Talu ona amata mai le fa’amasinoga autu a le ali’i o Thomas Siaumau, i le aso Gafua o le vaiaso na te’a nei, ua atoa le to’a 10 o molimau a le malo ua mae’a ona valaauina i luga o le nofoa molimau. O i latou nei e aofia ai Leoleo, o tama’ita’i faiaoga se to’alua, faapea ai ma se molimau fa’apitoa mai le Ofisa o Leoleo i Honolulu, o ia lea e i ai lona poto faapitoa i le suesueina o mau fa’amaonia i ni fa’alavelave matuia fa’apenei.

E 8 moliaga o lo o tu’uaia ai e le malo ia Siaumau, o ia moliaga e aofia ai moliaga mamafa e 5 ma moliaga mama e tolu.

O ali’i loia e to’alua mai le Ofisa Loia a le RDA ia Richard deSaulles ma Daniel Holladay o loo tula’i mo Siaumau, ae o tama’ita’i loia sili lagolago e to’alua ia Christy Dunn ma Laura Garvey o lo o fai mai sui o le malo, ae lagolagosua i ai le ali’i Leoleo Su’esu’e ia Det. Savelio Vaofanua, o ia lea sa fa’auluulu i ai le suesueina o lenei mataupu.

O le aso lona 4 o taualumaga o lenei mataupu na valaau ai loa e le malo le latou molimau faapitoa mai Honolulu, mo le tuuina atu o sana fa’amatalaga i luma o le vaega iloilo iuga, e tusa ai o lana suesuega sa faia i mau faamaonia o le mataupu a Siaumau, lea na auina atu e le malo i le tausaga na te’a nei mo le suesueina.

A o le i amata le fa’amatalaga a le molimau faapitoa lenei, sa maua le avanoa e tauaao atu ai e le loia a le malo mau fa’amaonia uma ua i luma o le fa’amasinoga, na te iloilo ma vaavaai i ai.

I le mae’a ai ona iloilo ma vaavaai le molimau i mau faamaonia, sa ia taua ai loa e fa’apea, na te faamaonia, o mau faamaonia nei sa auina atu i Honolulu i le tausaga na te’a nei na te faia i ai se suesuega.

Na fesili le loia a le malo i le molimau pe faapefea ona ia faamaonia lea tulaga, na tali le molimau, o loo pipii ai i tua o pepa iila o loo i ai i totonu  mau faamaonia lana saini, o lana ripoti, atoa ai ma le numera o mau faamaonia ta’itasi. O nei tusitusiga uma e pei ona taua e le molimau, o loo i ai uma lea i lana tusilima.

Ina ua mae’a ona faia ana suesuega i mau faamaonia sa auina atu, sa ia toe teu maluina uma i totonu o taga pepa iila, ona ia faamau lelei lea o taga pepa iila ta’itasi ma teu i totonu o le atigi pusa, ma lafo mai loa i Amerika Samoa nei le atigi pusa o loo i ai uma mau fa’amaonia o lenei mataupu.

Na taua e le molimau i lana fa’amatalaga e fa’apea, sa mafai ona ia suesueina pulufana e le’i faapaina atoa ai ma atigi pulu fana ua mae’a ona faapa o le ituaiga o le 9mm ma le 7.62-39mm. I

I le mae’a ai o ana suesuega sa faia, na ia faamaonia ai, o le pulu fana o le ituaiga o le 9mm, e mafai ona fa’aaoga i ituaiga a’upega pupuu (handgun), ae o le pulu fana o le ituaiga o le 7.62-39mm, e na o a’upega uumi (rifle) lea e tusa ma le 16 inisi pe sili atu fo’i e mafai ona fa’aaoga ai.

Sa taua fo’i e le molimau e fa’apea, na maua i lana suesuega sa faia, o pulufana uma lava o le ituaiga o le 9mm sa auina atu e le malo, e tasi lava le ituaiga fana puupuu sa fa’aaoga ai. E fa’apena fo’i i le ituaiga pulufana o le 7.62-39mm, e tasi fo’i le fana umi fa’aaoga ai.

E mafua lea tulaga, o tua o le atigi pulu fana, o loo i ai se maila i le tulimanu. O le maila lea e mafua mai i le taimi na fana ai le pulu, ma mafai ai loa ona mau lea maila i le tino o le atigi pulu fana. I lana suesuega sa faia, e tutusa uma lava foliga o maila o loo i atigi pulufana 9mm, e faapena fo’i i maila o loo i atigi pulufana o le 7.62-39mm.

I le faaiuga o lana molimau, sa ia faailoa ai i luma o le vaega iloilo iuga, soo se ituaiga fana lava e fa’aaoga e se tagata, e mafai lava ona avea lea fana ma auala e maliu ai se tasi.

Ina ua maua le avanoa o le loia a Siaumau ia deSaulles e fesiligia ai le molimau, sa ia fesiligia ai ona agava’a e mafai ai ona avea o ia ma tagata e faia suesuega faapitoa i mau fa’amaonia mo mataupu tau solitulafono fa’apenei. Na tali le molimau, mai le silia i le 20 tausaga talu ona galue i Fale Suesue a le Ofisa o Leoleo i Honolulu, ua lava ai lona tomai e fa’atino ai ituaiga suesuega faapenei.

Na fesili deSaulles i le molimau poo le a tonu le ituaiga fana lea sa fa’aaoga e fana ai le ituaiga pulu o le 7.62-39mm, na tali le molimau, o le ituaiga fana o le AK-47.

“Ae faapefea le ituaiga pulu fana lea o le 9mm, o le a le ituaiga fana na fa’aaoga,” o le fesili lea a deSaulles. Na tali le molimau, na te le ilioaina poo le a le ituaiga fana sa fa’aaoga, pau le itu na te mautinoa, o le fana puupuu (handgun) sa fa’aaoga.

Na toe fesili deSaulles i le molimau pe na mafai ona maua i lana suesuega, o fea le pulu fana na muamua fana ao fea fo’i le pulu fana na mulimuli fana. Na tali le molimau, e le’i mafai ona maua i lana suesuega lea tulaga.

Na toe fesili deSaulles i le molimau, pe sa maua i lana suesuega, poo pulu fana nei sa fana i le tasi le vaiaso talu ai, poo le 3 fo’i masina talu ai. Na tali le molimau, e lei maua i lana suesuega le tulaga lea.

O se tasi o mau faamaonia sa mafai ona suesuseina e le molimau, o le kilipa o le fana lea sa maua i ai pulufana o le ituaiga o le 9mm e 5 i totonu. Na fesili deSaulles i le molimau, pe na maua i lana suesuega pe lelei le kilipa sa maua pe leaga fo’i. Na tali le molimau, na fiu e fa’ata’ita’i le kilipa i le fana sa ia fa’aaogaina, e le’i ola le kilipa. Na te le’i mautinoa fo’i pe lelei le kilipa pe leaga.

Na fesili deSaulles i le molimau pe i ai lava se vaega na maua i lana suesuega e faamaonia ai le i ai o se sootaga o Siaumau i lenei mataupu, na tali le molimau, “E leai.”

O le itula e 9:00 i le taeao nei lea ua faatulaga e toe fa’aauau ai talualumaga o lenei mataupu.