Ads by Google Ads by Google

Saunoa Lutena Kovana i le aoga o faiaoga mo le lumanai Amerika Samoa

I le aloaia ai o faiaoga mai aoga a le malo i le tausaga e 2018-2019 i se sauniga sa faia i le lua vaiaso talu ai, na saunoa ai le afioga i le Lutene Kovana, Lemanu Palepoi Sialega Mauga, i le aoga tele o le galuega fa’afaiaoga e ‘aoao ina tama fanau a le atunu’u mo se lumana’i maunuia o Amerika Samoa ma ona tagata.

 

O lea sauniga sa faia i le Tradewinds Hotel e aloaia ai ma fa’amalo i le Faiaoga o le Tausaga a le Territori 2019, le tamaitai o Jordanna Maga, o ia o se faiaoga o le numera i le Aoga Maualuga a Tafuna.

 

Sa aloaia ai foi i lea sauniga i si faiaoga e to’a 13 sa tauva i lea fa’amoemoe. O le susuga i le fa’afegaiga ia Pastor Etuati Ene sa faia le tatala amata, ae sa ia muamua ona fa’ailoa i faiaoga uma sa auai i lea afiafi, “A lelei outou” i le aoaoina o fanau, o le a “lelei le malo, lelei le ekalesia ma le atunuu.”

 

“E faiaoga e fa’amoemoe i ai tapuaiga a matua, aiga, nu’u ma le ekalesia,” o le saunoaga lea a Pasator Ene, soso’o ai ma le tatala amata.

 

I le saunoaga a le fa’atonusili o le Matagaluega o Aoga a le malo, Dr. Ruth Matagi-Tofiga, sa ia fa’amalo ai ia Jordanna Maga, fa’apea ma faiaoga uma sa tauivi i lea fa’amoemoe o le faiaoga o le tausaga mo le teritori.

 

Saunoa foi Dr. Matagi-Tofiga, o faiaoga o le fa’amoemoega lea ose malo ina ia atamamai fanau mo le lumana’i o se atunu’u ma o se tasi lea o lu’itau mo faiaoga.  Ua le gata i lea sa ia saunoa foi e faapea, o le toatele “o i tatou” i le matagaluega e talanoa i le tupe aua o le taui lea, ae mo latou ia ua maua avanoa i lenei tausaga, o lo latou manaoga ina ia manuia fanau.

 

O le afioga i le Lutena Kovana sa avea ma sui o le malo e saunoa fa’apitoa i lea afiafi i le fa’atasiga sa auai nisi o aiga o faiaoga sa aloaia, ae maise o nisi o malo valaaulia.

 

E pei ona saunoa Lemanu, mai le 24-itula o le aso mai le aso Gafua i le aso Faraile, i le taimi o aoga, e tusa ma le “10 itula o le aso o lo’o feagai faiaoga ma alo ma fanau a le atunuu i le potu aoga ma le lotoa o le aoga.”

 

Ma “e  le o aofia ai itula pe a o’o i le afiafi,” o se vaega lea o le saunoaga a Lemanu

 

I faiaoga, sa fa’ailoa i ai e Lemanu, amata mai i le “vasega muamua e o’o atu i le vasega sefulu-lua o lo’o outou ‘ao’ao fanau, taumafai e fa’alelei o latou ola ma soifua aua so latou lumana’i manuia aua foi se manuia i so tatou atunu’u ma le faigamalo.”

 

E pei ona saunoa le lutena kovana, “e pau lea o le galuega - galuega fa’afaiaoga - e le gata e ‘ao’ao taimi i le aoga, ae o outou faiaoga e tou te aooga foi. O po uma tou te faitau. O po uma tou te ta’apena mo le isi aso...ina ia sa’o ma lelei aoaoga mo le fanau i le potu aoga.”

 

“Ua fa’atuatua atu matua, ua fa’atuatua aiga, le faigamalo ma le atunu’u, ekalesia ia te outou faiaoga. E mamafa le avega e le mama,” o se tala lea a Lemanu sa fa’aopoopo atu i faiaoga.

 

I se vaega o le saunoaga a Lemanu sa ia taua ai se fesili sa tuuina atu i se tasi o tamaitai sa tauva i le tauvaga Tausala Lalalei o Amerika Samoa i le masina ua te’a, e uiga i le totogi o faiaoga. Ae o le tali i lea fesili e le o lava.

 

Sa fa’ailoa e Lemanu i le aofia, “o lo’o taumafai lava le afioga i le kovana” Lolo Matalasi Moliga ma ua silafia foi e Matagi-Tofiga “taumafaiga a le afioga i le kovana, e fa’alelei totogi” o faiaoga. Ma fa’afetaia e Lemanu galuega a faiaoga.

 

Sa ia tuuina atu foi le fa’afetai i aiga ma matua o faiaoga, ae maise i latou e i ai fanaua “ona o le faiaoga e le lava se taimi e tausi ai le aiga, e le lava foi se taimi e mafuta ai ma aiga, ona o le naunau ma le ta’apenapena” mo le aoaoina o fanau a le atunu’u.

 

Ua le gata i le Faiaoga o le Tausaga a le Teritori sa aloaia i lea afiafi, ae fa’apea foi ma  le 13 o isi faiaoga sa tauva mo lea tofi. O isi faiaoga sa aloaia e aofia ai, faiaoga mai aoga a le malo e 14 ma faiaoga e to’alima mo itumalo e lima - e aofia ai Manu’a.