Ua lagona i tulimanu e fa o le atunu’u lagona o le fiafia ma le fa’agaeetia o le to’atele o tagata faigaluega i le malo aemaise ai lava i Pisinisi ma Kamupani tumaoti, ina ua aloaia le isi siitaga e .40sene i totogi amata maualalo mo galuega i le atunu’u.

O le aso 30 o Setema 2018, na aloaia ai le isi siitaga mo le totogi amata i Amerika Samoa, e pei ona aiaia i le Tulafono na pasia e le Konekeresi i tausaga ua mavae. E 17 pisinisi ma kamupani tumaoti i Amerika Samoa o lo o aofia ai i totonu o le tulafono e pei ona pasia ma fa’amalosia e le feterale, mo le si’itia lea o totogi amata ina ia ausia le maualuga ua fa’atulafonoina mo tagata faigaluega i le itula.

I lalo o le Tulafono fou e siitia ai totogi amata, o le kamupani ‘ia - StarKist - o se kamupani pito sili lea ona to’atele e galulue ai i Amerika Samoa, e aofia ai ma le kampuani gaosia le apfa i Satala, ua si’itia nei i le $5.56 i le itula.

O le malo o Amerika Samoa, lea e pito ona to’atele tagata faigaluega o lo o galulue ai i Amerika Samoa, ua tula’i mai nei le totogi amata i le $5.21 i le itula.

Na taua e se sui o le faigamalo a Amerika Samoa i le Samo aNews e faapea, o le paketi a le malo mo le Tausaga Tupe fou 2019 lea na amata aloaia i le aso 1 o Oketopa, 2018, o lo o aofia ai ma le tupe ua fuafua mo le siitaga o totogi amata mo tagata faigaluega o lo o aofia i lenei si’itaga fou.

E le i mafai e le sui o le malo ona tu’uina mai i le Samoa News, le aofa’i sa’o o tagata faigaluega a le malo o lo o aofia ai i latou i le si’itaga o le totogi amata.

Talu mai le aso 30 o Setema na te’a nei e pei ona fa’amamalu aloaia ai le isi siitaga mo le totogi amata i le atunu’u, o le totogi maualalo pito maualuga ua i ai nei i Amerika Samoa, o totogi ia o pisinisi la’u uta faapea ai ma Faalapotopotoga o Va’a, lea ua $6.39 i le itula le totogi ua i ai, ae o le totogi pito maualalo i le taimi nei ua tula’i mai i le $4.98 mo fale su’isu’i.

O lo o taua fo’i i le tulafono fou e pei ona tu’uina mai, o isi gaioiga i ni isi o kamupani e aofia ai ma i latou o lo o fa’a faigaluega i galuega i totonu o aiga, ua si’itia nei i le $5 i le itula lo latou totogi amata.

O galuega e taua o galuega i totonu o aiga (Domestic Worker), o lo o aofia ai i latou uma o lo o auina mai i fafo atu o Amerika Samoa e fa’atinoina galuega i totonu o aiga e aofia ai fa’atoaga ma galuega tausi tama.

Na fa’amanino e le Matagaluega o Leipa a le malo tele i le tausaga na te’a nei e fa’apea, o tagata o lo o aumai i Samoa e fa’atino galuega e pei o galuega teu fale atoa ai ma le tausi pepe i aiga i Amerika Samoa nei, o i latou uma ia e aofia i lalo o le tulaga lea o le Tulafono.

Ua i ai le fa’amoemoe o le a tuuina atu e le Vaega Faapitoa e iloiloina totogi amata i Amerika Samoa sa latou ripoti i le Kovana, e tusa ai o le a’afiaga o le tamaoaiga o le atunu’u e ono tula’i mai talu ai lenei si’itaga fou ua aloaia e le malo tele. E to’a 10 totino o lea Komiti Faapitoa.

O lo o fa’aauau sailiiliga a le Komiti lenei i auala e a’afia ai le tamaoaiga o le malo ma le atunu’u, e mafua mai i le si’itaga fou o totogi amata e pei ona aloaia nei.

I le tula’i mai ai o le si’itaga fou i totogi amata i lenei vaitaimi o le tausaga, na fa’aalia ai e ni isi o tagata faigaluega lo latou talisapaia ma le agaga fiafia o le siitaga ua i ai, ae o ni isi sa latou taua le leai o se uiga o le si’itaga, pe a fa’atusatusa i le tulaga maualuga ma le taugata ua i ai le tau o le soifuaga i le taimi nei i le atunu’u.

O i latou o lo o talisapaia le si’itaga sa latou taua e fa’apea, tusa lava poo le a le laititi o le si’itaga e fa’aopoopo i le siaki, o le itu taua ua mafai ona maua lenei fa’aopoopoga e fesoasoani ai i le atina’eina o aiga.

Pe a fa’atusatusa i le 10 tausaga talu ai, sa matua laititi lava le aofa’i o le totogi e fo’i ma le tagata faigaluega a le kamupani i’a i lona aiga, peita’i o le suiga ua i ai le siaki talu ona pasia le tulafono e sii ai totogi amata, ua molimauina ai se suiga tele i siaki a tagata faigaluega, e pei ona fa’aalia e le to’atele.

Ae mo i latou e le o lagona le taua o lenei si’itaga, sa latou taua e fa’apea, e leai lava se uiga o le si’itaga ua tuuina mai, e uma lava ona toe alu i le taugata o le tau o oloa ua i ai le atunu’u i le taim nei.