Ads by Google Ads by Google

Samaga Malofie a Tama’ita’i i Fagaima - Li’aifaiva Imo Levi


O i latou na ua mae'a lelei a latou la'ei Samoa moni ma sa galue ai Li'aifaiva Imo Levi o le Aiga Sa Lavea i a latou malofie. Ua faaalia uma ana galuega mo le silafia e le mamalu o le atunu'u. O le afioga le Matuaofaiva Li'aifaiva Imo Levi ua ogatotonugalemu ia i latou uma. [ata: Leua Aiono Frost]

E tasi lava le aso na taina ai i latou, malolo ma sama ai i le aso na soso'o ai Iuni 6, 2018. Malo le onosa'i. O i latou ia: Sialafaga Taufete'e Solomona, Sophia Ah Fook ma Sa'olotoga Uesiliana Fa'asavalu. [ata: Leua Aiono Frost]

O i latou na sama i le afiafi o le aso 6 Iuni, 2018 i le Maota o Fa'asavalu i Fagaima. O i latou ua i ai fa'atasi ma le Tausala Lalelei o le Pasefika, Matauaina Toomalatai, e maimoaina lea fo'i aganu'u. [ata: Leua Aiono Frost]

O le samaga o tama'ita'i ua matu'u fo'i i tamaitai ua mae'a la'eia le Malofie a Tamaita'i latou te fa'atinoa, matagofie lava faiva. [ata: Leua Aiono Frost]

E to'atolu tama'ita'i ua mae'a sama latou la'ei Samoa moni i le afiafi o le aso Lulu, Iuni 6, ma sa faia lea fa'aleaganu'u i le Maota o Fa'asavalu i Fagaima.

 

O i latou nei o Sialafaga Taufete'e Solomona, Sophia Ah Fook ma Sa'olotoga Uesiliana Fa'asavalu, lea sa malaga mamao mai Anchorage Alaska mo lea fa'amoemoe.

 

Ua fa'ailoa mai o le lona tolu ai lea o galuega ua fa'atino e Li'aifaiva Imo Levi ua ia taina i Amerika Samoa, ae na mua'i fa'atasi mai fo'i o ia i lona vala'aulia fa'apitoa i le Tisa's Tatau Festival i Alega, ma sa fa'aalia ai nisi o ana galuega i lea fa'aaliga 2016.

 

O Malofie uma lava a tama'ita'i lea ua mae'a ona taina e ia i Amerika ona o tulaga o le taimi e utiuti, ae le'i taliaina muamua e ia ni talosaga mo Tatau a Ali'i se'ia mautinoa ua lava lona taimi avanoa i Samoa e malaga mai ai mo galuega umi fa'apena.

 

"Ona o le faigata ona motusia mai Samoa o galuega fo'i o lo'o fa'asolo ai, e ala ai ona le talia se tatau e galue ai iinei, peita'i ua i ai laina o feso'ota'iga e mafai ona talosaga atu ai nisi, a maua loa le taimi paganoa, ona malaga mai loa lea mo malofie a ali'i,” o sana tala lea e tusa o le leai se tatau a ali'i ua ia taina iinei.

 

O le tulaga o la'ei a tama'ita'i sa ia fa'ailoa mai ai, "O malofie a tama'ita'i e ala ona ou sau e ta aua e vave lava, e tasi le aso ae o lea ua mae'a lelei le tolu o la'ei nei, ae maua fo'i le aso e malolo lelei ai fa'ato'a sama."

 

I le galuega ua ia faia nei, sa fa'alauiloa mai ai e Li'aifaiva lona tupuaga mai, atoa ai ma le faiva ua ia fiafia nei e tautua ai.

 

"O a'u lea ua fa'amanuiaina i le suafa ‘Li'aifaiva’ o le matou Aiga Sa Lavea, ma ua fa'amanuia mai fo'i tama matutua ae maise lava si o'u tama, Lavea Malagamali'i Fosi Levi, o le alo fo'i o Lavea Levi, lea sa avea ma fofoga o Samoa i le alaleo 2AP i aso ua mavae."

