Ads by Google Ads by Google

Sisigafu'a 119 Malo Fa'ateritori o Amerika Samoa

Leone Boys entertain at Flag Day
tusia: Leua Aiono Frost

Pago Pago, AMERICAN SAMOA — I taualumaga uma e sisi a'e ai le Agiagia o le Malo Fa'ateritori o Amerika Samoa i lenei tausaga 2019, na poto ai le mamalu o ana malo fa'aaloalogia mai le Malo Tele o Amerika, se'ia pa'ia mai Malo Fa'a-Atumotu o le Pasefika. Mai le Malo o Tokelau, le afioga le Ulu o Tokelau ma le Faletua, ae maise le Usoga ia Samoa Tuto'atasi i lona afio mai o le Ao Mamalu o le Malo o Samoa ma lana Masiofo, Afioga le Tamaaiga Tuimaleali'ifano Vaaletoa Sualauvi ll ma Fa'amausili Leinafo Tuimaleali'ifano ae maise fo'i le Palemia Tuilaepa Sailele Malielegaoi. O Emepasa fo'i o Ausetalia i Samoa ma lona ali'i ae maise ole Emepasa o Niu SIla i Samoa ma lona faletua.

O le mamalu fo'i o lana faigamalo i le afio o le afioga le Sui Kovana Lemanu Peleti Mauga ma le Faletua ae maise o le Tina ole atunu'u Cynthia Moliga, i le pa'ia maualuga i Aufaigaluega totofi a le Atua i so'o se fata faitaulaga i le atunu'u, Le Mamalu i le Faigamalo a Amerika Samoa ina vaega tumaoti e tolu, Le vaega o Fa'amasinoga ma lo latou Taiulu, Le Fono Faitulafono i le Maota Maualuga ma le afioga le Peresetene ole Senate ma fa'atama o le atunu'u, le Fofoga Fetalai o le Maota o Sui ma sui tofia o Itumalo ta'itasi o le atunu'u, fa'apea fo'i le pa'ia le avea o le atunu'u mamala, i le afifio o tupu ma tamali'i o Amerika Samoa, lea o lo'o nofo tatalo i le malaga saili manuia a le ta'ita'i o le tatou faigamalo, le afioga le Kovana Sili Lolo Moliga. Fa'afetai, fa'afetai lava, ma ua sologa manuia lava ona o togafitiga o feagai ai ma ia.

O i latou na malaga fa'apitoa mai le Malo Tele e aofia ai le susuga Rear Admiral Kevin Elunday ma le faletua mai le14th District Command a le US Coast Guard, lea sa fai ma sui e saunoa mo le Malo Tele o Amerika i le tatou sisigafu'a lona 119 i lenei tausaga.

O le lasilasi o tagata uma na poto i le Malae o Talaolupelele i Tafuna, sa matua iloga ona fa'amalieina lo latou maimoa, ma le fa'afofoga ona o le polokalama sa tu'ufa'atasia ma fa'asolo e le fofoga o le aso, le tofa le To'oto'o Malemo Tausaga o le sui Failautusi o le Ofisa o Mataupu Tau Samoa, le Malo fa'alotoifale o le tatou atunu'u.

Ina ua mae'a le asiasiga fa'apitoa o le Tula'i Fa'aaloalo e lana afioga le Sui Kovana Lemanu Peleti Mauga ma le afioga le Komesina o Leoleo Le'i Sonny Thompson, na tu'uina lea i le faiva o le fofoga o le tofa le To'oto'o Melemo Tausaga mo le fa'asologa ole Polokalama fa'ataoto o le Sisigafu'a.

Peita'i o le tofa Fiu Johnny Saelua sa avea ma sui na te tolaulauina le mamalu o le auvala'aulia ma le paega ole atunu'u atoa na i Malae o Talaolupelele.

O le faiva o Failauga o le Upu a le Atua, na tula'i mo le sauniga e tu'u atu le fa'afetai ma le vi'iga i le Atua, na tofia ai le susuga Rev. Richard Vaeao, o le First Samoa Full Gospel, Peteli i Nuuuli.

