Ads by Google Ads by Google

Phoebe Howlett, malaga ta'amilo, 235 atunu'u o le lalolagi


Le tamaitai ia Phoebe ina ua afea le Samoa News i le vaiaso lenei. [ata: Leua Aiono Frost]

O le tama'ita'i o Phoebe Howlett, 25 tausaga le matua, ma o se tasi o tagatanu'u o Peretania o lo'o ua fa'ato'a alaala i Lonetona, ae o lona tuputupu a'e sa soifua ma a'oga i Nottingham, le nu'u o Robin Hood ia i tatou ua mae'a faitau i lea fo'i tala tusia o tagata na fa'asagatau i nofoaiga tau tupu a lea malo.

 

Ona o ia o se tama'ita'i talavou ae ua fa'aosofia lagona e tatau ona ia faia lea la'asaga tele i lona olaga, ia asia e ia ma maimoa i atunu'u uma lava e 235 o le lalolagi atoa, na fesiligia ai pe aisea lava?

 

"Ona ua ou iloa ua maua a'u i ma'i tumau, e le toe mafai ona te'a ese i lo'u tino, peita'i ua mafai ona ou gafatia ona ola pea ma a'u, ae i'u lava ina ou oti ai. O lea ua faia ai sa'u filifiliga tatau, pe ou te alu e fa'aaoga tatau lo'u ola ou te maimoa ai i le lalolagi atoa, pe ou te nofo ma fa'aatau so'u fale na'o a'u lava ou te nofo ai i Nottingham, Egelani ma ou oti ane ai lava o o'u nofo ai?"

 

O lana filifiliga, tula'i ma savali, fa'aso'o le lalolagi i lana malaga ta'amilo, o se mea e ao ina faia a'o tumau mai le malosi i le olaga talavou o i ai nei. O matua o lenei tama'ita'i talavou o le tina mai Melbourne, Ausetalia Jane Howlett; a'o lona tama mai Manchester, Egelani, Warren Howlett; ae na matua'i ola femalaga'i fo'i i la'ua nei i o la'ua olaga talavou, ma fetaui ane ai i Brazil.

 

Na fesiligia Phoebe Howlett i sana galuega na faigaluega ai a'o le'i faia lana malaga ta'amilo i le lalolagi, ma ia tali mai, "O a'u na mae'a lelei a'u a'oa'oga maualuluga ma ou faigaluega ai i le galuega tau Inivesi o Tupe Maua, ma o se galuega na fa'apupula ai o'u mata i ala e mafai ona fa'aputua ai tupe ma maua ai tupe vave, o le ala fo'i lea o le gafatia ona maua la'u vaega tupe e fa'atino ai la'u malaga ta'amilo."

 

Ina ua faia sailiga a foma'i i lona soifua maloloina ina a mafai ona inivesi ana tupe ma lona inisiua, ae maua ane ai, ua le mafai ona toe inisiuaina lona soifua i le gasegase tumau ua maua ai nei.

 

O tupe na fa'asao ma fa'aagaaga e ona matua mo lona soifua talavou a'o a'oga, lea ua tu'ufa'atasia ma ua fa'atino ai lona fa'amoemoe.

 

I le taimi nei ua mae'a asia e ia le 62 o atunu'u o le lalolagi, ae afai e maea ona ia asia le vasa pasefika o le a silia pe latalata fo'i i le 80 atunu'u o le a mae'a ona ia asia.

 

Na malaga mai o ia i le va'a faila o le "Avalanche" in ua fetaui i latou ma masani i Ausetalia ma latou folau mai ai loa ma muamua lava afea Tahiti, Atu Kuki, Tokelau, Solomona,Tuvalu ma fa'asolo mai ai loa iinei lea o le a malaga i Samoa, Fiti, Tonga, Vanuatu, Niu Kaletonia ma toe foa'i atu aga'i i Niu Sila ma Ausetalia.

