Ads by Google Ads by Google

Solofua e le fa’amasinoga le tagi sa faia fa’asaga ia Elijah Tavai

ausage@samoanews.com

Ua solofua e le fa’amasinoga maualuga le tagi a le malo sa faaulu fa’asaga i le susuga ia Elijah Jared Tavai, e mafua mai ina ua malaga i fafo le molimau autu sa fa’alagolago i ai le itu a le malo.

 

Na tu’uaia e le malo ia Tavai i lona faia o uiga mataga i se tamaititi aoga, lea na mafua ai ona a’afia lea tamaititi i le siama e mafua mai ona o feusuaiga le tatau (tulou).

 

O le vaiaso nei na fa’atulaga e faia ai le fa’amasinoga autu o lenei mataupu, peita’i, ua suia atoa ina ua faila e le malo sa latou talosaga i luma o le fa’amasinoga e solofua ai le tagi fa’asaga ia Tavai, lea fo’i na talia e le afioga i le ali’i fa’amasino sili lagolago ia Fiti Sunia.

 

Na tagi Tavai ina ua tuuina mai le faaiuga a le fa’amasinoga. Sa ia fusi atu i lana loia fautua, le susuga a Marcellus Talaimalo Uiagalelei, sosoo ai ma lona fusi atu i ona matua, lea sa i ai i totou o le potu fa’amasino, fa’atasi ai ma nisi o lona aiga.

 

Na faila e le loia a le malo ia Laura Garvey le talosaga ina ia solofua le latou tagi, ma le faamoemoe e i ai le taimi latou te toe failaina ai le tagi i le lumana’i, pe afai ae toe fo’i mai i le atunu’u le tamaititi na a’afia. Ae i le tali a le itu tete’e, e le gata sa latou lagolagoina le talosaga a le malo, ae sa toe talosagaina fo’i e le itu tete’e le fa’amasinoga ina ia solofua le tagi, e aunoa ma se avanoa e mafai ai ona toe faila e le malo lenei mataupu i lumana’i.

 

Talu mai le taimi atoa sa fa’agasolo mai ai lenei mataupu, sa tatala pea i tua le ua molia ina ua ia totogi le $5,000. O moliaga e 3 na tu’uaia ai Tavai e aofia ai le moliaga mamafa o lona faia o uiga le tatau i se tamaititi e laititi i lalo o le tulafono, faapea ai ma moliaga mama e 2 o lona faia o gaioiga e lamatia ai le saogalemu o fanau, ma le faailoa atu i fanau o uiga tau feusuaiga.

 

TALOSAGA A LE MALO

 

Na taua e le malo i le latou talosaga e fa’apea, talu ai ua malaga i fafo le tamaititi na a’afia, o ia fo’i lea sa faamoemoe e avea ma molimau autu i lenei mataupu, ua manatu ai le malo, e le mafai ona latou faamaonia le tagi fa’asaga ia Tavai.

 

Na taua e Uiagalelei i lana tali e fa’apea, e i ai isi fa’amatalaga taua e le o mafai e le malo ona latou faailoa i le latou talosaga. O ia faamatalaga e aoga tele mo le faaiuga a le faamasinoga, ina ia iloilo ai pe tatau ona solofua le tagi ma le faamoemoe e toe faila i se taimi mulimuli ane, poo le solofua loa e aunoa ma se avanoa e toe faila mai ai i le lumana’i.

 

Na taua e Uiagalelei e fa’apea, i le iloiloga sa faia i le aso 22 o Mati na te’a nei, na faailoa ai e itu e lua le sauni uma mo le fa’amasinoga autu. Talu mai lava le taimi na faila ai e le malo le latou tagi, sa le mafai ai lava e le ua molia ona toe malaga ese atu ma le atunu’u sei vagana o se faatanaga mai le fa’amasinoga.

 

E tele isi aafiaga na oo ia te ia, e le gata na tuli ese mai o ia mai lana galuega sa galue ai, Faiaoga Musika i le Aoga Maualuga i Leone, ae ua tele fo’i aafiaga i lona olaga talu ai lava lenei mataupu.

 

Saunoa Uiagalelei e fa’apea, e le o manino i le talosaga a le malo pe toe fo’i mai i le atunu’u le tamaititi ua malaga i fafo.

 

Na faamanatu e Uiagalelei i le fa’amasinoga le Faavae o Amerika Samoa, lea o lo o manino mai ai le tatau lea i soo se tagata ua molia ona agava’a i le faatinoina o sona fa’amasinoga faatopetope ina ia iloilo ai le faamaonia poo le le faamaonia fo’i o tu’uaiga fa’asaga ia te ia.

 

I le faaiuga o le tali a Uiagalelei, sa ia talosagaina ai loa le fa’amasinoga ina ia solofua le tagi fa’asaga ia Tavai e aunoa ma se avanoa e mafai ai e le malo ona toe faila le latou tagi i le lumana’i.

 

ILOILOGA

 

Ina ua valaau le mataupu a Tavai i le aso Gafua na te’a nei, na fesiligia ai loa e Sunia le loia a le malo i le mafuaaga o le latou talosaga e solofua le tagi. Na taua Garvey e faapea, o le molimau autu a le malo, o ia fo’i lea na a’afia i lenei mataupu, ua malaga atu nei o ia i Utah mo nisi o fuafuaga faaleaiga, e le o mautinoa pe toe taliu mai i le atunu’u.

 

Na fesili Sunia poo anafea na iloa ai e le malo ua malaga i fafo le ali’i na a’afia, ona o le aso 28 o Mati lea na tuuina atu ai e le malo lana poloaiga e poloaia ai lenei ali’i ina ia auai i le taimi o le fa’amasinoga, ae na tali Garvey, na fa’atoa iloa e le malo i le aso 26 o Mati ua malaga lenei ali’i i fafo.

 

Na taua atili e Garvey e fa’apea, e tusa ai ma le ripoti mai le Ofisa o Femalagaaiga, o le aso 18 o Fepuari o le tausaga nei na tuua ai e lenei ali’i le atunu’u.