O le mae'a ai le vi'iga o le Atua na soso'o ma le sao o le tupulaga talavou e faitauina ai le Poloa'iga Fa'alaua'itele a le Kovana Sili o Amerika Samoa e fa'amanatuina ai Aperila 17, 2019 e sisi a'e ai Tagavai a Amerika ma Amerika Samoa i ona lotoifale, e fa'amauina ai le feagaiga o le Faigamalo Fa'ateritori o le Iunaite Setete o le Malo o Amerika Samoa.

O le sui talavou na faitauina le Poloaiga i le Gagana Samoa o D'Andre Siimalevai, Peresetene Vasega 12, A'oga Maualuga i Manu'a. Mo le Faitauina ole Poloaiga Fa'alaua'itele i le Gagana Peretania na tolaulauina lea e Sophie Malama Young, Peresetene o le NHS a le South Pacific Academy i Tafuna.

Mo le sisiga o le Tagavai a le Iunaite Setete o Amerika, sa fofogaina le Vi'i o le Malo Tele o Amerika e le tama'ita'i a'oga o Fa'afetai Lemautu o Fagaitua High. O i la'ua na nafa ma le faiva ole sisi a'e ole Agiagia a le Malo Tele o CPT Alesi Mageo o le EMS, ma CPT Pou Tuaolo Supapo, Matagaluega o le Puipuiga o le Saogalemu Lautele o le Atunu'u DPS.

Mo le Agiagia a le Malo o Amerika Samoa sa fofogaina le vi'i o lana Fu'a e le tama'ita'i o Avemaria Isa'ako, Marsit Fa'asao High School, ao i la'ua na tautuaina le Agiagia a Amerika Samoa o le afioga le Fa'alupega Silifaiva Fai'ai mai Olosega ma Uso Lago'o mai le Ma'oputasi, ae agaia le sisiina a'e o tagavai e le Matagaluega o le Puipuiga o le Saogalemu Lautele o le tatou Malo.

Na soso'o lea ma saunoaga fa'apitoa o le aso fa'amoemoeina. Na mua'i tu'uina le avanoa i lana afioga le Fa'atina o le atunu'u, ona o lo'o fia fa'alogo le to'atele i se talatala mai ole fa'atafa gasegase o le lana afioga le Fa'aao o le Faigamalo a Amerika Samoa, Kovana Sili Lolo Moliga.

 

"O lana tala mai, o le talatala o mo'omo'oga fia auai mai mo lenei tatou fa'amoemoe nei, o le aso e fa'asili mo lona malo ae maise o ona tagatanu'u ma e uma ua alaala ma galulue mo Amerika Samoa. Lona lua, o lana fa'afetai tele i le Aufaigaluega Pa'ia a le Atua ua avea ma ositaulaga i so'o se fata faitaulaga i le atunu'u, ona o le nofo tatalo mo ia. Fa'apea ai ma le mamalu o le atunu'u pele mai le vasega o Matua Matutua, se'ia o'o i aotelega o vaega eseese o lau faigamalo i ona ulu ma ta'ita'i, ma le lasi o le aufaigaluega, ae tainane fo'i le atunu'u pele atoa o Amerika Samoa, fa'afetai mo a outou tatalo mo a'u. Ua lagona le malosi o le tino ae maise le loto ona o a outou talosaga. O ai ea lea tagata ua outou manatu mai ai. A'o se talosaga si'itia pea i le Atua, ina ia maua le malosi e tautua ma fa'aauau ai faiva ua outou tofia ai a'u ou te fa'atino mo le tatou Malo. Fa'afetai mo lo outou manatu mai."

"I le toe fe'au, mo le tupulaga talavou, ia outou ola tapenapena, tausaili le atamai lautele, agava'a o lo'o mana'omia, ia aluga lelei le folauga a lo tatou malo i le lumana'i, lea ua manino lava, o outou lo tatou fa'amoemoega, e ala mai ai manuia o le Atua mo Amerika Samoa, lo tatou atunu'u moni, o lo tatou malo pele! Ia manuia le tatou Sisigafu'a lona 119 lenei, o le tatou malo! O lo outou Kovana, Lolo Moliga."

O le lauga fa'apitoa mai le malo o Amerika Samoa sa fa'afeiloa'ia aloa'ia ai ana vala'aulia mamalu, le pa'ia lasilasi o lona faigamalo i ona tafa e tolu,ae maise le mamalu o ona tagatanu'u ma e uma ua alaalata'i i Amerika Samoa, na feagai lea ma le afioga le Sui Kovana, Lemanu Peleti Mauga.

