Ads by Google Ads by Google

Pacific Horizons Class of 2018

Cher Pelesia Nomura lea na mauaina le tulaga togisilia fa'atasi ma Esme Peck i le vasega fa'aiuaso a le Pacific Horizons School i lenei tausaga i le fa’auuga sa faia i le aso To’anai ua te’a. [ata: foa'i]O le tama'ita'i ua avea fa'atasi ma Cher Pelesia Nomura le tulaga togisilia, Esme Peck, ua fa'atasi ma lona aiga i lona aso fiafia ua fa'au'u i le aso Toanai ua te’a mai le vasega 12 a le Pacific Horizons School. [ata: foai]
17 FANAU FA’AU’U MAI AOGA PACIFIC HORIZONS

Pago Pago, AMERICAN SAMOA — O le ulua'i tausaga lenei ua ausia ai se numera maualuga, 17 o i latou o fanau fa'ai'uaso mai le vasega 12 i le Pacific Horizons School i Tafuna. O le fa'au'uga na faia i le Gov. Rex Lee Auditorium i Utulei i le aso To'ona'i ua te’a.

Na auai sui o le Malo, le afioga le Lutena Kovana Lemanu Palepoi Mauga, fa'atonu sili o A'oga Dr Ruth Matagi-Tofiga, ma Tapa'au Dr. Daniel Aga sa filifilia e le vasega fa'ai'uaso e avea ma fofoga fa’apitoa mo lo latou aso.

Mai lea 17 o le ‘au fa’au’u, e to'a sefulu i latou e fa'au'u ma togi maualuluga.

O le tulaga lua o le vasega fa'ai'uaso sa tula'i mai ai le ali'i o Ran Gao, ae o le togisilia sa tutusa ai le to'alua - Cher Nomura ma Esme Peck.

Suafa o le ‘au fa’au’u: Kurt Aguire; Gariella Carruthers; Carolyn Ching San; Ryan deSaulles; Ran Gao; Zaira Nicole Jagon; Jaclyn Keil; Tausa'afia Lauvao; Kolinio Niumataiwalu; Cher Nomura; Esme Peck; Gloria Poasa; Alice Sullivan; Changjing Tan; Frank Thomsen; James Wang ma William Young.

I le amataga o lea sauniga sa vala'auina ai Sabrina Tolo nate siitia le tatalo amata ona fa'ato'a saunoa ai lea o Caroline Tuiolosega e fa'afeiloa'ia le mamalu o le au valaaulia sa auai.

O le fa'alauiloaga o le fa'amanuia aloa'ia mai le Sui Faipule o Amerika Samoa i le Konekeresi Aumua Amata, sa nafa lea ma le susuga Howard Howard, ma sa ia fa'alauiloa fo'i ma taua'aoina aloaia tusi pasi fa'ailo i tama ma teine fa'au'u.

Na i ai le avanoa o le sui na mauaina le tulaga lua i le vasega mo lana folasaga, Ran Gao. Ina ua mae'a sa tofu fo'i Cher Nomura ma Esme Peck ma le avanoa fa'aauro e saunoa ai e tusa o so la'ua lagona mai le tele o tausaga sa tausailia mai ai togi e ausia ai lenei aso patino i o latou olaga.

Fai mai Peck, "E tele mea sa ou ola ma a'oga ai, peita'i, ua fa'alua nei ona ou toe taliu mai lava i Amerika Samoa po'o atumotu o le Pasefika le tatou Oceania. Aisea, e i ai lava le agaga, e sili atu ona ou iloa o lo'u Aiga moni lea nai le Amerika i Matu po'o Europa."

O le isi vaega tele o lona avanoa sa ia fa'ailoa mai ai le aoga o latou faia'oga tinou sa a'oa'oina i latou, ma ua avea ma fa'amalosi'au e lu'ia o latou tagata taumafai e saili le atamai. O lana fa'afetai fo'i lea sa ia saunia, ona o le auaunaga a faia'oga uma ia mautu ai lo latou fa'amoemoe, ia i'u lelei a latou taumafaiga.

I le folasaga a Nomura, sa ia fa'ailoa ai lona agaga fa'afetai i le Atua ona o le saofaga o le latou fa'amoemoe ua atoa le 12 tausaga o tausailia mai pe taunu'u i ai pe leai, "Lea ua taunu'u mai, ua ese fo'i lagona, ae o le fa'amau fa'ailoga lea o le tele o tauvaga sa taumafai ina ia fa'ai'u manuia i tulaga o a'oa'oga ma folasaga o so'o se ituaiga i mataupu sa a'oa'oina ai i a'oga. O galuega fo'i e ao ina fa'amae'a lelei ia lelei togi e maua ai, sa iloga ona pisi ai i matou na tausinio, ae ua galo nimo ai nisi o mea e sili ona taua, o le fiafia fa'atasi lea ma a matou pelega i taimi uiga o le olaga. Fa'afetai Matua sa outou le fa'asili se isi mea, ae tu'ua i matou, ua outou lagolago ma sapaia mea uma, ina ia mautu lo matou fa'amoemoe aua aso fa'apenei. Lea la ua mae'a lenei la'asaga, ae saofaga atu mo le isi la'asaga e soso'o mai, alofa le Atua ma toe fa'amanuia mai ia i matou uma lava le fanau taumafai i a'oa'oga."

Fa'afetaia fo'i e ia le fa'amalosi'au mai a si ona tina matua, ina ua tulata i le taimi o lenei fa'amoemoe, ua tau fa'aletonu fo'i manatu, peita'i sa ia tu'ualalo mai ma fa'ailoa mai ia te a'u, "Aua le popole Pelesia, e lelei mea uma i le Atua."

“Ua ia va'aia se aso matagofie mo i matou uma le fanau fa'aiuaso o lenei tausaga, o se folauga sa fitaituga ae ua maua fo'i le malu ina ua mae'a mea uma, ma ua pale fo'i i le manumalo. Tatou aga'i atu i le lumana'i ma le toto'a, aua o lo tatou 'ai o lo'o ua fa'atali mai mo i tatou uma,” o sana toe upu fa'amalosi lea i lana vasega fa'ai'uaso.

O le taua'aoina o tusi pasi i le vasega fa'ai'uaso na tutula'i ai Lemanu, Matagi-Tofiga ma le Taitaifono o le Komiti Fa'afoe a le Pacific Horizons, Richard deSaulles.