Ads by Google Ads by Google

Osofa’i loia a le itu tete’e fa’amaoni molimau a le malo


[ata: foa'i]
ausage@samoanews.com

A o fa’agasolo ai le fa’amasinoga autu a le ali’i sa avea ma Leoleo i le Falepuipui o Tamaiti (JDC) i Tafuna i luma o le Fa’amasinoga Maualuga i le vaiaso nei, na maitauina ai le aga’i o fesili a le Loia mo le itu tete’e e tu’i pala le fa’amaoni o fa’amatalaga sa tuuina atu e le molimau a le malo i Leoleo.

 

O le tama’ita’i loia ia Christy Dunn, fa’atasi ai ma le Loia Sili lagolago ia Lornalei Meredith o loo tula’i mo le malo, ae o le ali’i loia ia Richard deSaulles ma lona soatau ia William Olson o loo tula’i mo Okesene Alo.

 

O le susuga a Alo lea o lo o taofia pea i le toese i Tafuna i le taimi nei, ina ua le mafai ona totogi le tupe e $100,000 na fa’atulaga e tatala ai o ia i tua, o lo o tu’uaia e le malo i moliaga eseese e 13.

 

O ia moliaga e aofia ai moliaga mama e 3 o le faia o gaioiga e lamatia ai le saogalemu o fanau laiti; faapea ai  ma moliaga mamafa e 10 e aofia ai moliaga e 2 o le umia faasolitulafono o vaega o le fualaau faasaina o le aisa; 2 moliaga o le umia faasolitulafono o le aisa ma le fa’amoemoe e fa’atau atu i isi tagata; 1 le moliaga o le gaoi; 3 moliaga o le fa’ataga o tamaiti e sosola i tua, ma moliaga e 2 o le fesoasoani lea i fanau e tagofia fualaau faasaina ma le ‘ava malosi.

 

O ulua’i molimau a le malo e to’afa sa valaauina i le aso lona lua o lenei iloiloga, sa aofia ai Leoleo e to’atolu ma se ali’i e 18 tausaga le matua, lea sa taofia i totonu o le JDC i le taimi na tula’i mai ai le mataupu e pei ona tu’uaia ai Alo i le 2016.

 

O le ulua’i molimau na valaau e le malo, o se ali’i Leoleo sa galue i le JDC i le taimi na tula’i mai ai lenei fa’alavelave, a o lea ua suia le vaega o le Ofisa o Leoleo lea ua tofia o ia e galue ai i le taimi nei. Na taua e lea ali’i Leoleo i lana molimau e fa’apea, e i ai ta’iala ma faiga fa’avae e lima ta’ita’iina ai ali’i ma tama’ita’i Leoleo i le fa’atinoina o a latou tiute. Ma o ni isi o ia ta’iala ma faiga fa’avae, e aofia ai le le tatau lea i se Leoleo ona tuua le nofoaga o le galuega, se’i vagana ua aloaia se suiga mo le isi sifi o lo o mulimuli mai.

 

O le tamaititi e 18 tausaga le matua lea sa taofia i le JDC i le 2016 na avea ma molimau lona lua a le malo. Na taua e lea ali’i i le vaega iloilo iuga e fa’apea, e 2 tausaga sa taofia ai o ia i le JDC ona o moliaga e aofia ai le tagofia o le ‘ava malosi, fa’atupu vevesi i nofoaga faitele, atoa ai ma le talepe fale i le tulaga muamua.

 

Sa ia fa’amatala lona manatua o le taimi na suesueina ai o ia e Leoleo ao taofia ai i le JDC, ina ua masalomia lona fa’aaogaina o fualaau fa’asaina. Sa faia se suega faapitoa i lona tino e Leoleo na fa’amaonia ai le i ai o le vailaau oona o loo i le pauta o le aisa i lona tino.

 

Na fesili le loia a le malo ia Meredith i le molimau poo fea na aumai ai le aisa lea sa maua i lona tino, na tali le molimau, na aumai i le ali’i leoleo o Okesene Alo. Na toe fesili le loia a le malo i le molimau, na avatu sa’o lava e Alo le aisa ia te ia, na tali le moilimau, “O lea lava.” Na taua atili e le molimau e fa’apea, sa i ai fo’i i si taimi na avatu ai e Alo aisa ia te ia, e ese mai i le taimi lea na faia ai le suega a Leoleo ma faamaonia ai le i ai o le aisa i lona tino.

