O le aso Faraile o le vaiaso na te’a nei na pu’e fa’apagota ai e Leoleo Faapitoa mai le Matagaluega o le Puipuiga o le Saogalemu Lotoifale se tagata o le malo o Tonga na ulufale mai i Amerika Samoa i le vaiaso na te’a nei, e mafua mai i se tusi saisai mai le Setete o Uosigitone.

O le aso Gafua o le vaiaso lenei na fa’amoemoe e faia ai le iloiloga faapitoa a le alii o Paul Harman i luma o le Fa’amasinoga Maualuga, peita’i na toe tolopo e le afioga i le alii Fa’amasino Sili ia Michael Kruse lea iloiloga seia aulia le aso Lulu o le vaiaso fou. O le ali’i Loia Tua ia Charles Alailima o loo tulai mo Harman ae o le tama’ita’i loia sili lagolago ia Christy Dunn o loo tula’i mo le malo.

O le aso Lulu o le vaiaso na te’a nei, Nov. 14, 2018 na sainia ai e le afioga i le alii Kovana ia Lolo Matalasi Moliga se poloaiga e pu’e faapagota ai lenei ali’i, atoa ai ma le toe fa’afo’iina atu o ia i Uosigitone e tali i moliaga fa’asaga ia te ia.

Na fa’amaonia mai e le Fa’atonusili o le Matagaluega o le Puipuiga o le Saogalemu Lotoifale ia Samana Ve’ave’a le taulimaina lea e lona Ofisa o le mataupu faasaga ia Harman. O loo latou galulue fa’atasi fo’i ma sui o le Ofisa o Leoleo mai King County i le Setete o Uosigitone, mo le fa’amautuina o vaega uma e toe fa’afo’i atu ai Harman e tali i moliaga fa’asaga ia te ia.

Saunoa Samana e fa’apea, o Harman o loo tau sailia e Leoleo mai Uosigitone ona o lona le usitaia o tuutuuga sa tatala ai o ia i tua, e ala i lona le auai lea i le aso na valaau ai lona fa’amasinoga.

Ona o lea tulaga, na tuuina mai ai loa e le fa’amasinoga se poloaiga i le tausaga e 2010 e pu’e fa’apagota ai Harman. Talu mai lava lea taimi, e lei toe maua e Leoleo mai Uosigitone se fa’amatalaga e uiga i lenei ali’i.

Ae pei ona taua e Samana i le Samoa News, sa nofo muamua Harman i Amerika Samoa i tausaga ua mavae, peita’i e leai se isi na ia iloaina le mataupu e pei ona a’afia ai o ia i le malo tele. I le mae’a ai ona aumau o Harman i Amerika Samoa nei, na toe fo’i atu ai loa o ia i lona atunu’u o Tonga.

Ae ana le toe talosaga mai lava o ia mo se pemita e toe ulufale mai ai i le teritori i le masina na te’a nei, e le mafai ona alia’e lenei mataupu. Na taua e Samana le faia o se suega masani e iloilo ai talaaga o tagata mai fafo e fia ulufale mai i le atunu’u, ma fa’afuase’i ai loa ona manu a’e i luga le tusi saisai fa’asaga ia Harman.

Ina ua taunu’u mai o ia i Amerika Samoa, na fa’atoa faia ai loa le faaiuga e pu’e faapagota o ia i le aso Faraile na te’a nei.

TAGI FA’ASAGA IA HARMAN

E pei ona taua i le tagi tusitusia mai le Setete o Uosigitone fa’asaga ia Harman, o le aso16 o Tesema 2008 na pue fa’apagota ai e Leoleo lenei ali’i ma taofia i le falepuipui i totonu o King County, ona o tu’uaiga i lona fa’amalosia o se teineititi e i lalo o le 12 tausaga le matua.

O le aso 19 o Tesema na tatala ai loa i tua Harman i le mae’a ai lea ona ia totogiina o le tupe e $100,000 sa fa’atulaga e le fa’amasinoga e tatala ai o ia i tua e fa’atali ai lona fa’amasinoga.

O le aso 23 o Tesema o le tausaga lava lea na fa’atoa molia ai loa e le malo ia Harman i moliaga e 2 o le fai’aiga ma se teineititi e i lalo o le 12 tausaga le matua, atoa ai ma le moliaga o lona faia o uiga mataga le taupulea i se teineititi e talavou i lalo o le tulafono.

O le aso 14 o Ianuari, 2009 na fa’atulaga ai loa e le Fa’amasinoga tuutuuga e tatala ai Harman i tua, a o fa’agasolo ai lona fa’amasinoga. O ni isi o ia tuutuuga e aofia ai le tatau lea ona ia auai i soo se taimi e valaau ai lana mataupu, e le fa’atagaina fo’i o ia ona tuua le atunu’u se’i vagana o se poloaiga mai le fa’amasinoga.

Ae ina ua toe valaau le mataupu a Harman i le aso 31 o Mati 2010, sa lei auai le ua molia, o le mafua’aga lea na sainia ai loa e le fa’amasinoga le tusi saisai e pu’e fa’apagota ai o ia.

Na fiu le Ofisa o Leoleo mai le Setete o Uosigitone e tau saili poo fea ua aga’i i ai Harman, ae ina ua latou maua ripoti o loo i ai o ia i Amerika Samoa nei, na tuuna mai ai loa se talosaga ina ia toe fa’afo’i atu lenei ali’i e tali i ona moliaga i le Setete o Uosigitone.