O le sauniga mamalu o le tu'ua ai o le Malo e le afioga le Senatoa mai Fitiuta, Manu'a ma Fagatogo i Tutuila na soifua a'e ai. Na fa'atasia le mamalu maualuga o le Malo e afua mai ona taiulu se'ia o'o i le vasega o tagata faigaluega e molimauina le toe sauniga o lana afioga Le na Muaiao Galea'i Moaaliitele LK Tu'ufuli i le Gov. Lee Auditorium i Utulei i le taeao ananafi.

Ina ua alaalata'i le mamalu o le Malo, ona fa'ato'a molimoli atu lea o le Sa o lana afioga ma na ta'imua atu e le afioga le Kovana Sili Lolo Moliga ma ta'ita'i o le Tafatolu o le Malo o Amerika Samoa, le afioga le Peresetene o le Senate, Gaoteote Palaie ma le Fofoga Fetalai Savali Talavou Ale ma le afioga le Fa'amasino Sili Michael Kruse.

O le vaega o Leoleo mai le Matagaluega o le Puipuiga Lautele sa latou leoa le malu ma tautuaina fo'i lona Sa i lona fe'avea'iga. Na ufita'i lona Sa i le Agiagia a le Malo tele, e taualoa ai lana tautua a'o talavou i le Vaega Au o le Fuava'alele po'o le Air Force a le Malo tele.

O le Sauniga sa ta'ita'ia e le susuga le Faife'au Toeaina Asalele Fa'amao o le Ekalesia Fa'apotopotoga a Iesu i Samioa, o lana fa'afeagaiga taulagi i lana Ekalesia i Fagatogo.

Sa saunoa fa'apitoa le kovana sili, "O ituaiga taimi nei e sola ai manatu, aua e le faigofie le tototetele o le pule faito'atasi a le Atua i le soifua ma le ola o le tagata na ia fai. Peita'i, e lua ala ua ou manatu e uia i lenei taeao i lau tautalaga. Ae le faigofie uma nei ala e lua. Afai ou te ui i le ala ma'a, e matuitui ma faigata, e le sopoia lava i so'u iloa ma lo'u nei sui faigata o lena ala. Ona manatu lea i le ala fa'atau, ae matua popo'e le taofi ina ne'i sasi se la'a ma faaletonu ai le sao mo aso fa'apenei. Fitiuta e matua le faigofie lava i tala tu'u ma o'oo'oga o ona tala'aga. Masalo e uma loa Tagaloa ma ona lagi, soso'o loa ma Fitiuta, le uluai Malamalama mai Saua, a'o ia fo'i lea na Mua'iao, o le Pulefano. A faitau fo'i taeao o Fitiuta ua faitau i Maugaoao o le Faleula. Lea ua mafua ai ona le gasolosolo ao, aua ua to le ua i atumauga sili ona maualuluga. O Mauga ia e afua mai ai manuia o le nu'u, peita'i e ui ina maualalalo isi mauga, ae fai ma tepa i ai, mo se fautauaga ma se fa'aatoa i so'o se manuia."

"Aue e le o se agiolela'i ua o'o mai, peita'i ua agi fa'ata'uta'u ma ua malosi, ua o'oo'o tetele i le tai o finagalo, peita'i ua tu le la i luga o mauga, ua tagi fo'i le La. Aisea ea? Fai mai Ao ia Po, ‘E o lo ta fatu ma le eleele, lea ua malaga nei le na mua'iao’. Le afioga Galea'i, o se tasi o mauga maualuga i le atunu'u, lea e fa'alagi e afua mai ai manuia o le Nu'u. E i ai foi mauga iti, e tofu lava uma i tatou ma aoga. E afua mai mauga maualuluga ua o fa'amanuiaga, o uaga e fa'aolaola ai mea uma aemaise o ona tagata, papa ma ma'a ma ia fa'amalie le galala o le eleele, le atunu'u pele."

"O le toe o'o atu lava a Galea'i i lo'u ofisa i lenei tausaga, o le fia avatua o lana lisi o mea e fia fa'ataunu'u. Peita'i ina ua mae'a le ma'ua talanoaga ma ua ou va'ai fo'i i le lisi na fa'ao'o atu, ona ia toe saunoa mai lea, ‘Lolo a mae'a mea ta'itasi na, ia manatua le Atua’.”