Ina ua mae'a ana faafeiloa'iga ma le fa'afetai i le tina ole atunu'u mo le fe'au fa'apitoa na ia fofogaina mai le Kovana Sili Lolo Moliga, na faliu lea o Lemanu Mauga i le fe'au fa'atauaina o lenei Sisigafu'a, ole fe'au e lu'itau ai tupulaga talavou o Amerika Samoa, ina ia mautu se leleiga a'o manuia fo'i mo le Malo o Amerika Samoa i o latou vaitau i le lumana'i.

"E moni lelei le tima'i a le Fa'afeagaiga Richard Vaeao i lenei taeao, ua na'o le Atua e mautu ai le lumana'i o a taeao, le tupulaga a lelei fatufatu le aso, e le sasi le folauga i le lumana'i. O le fa'amua fo'i ua lu'ia ai le Malo o Amerika Samoa, le malo fa'alotoifale ma ana auaunaga uma, o le tele fo'i o polokalama fa'atutu aga'i i le tautuaina o Tupulaga talavou, avatu le fa'amuamua i le a'oa'oina o outou, lea olo'o gafa ma le vasega o Faia'oga uma ile atunu'u. Fa'afetai tele mo la outou tautua, ua tatou va'aia ma ua tepa i ula, ona olo outou punoua'i e a'otau le aotelega o fanau ia."

"E moni lava upu a tua'a ua mavae, Ia aua ne'i galo e tepa i tua ma le leo fa'afetai, ae savali ma le mautinoa ile luamana'i, ona ua tatou o fa'atasi ma le Atua i mea uma. Ia tumau lou fa'avae, fa'amuamua le Atua i mea uma, e le fesiligia le manuia o au taumafaiga i so'o se mea."

"O a lava mea ua taumafai i ai le Malo ma ana pa'aga i le vasega o Pisinisi ma fa'alapotopotoga, o taumafaiga uma lava ina ia fa'aau'upegaina tupulaga talavou, ia tau'avea lo tatou tofi o le gagana, o suiga fo'i e lutia ai so'o se taumafaiga i lenei folauga, ia le alo ese ai, ae sofa'i atili ina ia mautinoa, ia sao ma uli le fa'amoemoe i fanau ae a la tatou folauga i le lumana'i o le tatou Malo ma ona tagata."

"O le a tonu se ituaiga fa'aauupegaina e tatou faia ina ia mautinoa ai lo latou agava'a e folau i tai sousou ma tau malu i le lumana'i, ia tu'u avanoa e a'oa'o ma fa'amalosi ia i latou, ia fai o latou faiva, aua lava ne'i fa'atamala ma fa'atalale i le avanoa e tula'i ai ma le mautinoa, e fai lau vaega i le atina'e o lou malo ma ona tagata. O le atamai ma le fa'aeaina, o meaalofa taua nei a le Atua mo tagata e fa'alogo ma usita'i."

Tapenapena, fatufatu manatu ma fa'aiuga lelei mo lou olaga talavou, fai lau vaega i so'o se mea o mana'omia ai oe i lou malosi ma lou atamai, fa'amasani e faia fa'ai'uga lelei mo lou lumana'i, ia e tumau ai, ma tausaili atili e mautinoa ai mea lelei uma."

Na fa'amalo fo'i le afioga le Sui Kovana i taumafaiga a le tama'ita'i Faia'oga Ms Maga mai Tafuna High, lea ua avea ma Faia'oga o lenei tausaga, ae maise sa ia fa'afetaia le tautua a nisi o sui iloga, lea ua fa'atasi mo le toe Sisigafu'a o lenei tausaga, ona le toe tatou fa'atasi lea ona ua suia latou tautua i nisi vaega ole Malo tele, ae maise o le Kamupani I'a a le Star Kist lea o le a sui tulaga mai ai se isi ta'ita'i fou.

"Fa'afetai mo la oulua tautua, ma ia manuia fo'i le lumana'i o lua tautua i Kamupani ma le Malo tele o lo'o lua galulue i ai," ona mae'a ai lea o lana folasaga i lenei Sisigafu'a.

[Soso'o le tala o le sisigafu'a i le lomiga o le Aso Gafua.]

More photos in Flag Day slideshow.