ai e le malo ia Lomu i le moliaga mamafa o le  gaioiga faasolitulafono, ae i le tagi lona lua, o loo tu’uaia ai i le faalavelave lea i le molimau a le malo.

 

O ia tagi na afua mai i le fa’alavelave lea o loo tu’uaia ai le ua molia i lona fesoasoani lea e fa’aufiufi le faalavelave lea na tula’i mai i le vaveao o le aso 12 o Aokuso o le tausaga nei, ina ua sola i tua mai le toese le ali’i pagota ia Manu Lefatia ma ia fana se isi ali’i i Leone pe tusa o le itula e 3:00 i le vaveao.

 

Ina ua taua i ripoti mai nisi o molimau o le ali’i pagota o Lefatia lea sa ia fanaina se ali’i i Leone, na logoina ai loa e le Taitai Leoleo ia Foifua Foifua ia Lomu, a o avea o ia ma Taitai Uati o le Sifi o le taeao i le toese i Tafuna, ina ia siaki le sela a Lefatia poo i ai o ia i totonu.

 

Na fiu Foifua e fa’atali se taimi e toe fesoota’i atu ai Lomu e tusa ai o le siaki o loo faagasolo i le sela a Lefatia.

 

E silia i le itula fa’atoa maua atu le tali, o Lefatia o loo i ai pea i totonu o lona sela. Na faailoa e nisi o Leoleo sa galulue fa’atasi ma Lomu i le sifi o le taeao i le toese e faapea, na fa’atonu e Lomu i latou ina ia tumau uma i latou i le tala e tasi, na mafua ona tuai ona siaki le sela o loo loka ai Lefatia, ona sa amata mai le latou siaki i le falepuipui pito mamao lava, o le Alpa Unit, ma fa’asolosolo mai ai i isi fale, ae mulimuli lava i le falepuipui o le Bravo Unit o loo loka ai Lefatia.

 

O le ali’i Leoleo Suesue ia Det. Justin Thomsen na valaau e le malo i le taimi o le ulua’i iloiloga o lenei mataupu.

 

FAAIUGA A LE FAAMASINOGA I LE TAGI MUAMUA

 

O le mae’a ai ona tuuina atu e Loia a itu e lua o a laua fa’afinauga, na tuuina mai ai loa e le afioga i le ali’i fa’amasino ia Sunia o le fa’aiuga a le malo fa’asaga i lenei mataupu.

 

Na taua e le loia a le malo e fa’apea, na manino i le molimau sa tuuina mai e le Leoleo Suesue, le taumafai lea o Lomu e ufiufi le faalavelave e faatatau i le sola i tua o le alii pagota o Lefatia, e ala i lona fa’atonu o Leoleo o lana sifi ina ia tumau uma i latou i le molimau e tasi, o le siakiina o pagota na amata mai i le fale o le Alpa Unit ae fa’ai’u mai i le Bravo Unit.

 

Na taua e Leoleo o le toese i Leoleo Suesue e fa’apea, na fa’atonu e Lomu i latou ina ia tasi le latou fa’amatalaga e fai, ina ia puipuia ai i latou mai le ono aafia i lenei mataupu.

 

E le gata fo’i i lea, na finau fo’i le loia a le malo e fa’apea, na faatonu fo’i e Lomu le tama’ita’i Leoleo sa gafa ma le faia o faamaumauga i le toese ina ia fai ni suiga i totonu o lana api fa’amaumau, ina ia fa’ailoa ai, e ta’i 30 lava minute ma faitau pagota. Ae o le mea moni lava e pei ona taua e le tama’ita’i Leoleo lea o le falepuipui i Leoleo Suesue, e leai ma se faitauga o pagota sa faia, ana le fesoota’i atu lava le Taitai Leoleo ia Foifua e siaki le sela poo i ai Lefatia i totonu, e le pisi i latou e fa’atino le faitauina o Leoleo.

 

Na tete’e malosi le loia a Lomu i le faafinauga a le malo. Na taua e le loia a Lomu e fa’apea, e leai ma ni mea molimau faamaonia na tuuina atu e le malo e lagolago ai tuuaiga na fa’atonu e Lomu isi Leoleo o le toese e pepelo. E le gata i lea, e leai fo’i ni molimau e faamaonia ai, sa taupulepule Lomu ma isi Leoleo o le toese e pepelo pe ufiufi fo’i le sola i tua o le ali’i pagota.

 

I le mae’a ai ona iloilo e le afioga i le ali’i Fa’amasino ia Sunia o mau faamaonia o lenei mataupu, na ia faaleaoga ai loa le moliaga o le faaleagaina lea o faamaumauga faalaua’itele sa tuuaia ai Lomu, ina ua le mafai e le malo ona tuuina atu ni mau e lagolago ai le latou tagi.

 

Sei vagana ai le moliaga lona 2 o le faia lea o faagaioiga faasolitulafono ua manatu le fa’amasinoga, ua lava ma totoe mau sa tuuina atu e le malo e lagolago ai lea moliaga. Ma ua tofu atu nei i luma o le fa’amasinoga maualuga le moliaga lea e fa’aauau ai sona iloiloga autu.

 

TAGI LONA LUA

 

Ua tofu atu nei i le fa’amasinoga maualuga le tagi lona 2 a le malo fa’asaga ia Lomu, ina ua fa’aagafua e le ua molia ona aia tatau, ma ia manatu ai e aua ne’i fa’ataunuuina lana ulua’i iloiloga sa tatau ona fa’ataunuuina i luma o le afioga i le ali’i fa’amasino ia Sunia.

 

Na teena e Lomu tu’uaiga fa’asaga ia te ia ina ua tula’i i luma o le fa’amasinoga maualuga i le vaiaso nei.

 

I lona teena ai o tu’uaiga fa’asaga ia te ia, ua fa’atulaga ai loa lana ulua’i iloiloga e faia lea i le fa’aiuga o le masina fou o Novema.

 

O lo o tumau pea tuutuuga o loo tatala ai i tua Lomu e fa’atalitali ai taualumaga o lana mataupu. O ni isi o ia tuutuuga e aofia ai le faasa lea ona ia toe taumafai e fa’afesoota’i molimau a le malo, e aofia ai Leoleo e to’afa sa latou galulue fa’atasi i le po na tula’i mai ai le fa’alavelave i le toese i Tafuna.

 

O le ali’i loia fautua ia Michael White o loo tula’i mo Lomu, ae o le ali’i loia sili lagolago ia Jason Mitchell o loo tula’i mo le malo.