Ads by Google Ads by Google

POLOKALAMA FA'AMAMA A.S. - AOTELEGA O LE LAPISI UA MAE'A AOINA


O le susuga Latu Kupu o le Pule o Fefa'ataua'iga i le GHC Reids ma lana aufaigaluega patino i le fa'agaoioiga o le toe fa'aliliu o atigiapa alumini ma le toe fa'afo'ia mai i totonu o atigi fagu vailima ina ia toe fa'afo'i. Fa'afetai mo la outou tautua. [ata: Leua Aiono Frost]

I le tautua toe fa'aliliu ma toe fa'aaoga o atigiapa alumini ma le atigi fagupia Vailima, ua matua fa'afetai mai aua ua fa'ateleina le aotelega o lapisi ua mae'a fa'ao'o atu i le lotoa ale GHC Reid i Tafuna ina ia toe fa'aliliu ma uta ese atu i fafo e toe fa'aaoga mai.

 

"O lea ua matauina le polokalama o le a maea le 6 masina talu ona amatalia mai, ua aoga tele i le taumafaiga e ao mai le atigi apa alumini ia lava ni uta e la'u i fafo mo le toe fa'aliliu ma toe fa'aaoga. O le polokalama lea o le fa'amama o lo'o va'ava'alua ai i matou ma le ASEPA,” o se tala lea a le susuga Latu Kupu o le GHC Reid.

 

Sa auai sui o le ASEPA, o i latou ia o lo'o va'ava'alua ma le GHC Reids ina ia fa'atautaia le Polokalama Fa'apa'aga ma nisi o fa'alapotopotoga, Aiga ma le mamalu lautele o le atunu'u, ia aoina mai le lapisi o atigi apa, atigi fagu ma atigi fagu palasitika fo'i, ina ia toe fa'aliliu ma fa'aaoga.

 

Sa auai foi le tama'ita'i faia'oga Mrs Mahuka ma ni sui o lana vasega mai Samoana High, ona o lo ua manatu i latou e faia se latou sao lea polokalama.

 

E lua kamupani Fa'ataua mai Vaiinu Suamalie i le atunu'u ua aofia i lenei galuega fa'amama, o le GHC Reid ma le Pago Pago Trading Company. O lo ua mafai la ona fa'auia le atigi fagu palasitika i le PagoPago Trading.

 

O le aso lenei, Setema 14, e maea ai lenei polokalama.

 

"Mai le amataga o lenei Poloketi Fa'apa'aga sa lesitala mai le silia ma le 20 o fa'alapotopotoga, sosaiete, afio'aga, Ofisa ma Aiga o le a latou aoina maia nei ituaiga o lapisi, peita'i o lea ua fa'agasolo pea le polokalama ae ua iloga e na'o le 10 ma ona tupu o i latou na lesitala o lo ua matua tu'u mai lava o latou loto e fa'atino ai lenei fa'amoemoe,” o se fa'apupulaga fa'alaua'itele lea a Kupu.

 

I lea taeao ua aoga tele le maimoaga sa fa'atino e le mamalu na pa'au atu, ua va'aia le fa'agaoioiga o le galuega pe a mae'a ona malaga atu ta'avale ma ao mai fa'aputuga atigi apa alumini ma atigi fagu vailima mai i e sa fa'aputu. Ua va'aia fo'i le tele o le atigi apa e mafai ona fa'amomi ina ia itiiti ai le avanoa e fa'aalu i totonu o pusa oloa tetele aua le la'uina i fafo e toe fa'aliliu.

 

Ua va'aia fo'i faiga a le Vailima Beer, e aumaia lava le pusa oloa o latou fagu pia e fa'atau mai, o le Pusa oloa fo'i lea e toe mo'omia ona fa'afo'i atu o atigifagu, ae toe aumaia le latou tupe atofa mo lea uta atigifagu.

 

"O lona uiga i lea faiga, o le aofai lava o le atigifagu na aumai, e tatau ona toe fo'i i Samoa mo le toe fa'aaogaina, ae le toe lelei loa le atigifagu, ona fa'anuti lea ma tanumia i Samoa,” o se fa'amatalaga lea a le tama'ita'i Pule Sili o le GHC Reid Cherith Lober.

