Ads by Google Ads by Google

Sauni au fusu a le atunu’u e puipui Ipu Siamupini o le Teuila


Le au fusu a le atunu’u fa’atasi ai ma le au malaga i le latou ata sa pu’eina i le tausaga na te’a nei, ina ua mae’a le ta’amilosaga o le Teuila sa faia i Samoa ia Setema, 2017, lea na latou manumalo ai i le Ipu mai Samoa. [ata AF]
ausage@samoanews.com

Ua sauni atu nei le au fusu a le atunu’u e puipui le ipu o le siamupini o le ta’amilosaga o le Teuila i le masina fou, lea na latou manumalo ai i le ta’amilosaga sa faia i Samoa i le Teuila o le tausaga na te’a nei.

 

I se feiloaiga ma le Samoa News i le aso Faraile o le vaiaso na te’a nei, na taua ai e le faiaoga o le au fusu a le atunu’u, le afioga a Sala Sanele Etuale le sauni lea o le au fusu a le atunu’u e puipui le latou siamupani sa manumalo ai i le tausaga na te’a ei.

 

O le au fusu mai le kalapu fusu o le American Samoa Amateur Boxing Federation (ASABF) na fai ma sui o Amerika Samoa i le ta’amilosaga o fusuaga fa’avao malo o le Teuila International Boxing Championship a Samoa, lea sa fa’ataunu’uina i le vaiaso o le Teuila ia Setema o le tausaga na te’a nei.

 

I le fa’aiuga o lea ta’amilosaga, na sola mai ai le au fusu a Amerika Samoa ma le Ipu o le siamupini, ina ua latou maua malo e 5 i le 4 o manumalo a Samoa.

 

Saunoa Sala e fa’apea, ua sauni le ‘au fusu a le atunu’u e puipui le siamupini o le ta’amilosaga o le Teuila, lea na latou manumalo ai talu mai le tausaga na te’a nei.

 

“O lea ua sauni le au fusu a le atunu’u mo le puipuiina lea o le Ipu o le siamupini o le Teuila. E ui i le faigata o le ta’amilosaga e pei ona sauni atu i ai le au fusu a le atunu’u, ae i ai le talitonuga ua sauni le ‘au e puipui le siamupini,” o le saunoaga lea a Sala.

 

O le ta’amilosaga o le a tausinio ai ali’i ma tama’ita’i fusu mai le ASABF, ma le au fusu a le Samoa Amateur Boxing Association (SABA). E pei ona tuuina mai i le polokalame mai Samoa, e 2 aso o le ta’amilosaga, lea ua fa’amoemoe e faia i le aso 5 & 6 Setema 2018 i le nofoaga masani o le Tuana’imato Sports Complex.

 

O le au fusu e pei ona fa’amaonia mai e le ASABF e aofia ai Falaniko Tasi, Kaisa Ioane, Jolando Taalo, Keresema Tafa, Mamona Tafa, ma le tama’ita’i o Onolina Viliamu.

 

“O le aoga o lenei ta’amilosaga, o le a mafai ona fesoasoani ai i tapenaga a le au fusu mo isi ta’amilosaga o loo mulimuli mai i le lumana’i, aemaise ai fo’i le ta’amilosaga a le Mosooi mo le masina o Oketopa o le tausaga nei, atoa ai ma le ta’amilosaga o le Youth Olympic lea ua sauni atu i ai le ali’i o Tasi e fai ma sui o Amerika Samoa,” o le saunoaga lea a Sala.

 

“O le taua o ta’amilosaga fa’avaomalo fa’apenei, e maua ai le avanoa o fanau e fa’aali ai le taleni ua latou maua, aemaise ai o le avanoa e ta’aalo ai ma isi fo’i ali’i ma tama’ita’i fusu ina ia fa’atuputele ai le taleni ma masani ai i ta’aloga tetele o loo mulimuli mai.”

 

O ali’i e to’atolu ia ua filifilia i le au fusu a le atunu’u e pei o Tasi, Ioane ma Taalo, o ni isi na taua e Sala ua iloga lo latou iloa i le ta’aloga, ua tele fo’i taimi ua latou manumalo ai i pine auro mo Amerika Samoa.

 

O Ioane ma Taalo o loo koleni i laua i Samoa i le taimi nei, ma ua fa’amoemoe e feiloa’i ma le ‘au a le atunu’u pe a malaga atu i le amataga o le masina fou i Samoa, ma sauni ai loa ma le ta’amilosaga.

 

O Ioane ua tele o tausaga o fusu mo Samoa, ma ua fa’atele fo’i ona ia manumalo i pine eseese mo le atunu’u, e aofia ai pine auro, pine siliva, fa’apea ai ma pine apamemea.

 

O le tausaga e 2006 na amata koleni mai ai Ioane mo le ta’aloga fusu, ae o le taimi lea fa’atoa 12 ona tausaga. Sa ia taua i le Samoa News le tele o tagata fusu lauiloa i le lalolagi sa ia mana’o e fa’ata’ita’i i ai ina ia avea o ia e pei o se tasi o i latou nei.

 

I le va o le 2006 seia oo mai i le 2015, sa ia manumalo ai i pine eseese mo Amerika Samoa, mai ta’amilosaga eseese sa fai ai o ia ma sui o le atunu’u.

 

A o le i fusu Ioane mo Amerika Samoa, sa mua’i fusu o ia mo lona atunu’u o Samoa. O ni isi o ta’amilosaga sa ia tausinio ai mo Samoa e aofia ai ta’aloga a le Pasefika i Saute i le 2007, lea na ia manumalo ai mo lana ulua’i pine auro, sosoo ai ta’aloga laiti a le Pasefika i Rarotonga i le 2009, lea fo’i na ia toe manumalo ai i le isi pine auro.

 

O le tausaga e 2010 ma le 2014 sa fai ai o ia ma sui o Samoa i ta’aloga a Malo o le Taupulega (Commonwealth Games) i Delhi i Initia ma Glasgow i Sikotilani, ma e lei fa’amanuiaina lana taumafaiga i is fusuaga i se pine.

 

O le ali’i o Tasi lea ua filifilia e fai ma sui o Amerika Samoa i le ta’amilosaga o le Youth Olympic i Argentina i le masina o Oketopa o le tausaga. Ua tele ta’amilosaga sa tausinio ai o ia mo Amerika Samoa, ma ia manumalo ai i pine eseese e aofia ai pine auro, siliva ma le apa memea mo le atunu’u.

 

O le ta’amilosaga mulimuli na fai ai Tasi ma sui o Amerika Samoa, o le ta’amilosaga a le Oceania lea na faia i Apia i le masina o Me o le tausaga nei, lea na ia manumalo ai i le pine apa memea.

 

O le isi sui ua iloga lana taumafaiga mo Amerika Samoa, o le susuga a Taalo, lea fo’i ua tele ta’amilosaga fa’avaomalo ua fai ai o ia ma sui o Amerika Samoa, e aofia ai ma le ta’amilosaga a le Oceania lea na faia i Apia i le masina o Me o le tausaga nei, lea na ia manumalo ai i le pine auro mo le atunu’u.

 

E tusa ai o le tulaga ua i ai tapenaga a le ‘au fusu mo Samoa, na taua ai e le ali’i faiaoga ia Sala e fa’apea, e maualuga lona talitonuga e ono toe manumalo Amerika Samoa i le Ipu mo le ta’amilosaga o le Teuila o lenei tausaga.