 

"O lenei vae o la'u faigamalaga, ua ou o'o ai i ni tagata sili ona fa'afeiloa'i fiafia i tagata uma. E fa'amasani gofie, e tausimalo lelei, e fiafia o latou olaga, e le o nisi e te va'aia se olaga fa'anoanoa ae latou te fiafia ma alolofa i tagata uma e afea o latou afio'aga ma le atunu'u. Ua ou fa'ailoa atu i o'u matua, atonu o le fa'aosofia o lo'u saga fiafia e asiasi solo i nisi atunu'u, ua matua fa'afaina lo'u naunau e fa'atino talu ona ou afea atumotu o le Pasefika. O ni tagata matua alolofa ma talimalo lelei, e soifua fiafia tele i latou."

 

Ua ta'ua e Phoebe o lo ua fia asiasi mai fo'i ona matua i Amerika Samoa, ma ua fa'ailoa atu, e maua uma lava mea Amerika i le teritori, ae o le isi ona itu, o lo'o ola ola lelei lava i latou i le latou lava aganu'u fa'asamoa.

 

O le aso ananafi, ua asiasi ai Phoebe i le malo Tuto'atasi o Samoa ona toe taliu mai lea malaga atu aga'i i Tonga ma Fiti. Ua silia ma le 15 masina talu ona tu'ua e ia lona aiga, ae o se taimi fiafia tele, ua le toe anoanoa e ia le tele o mea na fefe i ai i lona gasegase. Ua moni ai fautuaga a le foma'i ia te ia, "Alu ina ola fiafia, atonu e ave'esea ai tiga o lou ma'i, ma e ola umi atu ai."

 

O le a se aoga i se tasi o lenei fa'asoa a Phoebe? O lana tali mai, "Atonu e faigata ona tu'ua e i tatou o tatou aiga pe a va'ai i se aoga e ao ina e faia mo lou aiga. E moni lelei, ae i ai nisi o i tatou ua tu'uina mai se umi o le ola e soifua ai i lenei lalolagi. O le meaalofa tupe fo'i a o'u matua ua tu'uina mai, sa la'ua fa'asoa ma fa'apolopolo mo so'u lumana'i, ae sili ia i la'ua le va'ai mai, ua ou fa'aaogaina ma le fiafia, a'o le'i avea le manavaola ia te a'u."

 

O lana malaga ta'amilo ua fa'amauina i lana Uepesite, ina ia faia se aoga mo tagata latou te faitau i ai, i lona ma'i ma lana filifiliga ua fa'aosofia ai lona talavou na te faia lenei malaga ta'amilo.

 

O le ala fo'i lea o le sailia e Phoebe o le avanoa lelei e tusia ai lona tala'aga e ala i lana malaga ta'amilo, afai e mae'a lona fa'amoemoe, fa'afetai, ae afai e le mae'a ona o tulaga o le ma'i, e leai se failoto, sa ia faia ma le fiafia lana taumafaiga.

 

O ata, o tusitusiga ma mea uma i atunu'u na te afea i lana malaga ta'amilo, o le a fa'amaumauina i lana Uepesite - lea ua fa'alauiloa atu nei - www.thechanceofchoice.com

 

"Aua ne'i avea lou fa'amoemoe ola, ona o ma'i o le tino ua e maua tumau ai, ae taumafai o lo'o i ai pea nisi mea e mafai ona e faia ma e soifua fiafia ai i lou olaga fetaia'i ai ma tiga tau le tino. Ua ou maua le avanoa lelei, fa'afetai i le Atua, ua ou mafaia ona tula'i ma savali e fa'atino lo'u fa'anaunauta'iga ou te fia iloa isi atunu'u uma o le lalolagi, fetaui ma ona tagatanu'u ma fa'amasani i le agalelei ma le alofa i aso uma” o sana tala fiafia lea, aua o lo ua olaina e ia lana lava mau o tau'ave, "ia ola fiafia i aso o totoe."

 

O lona fa'amoemoe o le talanoa i fanau talavou i totonu o a'oga, peita'i i le taimi nei o lo’o malolo aoga.