 

Ina ua fesiligia le molimau pe sa i ai se taimi na ia vaaia ai Alo o ia aveesea mai ni meaai mai totonu o le JDC, na tali le molimau, e leai.

 

“Ou te le i vaai lava o aveese mai e Alo ni meaai mai le JDC, e leai fo’i se taimi na ou vaai ai o ave e Alo ni fualaau fa’asaina poo le ‘ava malosi i isi tamaiti pagota sa taofia i le JDC, ou te lei vaai fo’i o ia fa’ataga ni tamaiti e o i tua mai le falepuipui,” o se vaega lea o le molimau a le tamaititi e 18 tausaga.

 

Ina ua oo i le taimi e fesiligia ai e le loia a Alo le molimau, na fesili ai deSaulles poo ia manatua lana tala sa fai i Leoleo i le mea na ia maua mai ai le aisa, na tali le moilimau, “Ou te le o manatua.”

 

“O e manatua lau tala sa fai i Leoleo, sa e mauaina le straw o loo i ai aisa i le taimi na e saluina ai le foloa o le JDC,” o le fesili lea a le loia a Alo. Ae na tali le molimau, “Leai.”

 

“O e manatua lau tala sa fai i Leoleo, e 3 straws sa i ai i totonu aisa na e aveeseina mai i le ato fa’afafa a Alo,” o le isi lea fesili a le loia a Alo. Ae na tali le molimau, “Ou te le o manatuaina le tulaga lena.”

 

“Sa i ai se taimi na e aveeseina mai ai ni straws se 3 o loo i ai aisa i totonu mai le ato a Alo,” o le isi lea fesili a le loia a Alo. Ae na tali le molimau, “O lea lava.”

 

Na taua e le molimau e fa’apea, na te le o manatuaina le taimi tonu o le tausaga e 2016 na faia ai le suega i lona tino ma faamaonia ai le i ai o le aisa, na te le o manatuaina fo’i sana faamatalaga na tuuina atu i Leoleo e fa’atatau i ni straws se 3 na ia aveeseina mai i le ato a Alo. Pau le tulaga o loo ia manatua, e tasi le straw sa i ai i totonu le aisa na ia aveeseina mai le ato a Alo.

 

Sa ia taua fo’i, o se tasi o ali’i Leoleo e igoa ia Wilson, o le isi lea Leoleo sa ia tuuina atu le aisa ia te ia.

 

O le ali’i Leoleo o Olafou Wilson, o le isi lea o lo o tu’uaia fa’atasi ma Alo i le mataupu lenei. O le masina o Aperila na talia ai e le Fa’amasinoga le tali ioe a Wilson i moliaga mamafa e 2 o le umia faasolitulafono o le aisa ma le gaoi.

 

Na toe fesiligia e le loia le molimau pe na te manatuaina le taimi na ia tagi ai ma faatoese ia Alo e tusa ai o lona faia o ni tala le sa’o i Leoleo, ina ua fa’atoa mae’a le suega na maua ai le aisa i lona tino, le tali le molimau, na te le manatua.

 

O isi molimau e to’alua na valaau mulimuli e le malo, o ali’i Leoleo Suesue sa aofia i le suesueina o lenei mataupu.

 

Na taua e le ali’i Leoleo Su’esu’e ia Det. Ioane Paselio, o ia lea na faia le suega i le ali’i e 18 tausaga le matua, ma faamaonia le maua ai o le aisa i lona tino. Na taua atili e Det. Paselio e fa’apea, sa ia fesiligia le ali’i e 18 tausaga poo fea na aumai ai le aisa sa ia fa’aaogaina, ae na tali le ali’i lea, na aumai ia Alo.

 

Ae na taua e Det. Filemoni Amituana’i i lana molimau e fa’apea, e to’atele tamaiti pagota i le JDC sa ia fesiligia e uiga i lenei mataupu, e aofia ai fo’i Alo ma isi Leoleo.

 

I le la talanoaga ma Alo, sa ia teena ai lona fa’aaogaina o fualaau fa’asaina. Mulimuli ane fa’ailoa atu e Alo ia te ia, le faigata lea ona taofi o le fa’afitauli o lona naunau i le fualaau oona o le aisa.

 

O lo o fa’auau pea lenei mataupu i luma o le Fa’amasinoga Maualuga.