 

"O le faiva fo'i o le Tufuga Ta Tatau i Samoa, o lo'o ua fa'amaumauina, o lea faiva na fa'amatu'u atoatoa ia i le Auaiga o Sa Su'a, ae maise o le Auaiga Sa Li'aifaiva Lavea. Ae ua faamautuina fo'i i tusitusiga ma sailiga, o le susuga Li'aifaiva Pauli sa ia sausaua le ulua'i malofie a Tualatamaalelagi. O se tofi ua tatau ona toe fa'aa'e e lenei auaiga Sa Lavea."

 

[O se vaega o le tusi "La'ei Samoa Moni" o lo ua fa'amauina ai lea faiva ma ona tufuga tamau.]

 

I Samoa lava latou ua avea ma malo e tautua mai ai Li'aifaiva Lavea e galue tumau ai, peita'i ona o vala'aulia ma nisi o galuega e tu'ufa'atasia e nai ona aiga i Niu Sila ma Ausetalia fa'apea ma Amerika e mafua ai ona malaga o ia, ae le umi se taimi e na te tu'ua ai lona nofoaga mautu mo lana tautua.

 

Ua i ai laina o feso'ota'iga ua ia tu'uina mai, e mafai ona feso'ota'i atu ai nisi e fia la'ei i le Malofie a tama'ita'i po'o ali'i fo'i. O lea emeli - lavealevi@gmail.com ae o lana Facebook Tuatusi: LIAIFAIVA MALOFIE.

 

O iina e mafai ai ona e talanoa vavalalata mo sau La'ei Samoa Moni e galue ai lenei tufuga talavou ma le sogasoga fo'i.

 

I lona faiva ua ia fa'atauaina le tulaga o mama lelei o mea faigaluega. A mae'a ona fa'aaogaina nila i so'o sana tataga, e suia nila e tanumia fa'atasi uma fo'i mea na fa'aaogaina mo lou la'ei ina ia mautinoa e le afaina se tasi i se fa'ama'i tuga ona o le galuega.

 

E to'alua ana soa e latou te galulue fesoasoani ia te ia, ma e talavou uma lava i latou. O susuga Li'aifaiva Imo Levi e fa'ato'a 28 tausaga o lona soifua, ma ua le ma faitauina le tele o malofie ua mae'a taina e ia i Samoa, i tama'ita'i fa'atasi ma ali'i. Peita'i i Amerika Samoa, ua fa'ato'a fa'atolu lea ona ia galue iinei, ma sa faia le isi galuega i le vaiaso ua te'a ma sama ai fo'i e to'alima, ae to'atolu mo lenei vaiaso, peita'i o le lua tausaga talu ai, na ia mua'i galue ai i nisi o malu e lima ma isi sa malaga atu i Samoa mo latou la'ei.

 

"Ona o tulaga e le o maua se avanoa i Samoa, o le taimi lava e mae'a ai ona galue i Malofie a Ali'i i Samoa, maua se lua aso, ona fa'ato'a mafai lea ona fa'aofi atu galuega iinei, ae ua na'o tama'ita'i lava i le taimi nei, aua e le umi. Peita'i o lea o le a toe taga'i lelei i se isi fa'atulagaga, e maua lava feso'otaiga ma malilie ai i se taimi atofa mo galuega iinei e ala i tatau a ali'i."

 

O se fuafuaga lea ua i ai, e auai fo'i o ia i le Setete o Uosigitone i le fa'ai'uga o lenei masina mo le fa'aaliga tele o le a faia ai, sa i ai muamua fo'i o ia i lena setete i le tausaga ua mavae.

 

O se tasi ua iloga ona maimoaina e le to'atele lana malofie a tama'ita'i o le tatou tausala lalelei mo le tausaga e 2016-2017 Antonina Lilomaiava, lea sa ia galue ai i Samoa.

 

I sana saunoaga, "E fa'ataua e oe lou faiva o le fa'aaloalo ma le le gaoia, e le fa'alialiavale ae ia teu ia matua teu lou la'ei, e i ai lona lava mamalu." O le fa'ailo o lana auaunaga i Samoa ua i ai ana saini "Li'aifaiva Malofie..o le Ata o le Fa'aaloalo!"