 

I lea taeao sa fa'apupula atili mai le tulaga o i ai nei ituaiga o lapisi i le atunu'u. "Ua fa'ateleina lava lenei ituaiga o lapisi aua e le na'o i matou ma le Pago Pago Trading Company o lo'o la'uina mai le tele o oloa apainu, fagu vai ma fagu pia, ua na'o le Vailima fo'i le fagu pia o lo'o toe fa'afo'i a latou atigifagu. Masalo ua tatau ona fa'atulafonoina i faipisinisi e la'ua mai oloa nei, le toe faia o se latou fuafuaga fa'ataoto e toe la'u ai e i latou a latou lapisi mai a latou oloa,” o se manatu lea na fa'aalia e se tasi o sui sa auai i lea fa'atasiga. Na sapaia e le ASEPA lea tulaga. 

 

O nisi o mea aoga sa fa'ailoa mai e Lober, "O le taumafaiga e toe fa'afo'i le atigi apa ma le atigi fagu e le faigofie ona faia, ae taumafai ona fa'apa'aga fa'apenei i polokalama matagofie fa'apenei, ina ia mafai ona aoina mai le tele o lea ituaiga o lapisi ina ia toe fa'afo'i, aua o lo'o talia mai le toe fa'afo'i atu e i matou."

 

Lona lua sa ia fa'ailoa, "Afai fo'i e te manatu e te maua se tinoitupe tele pe afai o le a e tula'i e faia sau pisinisi toe fa'aliliu ma toe fa'aaoga e pei ona matou tapena nei i ai, e le faigofie ona e maua se polofiti aua e taugata le aoina mai, e le fia faia fo'i e se tasi i aso uma lea ituaiga o tiute, ae a o'o fo'i ina la'u mai i ta'avale e alu ai le aso atoa ae le'i uma mai itu taitasi o le atunu'u, atoa ai ma le kesi o ta'avale ma totogi o tagata faigaluega."

 

"Ona aumai lea ua tapena mo pusa oloa tetele mo le la'u ese atu i fafo, e tausailia fo'i se kamupani latou te mana'omia ona avatua i fafo tatou lapisi alumini ma palasitika e fa'aliliu ai ina ia toe fa'aaoga mai. O le tau fo'i o pusa oloa tetele e toe ave ai, e le taugofie ae taugata a'o lapisi nei e la'u!"

 

Sa fa'afetaia e Lober le Kamupani Va'a a le Swire. "O le kamupani va'a a le Swire lea ua latou ofoina mai se tau taugofie mo nei ituaiga o pusaoloa e la'u ese atu ai le lapisi alumini, fa'afetaia ai lena agalelei, ae le o i ai se ofo e la'u fua, peita'i o le fa'aitiitia mai o le tau masani o pusa oloa tetele nei, o se fesoasoani sili ua matou maua mo lenei fa'amoemoe."

 

I le tausaga atoa e tusa ma le 1miliona atigi fagu Vailima beer ua mae'a toe ave i le tausaga i Samoa, ae o le aofai o container oloa e auina atu i Amerika i le tausaga e na'o le lua pusa oloa e ta'i 350,000 pauna.

 

Peita'i, ona o lenei polokalama fa'amama fa'apa'aga, ua mae'a ona tu'ufa'atasia ai le tolu o pusa container 350,000 pauna le mamafa o le a ave'esea atu. O se mea lelei ma o se fa'afetai fo'i lea ua fa'ailoa mai, ma e mana'omia lava ona galulue fa'apa'aga fa'apenei le atunu'u atoa.

 

I le mae'a ai o le taumafaiga a le GHC Reid e fa'ailoa mai le aoga tele o lenei galuega o le a mae'a lona taimi atofa, ua iloga ai ua naunau fo'i le a'oga a le Samoana, vasega a le tama'ita'i o Mrs Mahuka, e fa'atino le latou fo'i galuega fa'amama.

 

O se tasi o aiga ua fa'ailoa mai e le GHC Reid ua ausia e i latou le aotelega o le 5,000 pauna o le atigi apa ua fa'ao'o atu o le aiga lea o Uaea mai Petesa. Fa'ailoa le galulue uma o lea aiga mo lea fa'amoemoe, ma ua fa'afetaia tele le latou galulue punoua'i, aua ua tali fo'i i latou i se fa'amanuiaga mai le latou galuega fai i aso ta'itasi.

 

Fa'amalo ma le fa'afetai, na fa'afofogaina mai le GHC Reid ona o le taumafaiga a le to'a 10 ma ona tupu o fa'alapotopotoga, aiga, ofisa, ma a'oga o lo'o aofia i le polokalama lea e avatu i totonu a latou taga o lapisi mo le fa'aliliuina.