I lana lauga e fa'amalosi i le aiga, le malo fa'apea fo'i ma le fanau ua tu'ua sa fa'apea ai le Ta'ita'i o le sauniga, "O ai le ali'i sili ua ta'ua, o Apineru le Ta'ita'i a le Tupu o Tavita. O le na talia pulufana, talia ufanafana, na te talia le pelu ina ia fa'asao i le tupu i so'o se taimi e lama mai ai e ona fili. Lea ua maliu ma ua ave i ai le fa'amuamua a Tavita le Tupu, ua agatutusa lava ma se mea e fa'atino mo ia le tupu. Aisea? Leaga sa fa'alagolago i ai lana pulega. O lana tu'ualalo e sili ona fia fa'alogo i ai le tupu i taimi o le vevesi ma le fitaituga ai o le malo ma lana ta'ita'iga. O lana fautua mai e taua ia te ia, aua sa vavalalata lava i laua i taimi uma. Ua iloa fo'i e ia le agaga o le Tupu i lana nofoa'iga."

Na fa'aauau lana lauga ma ia fa'apea ai, "Lea la ua fa'apea ai se lagona o le Tupu ma ia fa'apea ai, "Mauga o Kilepoa e, aua lava ne'i toe toulu i ai se sau po'o se ua!" Ua taofia ea le foafoaga ona o le maliu ai le ta'ita'i toa ma le fa'amoemoeina? E leai, ae ao lava ina maua na'o sina minute pe lua, tatou te fa'asifo ai se toe fa'amanatu mai ia i tatou uma o lona sao aoga i le tatou malo ma ona ta'ita'i sa latou soalaupule i le tele o mea, aua se manuia o lenei atunu'u atoa. Sina taimi itiiti e taofia ai lo tatou olaga ae se'i avatu ia te ia se fa'amuamua e fa'afetaia ai lana tautua ua au ma ua tatou aeae i manu ua maua."

Ona tutula'i lea o le fa'apotopotoga, ae faia se tatalo leleoa a le tagata lava ia e fa'afetaia le Atua mo lana meaalofa taua mo Amerika Samoa e ala i le olaga tautua ma le aoga o le afioga ia Galea'i.

O le avanoa na soso'o ai o le Failautusi a le Maota Maualuga mo le faitauina o le Iugafono malilie fa'atasi a le Fono Faitulafono e taualoa ai le tautua matavela a le afioga Galea'i i lona Malo, i lona aiga, ae maise i lana Ekalesia ma ona tagatanu'u uma.

Sa saunoa Gaoteote i le soifua galulue fa'atasi ai ma Galea'i ma fa'ai'u ai ina taua'aoina aloa'ia e ia lea iugafono i le alo o Galea'i , Malamamaisaua Galea'i -Sauafea.

I sana molimau sa ia fa'ailoa fo'i, le agaga o Galea'i i so'o se mataupu, e matua fa'ailoa ai lona loto nu'u ma lona alofa i tagata lautele. E finau malosi i le mea sa'o, e le finauvale. E fautua lelei, e tomuli ia te ia manatu ina ia mautu ni fa'aiuga, e taula fo'i ia te ia le tofa ina ia mautinoa se iuga lelei ua matou solaupule ai. Lea ua tu'ua le galuega, fa'afetai Galea'i mo lou tula'i mai e fa'atonu ma fa'amalosi, e fautua ma fa'ailoa mai mea e lelei ai. E le faigofie ona maua ni tama fa'apenei, ae faigata fo'i ona talia gofie le pagatia ua o'o mai nei. A malie lona loto i se fa'aiuga, e tamau la'u va'ai ua tu'u lona lima i lona fatafata, ae a pagatia lona finagalo i se mataupu o tau faia i ai se faaiuga ma ua le tonu fo'i se fa'aiuga ua faia, e matua punou ma toto'o lima lua o ia i luga o lana kesi, ua iloga e le o fiafia lona loto i se iuga o se mataupu sa vagaia e le Maota. O ona uiga va'aia na, e taula i ai la'u va'ai, ona ou iloa lea o sona finagalo natia."

"Paga lea, ua vala'auina, alu loa. Fa'afetai mo lou fa'ato'ato'a mai, fa'afetai i lau fa'asoa mai, fa'afetai i lau fautua mai, fa'afetai e te le'i tu ma fa'atuai sau fetalai."

Na molita'i mai le faiteu a faletua ma tina o le Fono faitulafono ma le ufita'i e $1,000. Peita'i ina ua mae'a fa'alele mai ietetele o fa'aaloaloga i le pa'ia o le Aiga tupu, ona molita'i mai lea i le $20,000 e taualoa ai lona se'ei i le tofi o le itumalo ma maliu ai.

Na fa'aaloalo fo'i i lana afioga le Kovana SIli, Fa'amasino Sili ma le Ta'tia'i o le sauniga ona faia lea o le taumafataga ae tatalia ai le amatalia o le sauniga o lana afioga Senatoa Galea'i lona aiga, ma e masani ao le'i molita'i atu lona Sa i Tafuna mo le taliga o aiga ma moe ai mo le po atoa. Alafai i le taeao nei e faia ai lona sauniga i le Malumalu Fa'apotopotoga a Iesu i Samoa Fagatogo.